ۇرىمجىدە قازاقستاندىق ونەرپازداردىڭ كونسەرتى ءوتتى

ءۇرىمجى. قازاقپارات - 28- جەلتوقسان كۇنى ۇكىلى ىبىراي اتىنداعى اقمولا وبلىستىق فيلارمونياسىنىڭ «ايناكول» فولكلورلىق ءانسامبلى مەن «گاككۋ» ءبي ءانسامبلى قىتايدىڭ شىڭجاڭ-ۇيعىر اۆتونوميالىق ولكەسىنىڭ ءۇرىمجى قالاسىندا كونسەرت وتكىزدى.

ونەر كەشى استانانىڭ 20 جىلدىعى مەن «ءبىر بەلدەۋ، ءبىر جول» باستاماسىنىڭ بەس جىلدىعىنا ارنالدى، دەپ حابارلايدى قازاقپاراتتىڭ مەنشىكتى ءتىلشىسى.

ءىس-شارانى قازاقستاننىڭ قىتاي حالىق رەسپۋبليكاسىنداعى ەلشىلىگى مەن ق ر مادەنيەت جانە سپورت ءمينيسترى ۇيىمداستىردى. قولداۋ كورسەتكەن - ق ح ر ش ۇ ا و سىرتقى ىستەر، مادەنيەت جانە تۋريزم باسقارماسى.

وعان شىڭجاڭنىڭ مەملەكەتتىك ورگان وكىلدەرى مەن قوعام قايراتكەرلەرى، سونداي-اق قازاقستاندىق ستۋدەنتتەر قاتىستى. كونسەرتتە كەڭەس دۇيسەكەيەۆتىڭ «ايناكول» ءانى، حالىق ءانى «احاۋ كەرىم» شىرقالىپ، داۋلەتكەرەيدىڭ «كوروعلى»، ىقىلاستىڭ «جەزكيىك»، قۇرمانعازىنىڭ «بالبىراۋىن» كۇيلەرى ورىندالدى.

«گاككۋ» ءانسامبلىنىڭ مىڭ بۇرالعان بيشىلەرى «سىيلىق»، «كەربەز قىز» بيلەرىن بيلەدى.