دۇرىس تاماقتانباساڭ نە بولادى؟
زياندى تاعامداردىڭ زالالى بىردەن بايقالماسا دا، ۋاقىت وتە كەلە مىندەتتى تۇردە ءوزى جايلى سىر بەرە باستايدى. دۇرىس تاماقتانباۋ كوپتەگەن اۋرۋلاردىڭ تۋۋىنا ىقپال ەتەدى.
دۇرىس تاماقتانباۋ دەگەنىمىز نە؟
دۇرىس تاماقتانباۋ تۇسىنىگىنىڭ اياسى كەڭ. بۇعان شامادان تىس تاماقتانۋ، زياندى تاعامداردى ءجيى تۇتىنۋ، قاتاڭ ديەتالار، اشتىق جانە ت. ب. كىرەدى. ءسىز دۇرىس تاماقتانباي ءجۇرسىز، ەگەر:
- قارنىڭىز اشپاسا دا تاماق جەيسىز؛
- كوپ مولشەردە قانت جانە قۇرامىندا رافينادتالعان قانتى كوپ ونىمدەردى ءجيى تۇتىناسىز؛
- قوسىمشا ونىمدەرى بار تاعامداردى ءجيى تۇتىناسىز؛
- تاماق جەۋ مادەنيەتىن ساقتامايسىز: داستارقان ۇستىندە ەمەس، تەلەديدار نەمەسە كومپيۋتەر الدىندا تاماقتاناسىز؛
- تىم كوپ نەمەسە تىم از تاماق جەيسىز؛
- ءجۇرىپ بارا جاتىپ تاماق جەيسىز؛
- راتسيونىڭىزعا جەمىستەر مەن كوكونىستەردى قوسپايسىز؛
- تۇراقتى ازىقتانۋ ءتارتىبى جوق بولعاندىقتان كەيدە تۇندە دە تاماق جەيسىز؛
- ديەتاعا ءجيى وتىراسىز.
دۇرىس تاماقتانباۋدىڭ زيانى
اتالعان ءار پۋنكت دەنساۋلىققا وراسان زور زيان تيگىزىپ، سالدارى جاعىمسىز بولۋى مۇمكىن. ال ىشەك- قارىن جولدارى اۋىراتىن ادامدار ءۇشىن، بالالار مەن جۇكتى ايەلدەرگە بۇلاي تاماقتانۋ ءتىپتى جارامايدى. ادام اعزاسى جەتكىلىكتى تۇردە ءنارلى زاتتاردى الۋ ءۇشىن قارنىڭىز قاتتى اشقان كەزدە ەمەس، ازداپ اشقان كەزدە تاماقتانۋ كەرەك. ەگەر ءسىز سترەسستەن تاماق جەيتىن بولساڭىز نەمەسە ءتاتتى بولعانى ءۇشىن، ادەت بويىنشا تاماق جەي بەرسەڭىز، ىشتە اۋىرلىق پايدا بولىپ، اسقازاندا تىم كوپ اسقازان قىشقىلى قۇرىلادى، بۇل گاستريت نەمەسە جاراعا اكەپ سوعادى.
شامادان تىس قانت تۇتىنۋ ۇيقى بەزىنە سالماق تۇسىرەدى، بۇدان ول كوپ مولشەردە ينسۋلين بولە باستايدى. ناتيجەسىندە بۇل پروتسەسس بۇزىلىپ، قانت ديابەتى بەلەڭ الادى.
سونىمەن قاتار تىم كوپ مولشەردە ءتاتتى تۇتىنۋ سەمىزدىك پەن كاريەسكە ۇرىندىرادى.
كوپ مولشەردەگى اشى تاعامدار اعزاداعى سۇيىقتىقتى بوگەپ، نەسەپ تاس اۋرۋى مەن جۇرەك- تامىر جۇيەسى اۋرۋلارىن تۋدىرادى.
قوسىمشا ونىمدەر كوپتەگەن تاعامداردىڭ قۇرامىندا بولادى. ولاردىڭ كەيبىرەۋىنىڭ ەش زيانى جوق، ال كەيبىرى اللەرگيا تۋدىرىپ، اسقازان مەن ىشەك اۋرۋلارىنىڭ تۋۋىنا سەپ بولادى.
قوسىمشا ءونىمدى تاعامداردىڭ مولشەرىن ازايتۋ ءۇشىن وراماداعى ءتۇرلى ونىمدەردى، چيپستەر، گازدالعان ءتاتتى سۋسىن، شۇجىق، دۇكەن بالىشتەرىن ازىراق ساتىپ الىڭىز.
ەگەر تەلەديدار الدىندا، گازەت وقىپ وتىرىپ نەمەسە ينتەرنەتتەن جاڭالىق وقىپ وتىرىپ تاماق جەسە اسقازان ءسولى دۇرىس بولىنبەيدى. بۇل دا ءوز كەزەگىندە اسقازان ماسەلەلەرىن تۋدىرادى. ءجۇرىپ بارا جاتىپ تا تاماق جەۋ قۇپتالمايدى، ويتكەنى قيمىل- قوزعالىس كەزىندە تاعام دۇرىس شاينالماي، ناتيجەسىندە تاعام دۇرىس قورىتىلمايدى دا اعزاعا تاعامنىڭ پايدالى زاتتارى سىڭبەيدى.
ەگەر قاتاڭ ديەتالار ۇستانىپ، از تاماق جەسە، اعزاعا دارۋمەندەر جەتىسپەيتىن بولادى. ال بۇل جالپى دەنساۋلىق ءۇشىن وتە ماڭىزدى.
جەمىستەر مەن كوكونىستەر ادام راتسيونىندا ەلەۋلى ورىن الۋى كەرەك. بۇل اۆيتامينوز، ىشەك ميكروفلوراسىنىڭ بۇزىلۋىنىڭ الدىن الادى.
ەگەر ادامنىڭ تۇراقتى تاماق ءىشۋ رەجيمى بولماسا، اعزا اسقازان ءسولىن قاشان ءبولۋى كەرەكتىگىن بىلمەي، ءاردايىم اۋىر كۇيدە بولادى، بۇل دا اسقازان مەن ىشەك اۋرۋلارىنىڭ تۋۋىنا اسەر ەتەدى. تۇندە تاماق جەۋ قۇپتالمايدى، ويتكەنى اس قورىتۋ جۇيەسىنە دەمالىس قاجەت.
