وكىل اتا-انانىڭ مىندەتىن بىلەسىز بە؟
وكىل اتا-انانى كىم، قانداي جاعدايدا تاڭدايدى؟ وسى سەكىلدى سۇراقتاردىڭ جاۋابىن ىزدەپ كورگەن ەدىك.
دۇنيە ەسىگىن اشقان كەز كەلگەن ءسابيدىڭ وكىل اتا-اناسى بار. ول زامان تالابى سياقتى. بۇرىنعى كەزدە «كىندىك شەشە» دەگەن قادىر- قاسيەتى جوعارى، جاۋاپكەرشىلىكتى ارقالاعان كىسى بولسا، بۇگىندە ولاردىڭ ورنىن وكىل اتا-انا باسقانداي. وكىل اتا-انا كوبىنەسە جاقىن دوستار اراسىنان تاڭدالىنادى. كەيبىرەۋلەر ىرىمداپ قىزمەتتىك دارەجەسى جوعارى، ابىروي بيىگىنەن تۇسپەي جۇرگەن ەل ازاماتتارىن تاڭداسا، ەندى بىرەۋلەرى «بىزدەگى قۋانىش ولارعا دا جۇعىستى بولسىن، سابيگە دەگەن ساعىنىشىن ءبىزدىڭ پەرزەنتىمىزدى ماپەلەپ ماۋقىن باسسىن» دەگەن ويمەن پەرزەنت اڭساپ جۇرگەندەرگە قولقا سالادى. «شىن مانىندە وكىل اتا-انا دەگەن كىم؟»، «ولاردىڭ مىندەتتەرى مەن قىزمەتتەرى قانداي؟»، «وكىل اتا-انانى كىم جانە قانداي جاعدايدا تاڭدايدى؟» دەگەن سەكىلدى سۇراقتاردىڭ جاۋابىن ىزدەپ كورگەن ەدىك.
جالپى، وكىل اتا-انا ءسابيدىڭ تۋعان اتا-اناسىنىڭ كەلىسىمىمەن، قالاۋىمەن تاڭدالاتىن جان. جالپى قازاق جەتىمىن جىلاتىپ، قاڭعىرتىپ، تاستاپ كەتۋدەن الىس بولعان حالىق. تاعدىردىڭ جازۋىمەن اتا-اناسىنان ەرتە ايىرىلىپ، جەتىم قالعان بالانى اتا-اناسىنىڭ تۋىسقاندارى نەمەسە دوس- جاراندارىنىڭ ءبىرى وكىلدىك جاساپ، قامقورلىعىنا العان. مىنە، وسى كىسىگە بالانىڭ وكىل اكەسى دەگەن اتاۋ بەرىلگەن.
ول بالاعا وكىل بولعانىمەن، ءوز اتا-اناسىنداي قامقور قورعاۋشى، مەيىرىم شاپاعاتقا بولەۋشى، باۋىرىنا باسىپ، مەيىرىم كورسەتۋشى بولعان. ونى ءوز پەرزەنتتەرىنەن كەم كورمەي، باعىپ- قاعىپ، قارنىن توق، كيىمىن بۇتىندەپ جەتىلدىرگەن. جاعدايى كەلسە جوعارى وقۋ ورنىنا ءتۇسىرىپ، ديپلوم الىپ بەرگەن. قىزمەتكە ورنالاستىرىپ، وكىل اكەلىك مىندەتىن ءمىنسىز اتقارعان. وسى ءداستۇردى بۇگىنگى كەزدە قيماس دوستار جالعاپ كەلە جاتقانى قۋانتادى. ەكى دوستىڭ بالالارى تەڭ ءوسىپ، ءبىر ءۇيدىڭ بالالارىنداي باۋىر باسادى.
باۋىرمالدىلىق ارتىپ، كوكجيەكتەرى كەڭەيەدى. قيىن جاعدايدا دا، قىزىقشىلىقتا دا ءبىر- ءبىرىنىڭ جانىنان تابىلىپ، دەمەۋ بولادى. پەرزەنتىنىڭ دۇنيەگە كەلۋىنىڭ قۇرمەتىنە داستارقان جايىپ، اتا-انالارىن، ەت- جاقىندارىن، تۋىس- باۋىرلارىن، دوس- جاراندارىن شاقىرىپ، اس بەرەدى. وسى قۋانىشتى كەشتە وتباسى مۇشەلەرى ءوز پەرزەنتتەرىنە نيەتتەنىپ، جاقىندارىنىڭ اراسىنان وكىل اتا-انا تاڭدايدى.
وكىل اتا-انا مارتەبەسىن ارقالاعان وتباسىلاردىڭ مىندەتتەرى ەسەلەنەدى. وكىلدىككە العان ۇل نەمەسە قىزى ءۇشىن وتقا دا، سۋعا دا ءتۇسىپ، قامقورلىق جاسايدى. ورتاق پەرزەنتتەرىنىڭ وسكەنىنە قۋانىپ، شالىس كەتسە، دەمەپ، قولداۋ كورسەتەدى. وكىل اتا-انا اتالعان كۇننەن باستاپ بالا ەڭبەكتەگەندە، ءتاي-ءتاي باسىپ بالاباقشاعا بارعاندا، العاش مەكتەپ تابالدىرىعىن اتتاعاندا، جوعارى وقۋ ورنىنا ءتۇسىپ، ديپلوم العان كەز كەلگەن قۋانىشتى ءساتتى ءمۇلت جىبەرمەيدى. تەك قانا قامقورلىق كورسەتىپ، مەيىرىمىنە بولەگەننەن باسقا، قارجىلاي دا قولداۋ جاساپ وتىرادى. سىيلىق اپەرىپ قۋانتادى. رەتى كەلسە كەيبىر قۋانىشتارىنا توي جاساپ بەرەدى. كەي وكىل اتا-انالار قىزدى ۇزاتۋدى ءوز مىندەتتەرىنە السا، ەندى ءبىرى قىزدىڭ بارلىق جاساۋىن دايىندايدى. بۇل ءبىر جاعىنان قاراساڭ، ايتارلىقتاي كومەك.
اتا-اناسى وكىل اتا-انانىڭ قۇرمەتى جايلى جاس وسكىننىڭ ساناسىنا ءسىڭىرىپ وتىرادى. ول وكىل اتا-اناسىن ءوز اتا-اناسىنان كەم كورمەۋى ءتيىس. ولارعا دەگەن قۇرمەتى مەن ىزەتى تەڭ بولۋى كەرەك. كەيبىر قىزدار بويجەتە باستاعاندا ءوز اناسىنا ايتۋعا ۇيالاتىن قۇپيالارىن وكىل اناسىمەن بولىسەدى. قۇربىلارىمەن اراسىنداعى كەلىسپەۋشىلىكتەر مەن تۇسىنىسپەۋشىلىك كەزىندە كەڭەس الادى.
ال جىگىتتەر جاعى دا اكەسىنە ايتا الماعان ارمانىن وكىل اكەسى ارقىلى جەتكىزىپ وتىرادى. جالپى العاندا وكىل اتا-انانىڭ بولعانى تۋعان اتا-انا ءۇشىن دە، ۇل- قىز ءۇشىن دە وتە قاجەت. «وكىل اتا-انا» - وسكەلەڭ ۇرپاقتىڭ ءبىر- بىرىنە باۋىرمالدىلىعىن، مەيىرىمدىلىگىن، جاناشىرلىعىن وياتىپ، جاۋاپكەرشىلىكتى ارتتىراتىن كەرەمەت اتاۋ ءارى ۇلگى تۇتارلىق دۇنيە. ءاربىر ءسابيدىڭ قيىن كەزدە جانۇشىرا جۇگىرىپ كەلەتىن، قۋانىشىندا جۇرەگى جارىلارداي قۋاناتىن ادال وكىل اتا-اناسى بولعاي!
