بەتتەگى داقتاردى قالاي كەتىرۋگە بولادى؟

 استانا. قازاقپارات - الما سىركەسۋىنىڭ تەرىگە تيگىزەر پايداسىن جوققا شىعارۋعا بولمايدى.

ول تەرى مايىنىڭ ءبولىنۋىن قالىپتا ۇستايدى، باكتەرياعا قارسى كۇشكە يە، سونداي-اق تەرىنى اعارتىپ، جۇمسارتادى.

ونىڭ قۇرامىندا ءولى كلەتكالاردى جويىپ، تەرىنى قايتا قالپىنا كەلتىرەتىن الفا-گيدروكسيلدى قىشقىل بار. سوندىقتان دا كوپتەگەن قىمبات كوسمەتيكالىق قۇرالداردىڭ قوسپاسىندا وسى كومپونەنت كەزدەسەدى. ال الما سىركە سۋىندا ول الدەقايدا كوپ مولشەردە بولادى.

الما سىركە سۋىن قاراپايىم سۋمەن 1:3 قاتىناستا (1 قاسىق سىركە سۋىنا 3 قاسىق قاراپايىم سۋ) ارالاستىرىپ قولدانادى. ەكەۋىن ارالاستىرعان سوڭ وعان ماقتانى باتىرىپ، جۋىنار الدىندا بەتىڭىزدى ءسۇرتىڭىز.

ال بەتىڭىزدە جاستىڭ ۇلعايۋىنان پايدا بولعان پيگمەنتتى داقتار بولسا، سۋ مەن الما سىركە سۋىنىڭ قوسپاسىنا ماقتانى باتىرىپ الىپ، داقتاردىڭ ۇستىنە 20-30 مينۋت ۇستاڭىز.

ەسىڭىزدە بولسىن، دۇكەن سورەلەرىنەن المانىڭ حوش يىسىمەن اسپازدىققا ارنالعان سىركە سۋلارىن كەزدەستىرۋگە بولادى. دەگەنمەن، ۇيدە ءوزىڭىز اشىتقان تابيعي ءونىم عانا شىن مانىسىندە پايدالى بولماق.

الما سىركە سۋىن ۇيدە جاساۋدىڭ بىرنەشە ءتۇرى بار. سولاردىڭ بىرەۋىنىڭ جاسالۋ جولى تومەندەگىدەي.

الما سىركە سۋىن ۇيدە جاساۋ جولى

ەش قوسپاسىز، ءوز باقشاڭىزدا وسكەن المانىڭ شىرىنىن اعاش (ەڭ دۇرىسى)، اينەك نەمەسە سىرلى ىدىسقا قۇيىپ، بەتىن پوليەتيلەن قاپپەن جان- جاعىن جاپسىرا جاۋىپ، ۇستىڭگى جاعىنان بىرنەشە جەردەن ينەنىڭ ۇشىمەن تەسۋ كەرەك. ۇساق شىبىندار كىرمەيتىندەي، تەسىكتەردىڭ وتە كىشكەنە بولعانى ءجون.

ودان كەيىن ىدىستى جىلى (16-20 گرادۋستان جوعارى) جەرگە قويىڭىز. ىستىق جەردە فەرمەنتاتسيا پروتسەسسى جەدەل جۇرەدى. ال ونى ودان ارى جىلدامداتۋ ءۇشىن شىرىنعا شاراپ اشىتقىسىن نەمەسە 1 شىمشىم اشىتقى (نان اشىتاتىن، قاراپايىم) قوسۋعا بولادى. دەسە دە، ەشقانداي قوسپاسىز دا الما شىرىنى سىركە سۋىنا اينالادى. تەك ول ءۇشىن 9-12 اپتاداي ۋاقىت كەرەك بولادى.

ەگەر اشۋ پروتسەسسى ءبىر اپتادا باستالماسا، وعان قانت پەن اشىتقى قوسىڭىز. كوپ ۇزاماي، شىرىن اشىپ، سىركە سۋىنا اينالادى. بەتىنە جينالعان سىركە سۋىنىڭ «قايماعى» ىدىستىڭ تۇبىنە قاراي تۇسكەنى - سىركە سۋىنىڭ دايىن بولعانى. سىركە سۋىنىڭ بەتىندە ول «قايماق» پايدا بولماعان جاعدايدا ونىڭ ءدامىن تاتا وتىرىپ، وزىڭىزگە قاجەتتى قىشقىلتىم بولعان كەزدە كەرەگىڭىزگە جاراتا بەرۋگە بولادى.