سيرياداعى احۋال بويىنشا قازاقستانداعى كەلىسسوزدەر ناتيجەلى بولدى - يران پرەزيدەنتى
بۇل تۋرالى قازاقستاننىڭ سىرتقى ساياسي ۆەدومستۆوسىنان ءمالىم ەتتى، دەپ حابارلايدى قازاقپارات.
سالتاناتتى شارا يران پرەزيدەنتىنىڭ سارايىندا ءوتتى. ونىڭ بارىسىندا ەكى ەل اراسىنداعى ەكىجاقتى جانە كوپجاقتى فورماتتاعى ءوزارا ءتيىمدى ىنتىماقتاستىقتىڭ قازىرگى جاعدايى مەن ونى جانداندىرۋ ماسەلەلەرى تالقىلاندى.
ەلشى ا. ورازباي يران پرەزيدەنتىن ەلباسىمىزدىڭ باستاماسىمەن قازاقستاننىڭ ساياسي ءارى ەكونوميكالىق وركەندەۋى، حالقىمىزدىڭ ءال-اۋقاتىن ارتتىرۋ، سونداي-اق الەمدە بەيبىتشىلىكتى نىعايتۋ باعىتىندا اتقارىلىپ جاتقان ماڭىزدى شارالارمەن تانىستىردى. وعان قوسا، ەكى مەملەكەت اراسىنداعى ساۋدا-ەكونوميكالىق، ينۆەستيسيالىق جانە مادەني بايلانىستاردى ودان ءارى دامىتۋ بويىنشا پىكىرلەرىمەن ءبولىستى.
ءوز كەزەگىندە، ح. رۋحاني يران قازاقستاننىڭ تاۋەلسىزدىگىن ءبىرىنشى مويىنداعان مەملەكەتتەر قاتارىندا بولعانىن جانە وسى ۋاقىتتان بەرى ەكىجاقتى ىنتىماقتاستىق دوستىق سيپاتتا دامىپ كەلە جاتقانىن مالىمدەدى. سونداي-اق قازاقستان پرەزيدەنتى نۇرسۇلتان نازاربايەۆپەن ءوزىنىڭ ورناتقان تىعىز بايلانىسى ەكىجاقتى جانە ايماقتىق ماسەلەلەر بويىنشا جاقسى ىقپالداستىق جاساۋعا مۇمكىندىك بەرىپ وتىرعانىن ايتتى.
ي ي ر پرەزيدەنتى ەلىمىزدىڭ سىرتقى ساياساتتاعى باستامالارى ايماقتىق جانە حالىقارالىق قاۋىپسىزدىكتى ساقتاۋعا ەرەكشە ۇلەس قوسىپ وتىرعانىن، ونىڭ اياسىندا يراننىڭ يادرولىق باعدارلاماسى توڭىرەگىندەگى ماسەلەنى شەشۋ جانە سيرياداعى جانجالدى رەتتەۋ بويىنشا قازاقستاندا وتكەن كەلىسسوزدەردىڭ ناتيجەلى بولعانىن اتاپ ءوتتى.
ح. رۋحاني ەكىجاقتى ىنتىماقتاستىقتىڭ الەۋەتى زور ەكەندىگىن، قازاقستان مەن يران كاسپيي تەڭىزى ارقىلى تىكەلەي جانە تۇرىكمەنستان ارقىلى تەمىر-اۆتو جولدارمەن بايلانىس جاساي الاتىنىن ايتتى. وسى ورايدا، كولىك- ترانزيت جانە اۋىل شارۋاشىلىعى سالالارىنداعى ىنتىماقتاستىقتى جانداندىرۋ ەكى ەلگە دە ءتيىمدى بولاتىنىن حابارلادى.
وعان قوسا، تاريحي جانە مادەني بايلانىستار قازىر دە ءوز جالعاسىن تاۋىپ وتىرعانىن، ونىڭ ايقىن مىسالى رەتىندە ناۋرىز مەرەكەسىن كەلتىردى.
ي ي ر پرەزيدەنتى ح. رۋحاني ن. نازاربايەۆقا دوستىق جىلى سالەمىن جولدادى جانە قازاقستان پرەزيدەنتىن يراندا ساپارمەن كەلۋىن كۇتەتىنىن مالىمدەدى.
