قازاقستاندا بولاشاقتا سۇرانىسقا يە بولاتىن ماماندىقتار ءتىزىمى جاسالماق
«قازاقستانداعى جاڭا ماماندىقتار اتلاسىن» ازىرلەۋدەگى ارىپتەستىك تۋرالى مەموراندۋمعا «جاڭا كاسىپتەر اتلاسى» (حالىقارالىق جوبا، رەسەي)، BTS Digital كومپانياسى (قازاقستاندا جوبانى جۇزەگە اسىرۋشى) مەن ەۋرازيالىق توپ (ERG) تاراپتارى قول قويدى.
جاڭا ماماندىقتار اتلاسى - ەڭبەك نارىعىندا بولاشاقتا تۋىندايتىن قۇبىلىستاردى تەرەڭ تالداپ، الداعى ونداعان جىلدار ىشىندە پايدا بولاتىن نەمەسە تۇراقتى سۇرانىسقا يە بولىپ قالا بەرەتىن ماماندىقتاردى ايقىنداۋعا ىقپال ەتەتىن كاسىبي باعدارلاۋدىڭ وزىق قۇرالى. اتلاس ادىستەمەسى 2014-جىلى حالىقارالىق ەڭبەك ۇيىمى، سترەتاگيالىق باستامالار ينستيتۋتى مەن سكولكوۆو ماسكەۋ باسقارۋ مەكتەبى بىرلەسىپ ازىرلەگەن قابىلەت پەن قۇزىرەتتەردىڭ تەحنولوگيالىق فورسايتىنا (Skills Technology Foresight) نەگىزدەلگەن.
ادىستەمەنىڭ ءمانى ەلدىڭ ەرەكشەلىگى مەن مەملەكەت ءۇشىن ماڭىزدى باعىتتاردى ەسكەرە وتىرىپ، ورتاق ديالوگقا جۇمىلدىرۋ جولىمەن بولاشاقتىڭ تۇعىرناماسىن تۇزەتىن ءتۇرلى سالا ساراپشىلارىنىڭ ءوزارا ىقپالداستىعى مەن ينتەگراتسياسى بولىپ وتىر.
«وتكەن ەكى اپتادا ءبىر توپ ساراپشىلار كەلىپ، BTS Digital كومپانيامىزدىڭ وكىلدەرى، ەڭبەك جانە حالىقتى الەۋمەتتىك قورعاۋ مينيسترلىگى مەن ERG كورپوراتسياسى قىزمەتكەرلەرىنەن قۇرالعان ءبىر توپ ساراپشىلارعا ۇلكەن فورسايت-مەكتەبى وتكىزىلدى. بۇل شارانىڭ ماقساتى - قازاقستاندا بولاشاقتاعى ماماندىقتار اتلاسىن جاساۋ. ياعني، قازىرگى تاڭدا ەلىمىزدەگى ەڭ ۇلكەن ماسەلە - ماماندىقتاردى ايقىنداۋ جانە بولاشاقتا قاي ماماندىقتار، ماشىقتار كەرەكتى بولاتىنىن انىقتاۋ ەكەنى بارشامىزعا ءمالىم. كەيبىر ماماندىقتار ەڭبەك نارىعىنان مۇلدە جوعالىپ كەتۋى مۇمكىن. نەگە دەسەڭىز، قازاقستاننىڭ ستراتەگيالىق قۇجاتتارىندا ايتىلعانىنداي، تەحنولوگيالىق مودەرنيزاتسيا، يندۋستريا 4.0، يندۋستريالىق ريەۆوليۋتسيا وتە ۇلكەن كەشەندى وزگەرىستەردى الىپ كەلدى»، - دەيدى استانادا وتكەن جيىندا BTS Digital كومپانياسى وقىتۋ ورتالىعىنىڭ جەتەكشىسى ساياسات نۇربەك.
ونىڭ ايتۋىنا قاراعاندا، تسيفرلىق تەحنولوگيالار كوپتەگەن سالالاردا ماماندىقتاردى ەڭبەك نارىعىنان ىسىرىپ بارادى.
«وسى ۇلكەن جاھاندىق ۇردىستەر اقىرىنداپ ءبىزدىڭ ەڭبەك نارىعىمىزعا، ءبىلىم بەرۋ مودەلىنە اسەر ەتۋدە. سول سەبەپتى، مەكتەپتەگى تالاپكەرلەردەن جاس ماماندارعا دەيىن، ورتا جاستا جۇمىسىن جوعالتىپ العاندار نەمەسە جۇمىسسىز جۇرگەندەرگە وسىنداي قۇرال، اتلاس قاجەت. ءبىزدىڭ BTS Digital كومپانياسى ءبىلىم بەرۋ جانە الەۋمەتتىك سالالاردا سيفرلىق سەرۆيستەر مەن ونىمدەردى جاساۋدا. سول سەبەپتى، ءبىز ءبىلىم سالاسىندا وسى ماسەلەنى ەڭ ءبىرىنشى ماسەلە رەتىندە كورىپ، جاڭا ماماندىقتاردى انىقتاۋ جۇمىسىن قولعا الىپ وتىرمىز»، - دەيدى ساراپشى.
ايتا كەتسەك، رەسەيدەگى العاشقى «جاڭا كاسىپتەر اتلاسى» 2014-جىلى ازىرلەنگەن.
«جاڭا ماماندىقتار اتلاسىنىڭ مازمۇنىن حالىقارالىق ارەنادا تاراتۋ يدەياسى وسىدان بىرنەشە جىل بۇرىن تۋىنداعان ەدى. قازاقستان بۇل سالادا العاشقىلاردىڭ ءبىرى بولىپ باستاما كوتەردى. BTS Digital- ءدىڭ ىقپالداستىعىنىڭ ارقاسىندا ءبىز ءوز تاجىريبەمىزبەن بولىسە الامىز. اتلاس قۇراستىرۋ - شىعارماشىلىق شابىتى شالقىعان ءارى بۇل ىسكە شىن بەكىنگەن بىلىكتى كوماندانى قاجەت ەتەتىن سان قاتپارلى اۋقىمدى ءىس. ءبىر قۋانتارلىعى، ءبىزدىڭ ارىپتەستەرىمىز بار ىنتاسىن سارقا جۇمساپ، قىسقا مەرزىمدە Rapid Foresight ادىستەمەسىن مەڭگەرىپ قانا قويماي، قوس فورسايت-سەسسيادا ەمتيحانىنان سۇرىنبەي وتە العان بىلگىر كوماندا توپتاستىرا العان. سوندىقتان، قازاقستاندىق ارىپتەستەرىمىزگە «فورسايتينگ»، ياعني «بولاشاقتى بولجاي» ويلاستىرۋ تاجىريبەسى جانە بولاشاقتىڭ سۇلباسىن قۇرۋدان جۇرەكسىنبەگەنى ءۇشىن العىس ايتقىمىز كەلەدى. ءارى سەرپىندى سەرىكتەستىككە سەنىم ارتامىز»، - دەيدى «جاڭا ماماندىقتار اتلاسى» جوباسىنىڭ جەتەكشىسى دميتري سۋدكوۆ.
قازاقستانداعى العاشقى حالىقارالىق فورسايت- مەكتەپ «BTS Digital» ج ش س نەگىزىندە وسى ايدا قۇرىلىپ تا قويىپتى. ءتىپتى كومپانياعا بۇگىنگى كۇنى العاشقى تاپسىرىس بەرۋشى دە تابىلعان. ناقتىراق ايتقاندا، ەۋرازيالىق توپ تاۋ-كەن مەتاللۋرگيا سالاسىنا ماماندار دايارلاۋعا قاجەتتى كاسىبي باعدارلاۋ اتلاسىنا تاپسىرىس بەرگەن. ساياسات نۇربەكتىڭ ايتۋىنشا، وسى ورايدا جاستار ومىرلىك كاسىبىن تاڭداعاندا كوبىنە جاقىندارى مەن تانىستارىنىڭ جەكە پىكىرلەرىنە قۇلاق اسىپ، نەمەسە نارىقتاعى قىسقامەرزىمدى ترەندتەر نەگىزىندە شەشىم قابىلداپ جاتادى.
«ءبىز ءىرى جۇمىس بەرۋشىلەر مەن ەڭبەك جانە حالىقتى الەۋمەتتىك قورعاۋ مينيسترلىگىنىڭ بىرلەسە، تىعىز جۇمىس ىستەۋىن ماماندىقتار اتلاسى ادىستەمەسىمەن ۇيلەستىرسەك، ەلىمىزدىڭ بارلىق تۇرعىندارىن كاسىبي باعدارلاۋدىڭ نىق تۇعىرناماسىن تۇزۋگە بولاتىنىنا سەنىمدىمىز. سايىپ كەلگەندە ءبىز ەڭبەك نارىعىندا بار ماماندارعا قانداي داعدىلاردى ۇيرەتۋ كەرەكتىگىن ءبىلىپ، قولجەتىمدى ءارى قولدانبالى ءمانى بار الدىن الا مامان دايارلاۋ قۇرالىنا يە بولامىز»، - دەيدى ساياسات نۇربەك.
ەسكە سالا كەتسەك، جاستار ءۇشىن ماماندىقتاردى ايقىنداۋ ماسەلەسى مەملەكەت باسشىسى نۇرسۇلتان نازاربايەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا دا كوتەرىلگەن بولاتىن. وتىرىس كەزىندە پرەزيدەنت قازاقستاندا جۇمىسسىزدىق ماسەلەسى جوقتىعىن، ماماندار تاپشىلىعى ماسەلەسى بارىن اتاپ وتكەن ەدى.
ءار وبلىستا قانداي ماماندىقتاردىڭ كەرەكتىگى بەلگىلى عوي. بىزدە جۇمىسسىزدىق دەگەن ماسەلە جوق. بىزدە ماماندىق دەگەن ماسەلە بار. جان-جاقتان، وبلىستاردان استاناعا كەلەدى. بارلىق جەردە قۇرىلىستار ءجۇرىپ جاتىر. جۇمىسشىلار جەتىسپەيدى. دانەكەرلەۋشى، قۇرىلىسشى جوق. بۇل جەردە اسپاز، بالا تاربيەلەۋشى، داياشىلار تاپشى. ماسەلە سوندا. جۇمىسسىزدىقتا ەمەس»، - دەگەن ەدى ەلباسى.
