نىعماتۋلين قىتاي ەلشىسىمەن ەكىجاقتى قارىم-قاتىناستى تالقىلادى

 استانا. قازاقپارات - پارلامەنت ءماجىلىسىنىڭ ءتوراعاسى نۇرلان نىعماتۋلين قىتايدىڭ قازاقستانداعى توتەنشە جانە وكىلەتتى ەلشىسى سياو چجانمەن كەزدەسىپ، ەكى ەل قارىم-قاتىناسىنىڭ دامۋ بارىسى تۋرالى اڭگىمەلەستى.

پارلامەنت ءماجىلىسى باسپا ءسوز قىزمەتىنىڭ حابارلاۋىنشا، نىعماتۋلين قازاقستان مەن قىتايدىڭ ەكىجاقتى ءوزارا قارىم-قاتىناسى قازىر ستراتەگيالىق ارىپتەستىك دەڭگەيىنە شىققانىن ايتقان. نىعماتۋلين سونىمەن قاتار قازاقستانداعى «نۇرلى جول» باعدارلاماسىنىڭ قىتايدىڭ «ءبىر بەلدەۋ، ءبىر جول» جوباسىمەن تۇيىندەستىرۋ ناتيجەسىندە قورعاس بەكەتىنىڭ، اقتاۋ پورتىنىڭ، قازاقستان-تۇركىمەنستان-يران جاڭا تەمىرجول جەلىسىنىڭ جانە باتىس ەۋروپا - باتىس قىتاي حالىقارالىق جولىنىڭ اشىلعانىن ايتقان.

ەلشى سياو چجان 2019-جىلدىڭ ەكىجاقتى ستراتەگيالىق ارىپتەستىكتى ودان ارى نىعايتۋدا ماڭىزدى بولاتىنىن ايتقان. ديپلوماتتىڭ سوزىنشە، قازىر «نۇرلى جول» باعدارلاماسى مەن «ءبىر بەلدەۋ، ءبىر جول» جوباسى اياسىندا 55 ءىرى ينۆەستيتسيالىق يندۋستريالدىق جوبا ىسكە اسىرىلىپ جاتىر، ال بيىل بىرنەشە جاڭا جوبا ىسكە قوسىلماق.

ءماجىلىس باسپا ءسوز قىزمەتى تاراتقان اقپاراتتا نىعماتۋلين مەن سياو چجاننىڭ كەزدەسۋدە تۋىستارى قىتايدان قازاقستانعا شىعا الماي وتىر دەگەن ەتنيكالىق قازاقتاردىڭ جاعدايىن تالقىلاعانى، ءيا تالقىلاماعانى ايتىلمايدى.

«ازاتتىق»