قوجاناسىردىڭ تۇرىك تىلىندەگى حيكايالارى قازاقشاعا اۋدارىلدى

 استانا. قازاقپارات - كەشە ق ر ۇلتتىق اكادەميالىق كىتاپحاناسىندا تۇرىك اقىنى ماحمۋت كايانىڭ قازاق تىلىنە اۋدارىلعان «قوجاناسىر جىرلايدى» كىتابىنىڭ تانىستىرىلىمى ءوتتى.

كىتاپتى قازاقشا بەلگىلى اقىن، اۋدارماشى، فيلولوگيا عىلىمدارىنىڭ كانديداتى مارجان ەرشۋ سويلەتتى.

كىتاپحانانىڭ عىلىمي حاتشىسى تورەگەلدى تۇياقباي جۇرگىزگەن تانىستىرىلىمعا تۇرىك جازۋشىسى زافەر كيبار، فيلولوگ عالىم شەرۋباي قۇرمانباي ۇلى، قالامگەر، قونايەۆتانۋشى وراز قاۋعاباي، تۇركىتانۋشى عالىم يشتۆان قوڭىر ماندوكيدىڭ جارى وڭايشا ماقسۇم قىزى، گارۆارد ۋنيۆەرسيتەتى كەننەدي باسقارۋ مەكتەبىنىڭ تۇلەگى شىڭعىس مۇقان، مادەنيەت جانە سپورت مينيسترلىگى مەن استانا اكىمدىگىنىڭ، «Foliant» باسپاسىنىڭ وكىلدەرى قاتىستى.

تۇرىك تىلىندە وتكەن جىلى عانا جارىق كورگەن «قوجاناسىر جىرلايدى» كىتابىن قازاق تىلىندە شىعارۋ قۇقىعىن «Foliant» باسپاسى يەلەندى.

بۇدان بۇرىن مارجان ەرشۋ اتالمىش باسپانىڭ تاپسىرىسىمەن نوبەل سىيلىعىنىڭ لاۋرەاتى ورحان پامۋكتىڭ «سەزىم مۋزەيى» رومانىن اۋدارعان ەدى. بۇل جولى دا قوجاناسىر حيكايالارىن جىر تىلىمەن ءتارجىمالاۋ ونىڭ ەنشىسىنە بۇيىردى.

«قوجاناسىر دەگەندە ءازىل ايتسا دا، ورنىمەن ايتاتىن، كۇلدىرىپ وتىرىپ ويلاندىراتىن ءازىلقوي، اپەندى، ارتىنان ءزىل تاستاماي، تەك جاقسىلىقتى عانا ەرتىپ جۇرەتىن جاقسى ادامنىڭ بەينەسى كوز الدىمىزعا كەلەدى. قوجاناسىر حيكايالارى تۇركى ەلدەرىنىڭ بارىنە ورتاق. قازاق، قىرعىز، تۇرىك، وزبەك، تۇركىمەن، تاجىك، پارسى، تاتار، باشقۇرت، قاراقالپاق، ۇيعىر، باشقۇرت، اراب، كۇرد، گرەك، حاكاس، اۆار، شەشەن، يران، وسەتين جانە ت. ب. حالىقتار اراسىندا قوجاناسىردىڭ استارلى، ءپالساپاعا تولى ءازىل-قالجىڭدارى كەڭىنەن تاراعان.

وسىدان 10 شاقتى جىل بۇرىن قوجاناسىردىڭ 600 جىلدىعىن دۇنيەجۇزى اتاپ ءوتتى. قوجاناسىردىڭ شىعۋ تەگى، ءومىر سۇرگەن ءداۋىرى، تۋعان-ولگەن جىلى تۋرالى ءارتۇرلى دەرەكتەر ايتىلادى.

وسى كىتاپتا ماحمۋت كايا ونىڭ سەلجۇكتەر زامانىندا ءومىر ءسۇرىپ، اقشەھير قالاسىندا تۇرعانىن، سول قالادا ونىڭ مولاسى بارى جايلى دەرەكتەردى الدىمىزعا تارتادى. «بۇگىنگى زامانىمىزدىڭ وقىرماندارىنا، اسىرەسە جاستارعا قوجا ناسرەدديننىڭ حيكايالارىن قارا ءسوز تۇرىندە ەمەس، جىر تىلىندە بايانداسام، جۇرەكتەرىنە جەتەر دەپ ويلادىم» دەگەن ەدى ماحمۋت كايا ءوزىنىڭ كىتاپتى جازۋداعى ماقساتى جونىندە. ماحمۋت كايا تۇڭعىش رەت جىر تىلىندە سويلەتكەن قوجاناسىر حيكايالارى ەندى مەنىڭ اۋدارمام ارقىلى وقىرمانعا قانات قاعىپ وتىر» دەيدى م. ەرشۋ.

سۋرەتشى ەرسان پەرچەمنىڭ سۋرەتتەرىمەن ادەمى بولىپ شىققان بۇل كىتاپتىڭ ەرەكشەلىگى دە سول، قوجاناسىردىڭ حيكايالارى العاش رەت ولەڭ تۇرىندە جاريالانىپ وتىر.

ولەڭدەر قىسقا دا نۇسقا، جەڭىل تىلمەن بەرىلگەن. تانىستىرىلىمعا قاتىسۋشىلار اۋدارما جايلى جىلى پىكىرلەرىن جەتكىزدى. زافەر كيبار تۇركيادا قوجاناسىردى قوجا ناسرەددين اتايتىنىن، ول ءوز داۋىرىندە يمام بولعانىن، ماحمۋت كايا اقىن عانا ەمەس، ۇلكەن عالىم ەكەنىن قوسا كەتتى. جيىن سوڭىندا مارجان ەرشۋعا مادەنيەت جانە سپورت ءمينيسترى ارىستانبەك مۇحامەدي ۇلىنىڭ العىس حاتى تاپسىرىلدى.

 

دەرەككوز: astana-akshamy.kz