قول دىرىلدەسە قايتپەك كەرەك؟

 استانا. قازاقپارات - قولدىڭ دىرىلدەۋى نەمەسە قالتىراۋى - سىرت كوزدەن جاسىرۋعا كەلمەيتىن اسا جاعىمسىز قۇبىلىس.

ول جۇيكە جۇيەسىنىڭ بۇزىلعاندىعىن ءبىلدىرىپ، كوپتەگەن جاعىمسىز اۋرۋلاردىڭ بەلگىسى بولۋى مۇمكىن. بوگدە ادامدار مۇنى اشكەرەلەنۋدەن قورقىنىش دەپ نەمەسە الكوگولدى سۋسىنداردى شامادان تىس تۇتىناتىن ادام دەپ قابىلداۋى مۇمكىن، الايدا شىندىعىندا ولاي ەمەس. قالاي بولعاندا دا قولداردىڭ قالتىراۋى -  ۋاقىت سالماي دارىگەرگە قارالۋعا سەبەپ.

قول ءدىرىلىنىڭ تۇرلەرى

ەڭ كوپ تارالعان قالتىراۋلاردىڭ ءبىرى -  ەشقانداي اۋرۋمەن بايلانىسى جوق قاتەرسىز قالتىراۋ. ول كوبىنە جاسوسپىرىمدىك شاقتا نەمەسە جاستىق كەزەڭدە كوپ كەزدەسەدى. باستاپقىدا قاتتى سەزىلگەنىمەن، كەيىن ءىز- ءتۇزسىز ءوزى كەتىپ قالادى. كەيدە ءبىر قول قالتىراپ باستاپ، ەكىنشى قولعا وتەدى، ال كەيدە ءتىپتى يەك، ءتىل، باس تا بىرگە دىرىلدەۋى مۇمكىن.

مۇنداي جاعدايدا ادامنىڭ قاندايدا ءبىر ارەكەت جاساۋى قيىنداي تۇسەدى، ءتىپتى كەسە ۇستاۋعا دا يكەمى كەلمەي قالادى. ال ۋايىمداعان كەزدە نەمەسە الكوگولدى ىشىمدىكتەر ىشكەندە قالتىراۋ ءتىپتى ۇدەي تۇسەدى. ەگەر قالتىراۋدىڭ سەبەبى ۋايىمشىلدىقتان بولسا، كوبىنە جۇيكە جۇيەسىن تىنىشتاندىراتىن پرەپاراتتار ۇسىنىلادى.

قول قالتىراۋدىڭ تاعى ءبىر ءتۇرى -  پوستۋرالدى قالتىراۋ. ول تۇقىم قۋالاۋدان، اسىرە مازاسىزدىق سالدارىنان نەمەسە قالقانشا بەزى فۋنكسياسىنىڭ بۇزىلۋىنان بولۋى مۇمكىن. قالتىراۋدىڭ بۇل ءتۇرى ابستينەنسيا سالدارىنان كوبىنە ماسكۇنەمدەر مەن ناشاقورلاردا بولادى. كەيبىر كۇشتى اسەر ەتەتىن دارىلەردى شەكتەن تىس پايدالانۋ دا پوستۋرالدى قالتىراۋعا سەبەپ بولۋى مۇمكىن. مۇنداي دارىلەرگە ەسۋاستاندىرعىش پرەپاراتتار مەن برونحتى كەڭەيتەتىن دارىلەر جاتادى.

سونىمەن قاتار سىناپ سياقتى اۋىر مەتاللداردىڭ تۇزدارىمەن ۋلانۋ دا وسىنداي قالتىراۋعا سەبەپ بولا الادى. جاعدايدى باقىلاۋدا ۇستاۋعا تىرىسۋ مەن قولدىڭ ءدىرىلىن ازايتۋعا كۇش سالۋ ونىڭ ودان بەتەر ۇدەي تۇسۋىنە ىقپال ەتەدى. قالتىراۋدىڭ بۇل ءتۇرى ۇساق ارشىندى بولىپ كەلەدى، مۇنى اۋرۋدىڭ قولىن الدىعا سوزىپ، ساۋساقتارى جايۋلى كۇيىندە جاقسى بايقاۋعا بولادى.

ينتەنسيوندى قالتىراۋ -  ميشىق اۋرۋىنىڭ سالدارىنان بولادى.

ول اسىرەسە قيمىل-قوزعالىس اياقتالىپ، نىساناعا جاقىنداي تۇسكەن كەزدە بايقالادى (مىسالى، كوز جۇمۋلى قالپىندا ساۋساقپەن مۇرىننىڭ ۇشىنا تيگىزۋگە تىرىسۋ). قالتىراۋدىڭ بۇل تۇرىنە استەريكسيس، نەمەسە فلەپپينگ- ترەمور جاتادى. بۇلار تۇقىم قۋالايتىن قاتتى اۋرۋلاردىڭ ءبىرى - ۆيلسون-كونوۆالوۆ اۋرۋىنىڭ بەلگىسى بولۋى مۇمكىن، سونىمەن قاتار بۇيرەك، باۋىر جانە ورتالىق مي زاقىمدانۋىنىڭ سالدارىنان دا بولىپ جاتادى.

مۇنداي قاتتى اۋرۋلارعا پاركينسون اۋرۋىن دا جاتقىزۋعا بولادى. اۋرۋدىڭ نەگىزگى بەلگىسى -  قولداردىڭ ءاردايىم دىرىلدەپ تۇرۋى. قالتىراۋدىڭ بۇل ءتۇرى 60-تان اسقاندا، ياعني ەگدە جاستا پايدا بولادى جانە جازىلماس دەرتتىڭ ءبىرىنشى بەلگىسى بولىپ تابىلادى. قازىرگى تاڭدا دارىگەرلەر بۇل اۋرۋدىڭ تارالۋىن باياۋلاتا عانا الادى، سوندىقتان پاركينسوندى ۋاقىتىندا انىقتاپ، ەمدىك شارالاردى ەرتەرەك باستاۋ ماڭىزدى.

قالتىراۋدىڭ سەبەپتەرى

ەگەر قولداردىڭ دىرىلدەۋى ماسكۇنەمدىك نەمەسە پاركسينون اۋرۋىنىڭ سالدارىنان بولماسا، ول ميدىڭ زاقىمدانۋ سالدارىنان، سونىمەن قاتار جۇيكە جۇيەسىنىڭ بۇزىلۋىنان: سترەسس، كۇيزەلىس، ەموتسيونالدى جانە پسيحيكالىق اۋىرتپالىقتان دا بولادى. كەيدە ول كوپ كوفە ىشەتىن ادامداردا پايدا بولادى. مۇنداي جاعدايدا ول سپونتاندى، قولداردىڭ جىبىرلاپ دىرىلدەۋى سياقتى بىلىنەدى.

كوپشىلىك الدىندا ءسوز سويلەۋدەن بولاتىن تولقۋ نەمەسە ۇرىس- كەرىس كەزىندە الىناتىن قاتتى سترەسس كوبىنە تانىس. مۇنداي ساتتە بۇرىن بىلىنبەگەن بولسا دا كوپتەگەن ادامداردىڭ قولدارى دىرىلدەپ، قالشىلداي باستايدى. الايدا بۇدان قورقۋدىڭ قاجەتى جوق -  بۇل اعزادا ورىن العان تابيعي فيزيولوگيالىق رەاكسيا.

قانعا كەنەتتەن ەنگەن كوپ مولشەردەگى سترەسس گورمونى اعزانى موبيليزاتسيالاندىرىپ، فيزيكالىق مۇمكىندىكتەرىنەن شەكتەن تىس جۇمىس ىستەۋىنە يتەرمەلەيدى. ماسەلە قولداردىڭ جەڭىل دىرىلىمەن اياقتالسا جاقسى. ەگەر دەنەڭىز قاتتى قالشىلداپ، وعان قوسا قولدارىڭىز قالتىراي باستاسا مۇنداي رەاكتسيانى يستەريكالىق دەۋگە بولادى، بۇل جۇيكە جۇيەسىنىڭ فۋنكتسيونالدى بۇزىلۋىن بىلدىرەدى جانە تەز ارادا دارىگەرگە قارالۋ ۇسىنىلادى.

ەگەر تولقۋ سالدارىنان قولدارىڭىز قالتىرايتىن بولسا، دارىگەرگە تەك ارا-تۇرا، ماڭىزدى وقيعالاردىڭ الدىنا عانا تۇتىنۋعا بولاتىن پرەپاراتتار جازىپ بەرۋىن سۇراۋعا بولادى.

قول قالتىراسا نە ىستەۋ كەرەك؟

ەگەر جۇيكەنىڭ جۇقارۋى قولداردىڭ قالتىراۋىن تۋدىرسا، سابىرعا كەلۋگە تىرىسىپ، پسيحولوگيالىق زاقىمعا ۇرىندىرعان جاعدايدان بارىنشا كوڭىلىڭىز ءبولىنۋىن قاداعالاڭىز.

اقىل-وي ەڭبەگىمەن اينالىسقان جاعدايدا جانە ەموتسيونالدى شارشاعاندىقتان قولداردىڭ دىرىلدەۋى پايدا بولعانىن سەزسەڭىز، ميدى سەرگىتۋگە تىرىسىڭىز. ەموتسيونالدى شارشاعاندىقتى تولىقتاي بوساڭسۋ مەن مەديتاتسيا ارقىلى باسۋعا بولادى. فيزيكالىق جاتتىعۋلار جاساڭىز: باسسەيندە ءجۇزىڭىز نەمەسە الاڭدا 5-10 ك م جۇگىرسەڭىز بولادى.

قولداردىڭ قالتىراۋى اعزاعا فيزيكالىق كۇش ءتۇسۋ سالدارىنان بولعاندا، ەفير مايلارى قوسىلعان دەنەنى بوساڭسىتاتىن جىلى ۆاننا قابىلداۋعا تىرىسىڭىز. سونىمەن قاتار جۇيكەنى باياۋ اۋەندەر، ورماننىڭ شۋى، قۇستاردىڭ سايراۋى، تەڭىز سۋىنىڭ اعىنىن تىڭداۋ ارقىلى دا تىنىشتاندىرۋعا بولادى.

ەگەر قولدار اۋىر كۇش ءتۇسىرۋ جاتتىعۋلارىنان دىرىلدەيتىن بولسا، دەرەۋ ءۇزىلىس جاساڭىز - مۇنداي جاتتىعۋلار ءبارىبىر پايدا اكەلمەيدى، كەرىسىنشە ورتالىق جۇيكە جۇيەسىنىڭ بۇزىلۋىنا اسەر ەتۋى مۇمكىن. قالعان جاعدايلاردا، ەشقانداي سەبەپ كورىپ تۇرماعان بولساڭىز نەمەسە قولدارىڭىز قاندايدا ءبىر اۋرۋدىڭ سالدارىنان دىرىلدەپ جۇرگەنىن سەزسەڭىز، نەۆرولوگ پەن ەندوكرينولوگقا قارالعانىڭىز ءجون، ەكىنشىسى قالقانشا بەزىنىڭ جۇمىسىن تەكسەرىستەن وتكىزەدى.