ورتالىق ازيانىڭ ءبىرىڭعاي ۆيزاسى كەلەسى جىلى ىسكە قوسىلادى
بۇل تۋرالى تىلشىلەرمەن كەزدەسۋ بارىسىندا وزبەكستان رەسپۋبليكاسى مەملەكەتتىك تۋريزم كوميتەتى ءتوراعاسىنىڭ ءبىرىنشى ورىنباسارىنىڭ مىندەتىن اتقارۋشى ۇلىقبەك قاسىمقوجايەۆ ءمالىم ەتتى، دەپ حابارلايدى «قازاقپارات» ح ا ا- نىڭ مەنشىكتى ءتىلشىسى.
ونىڭ ايتۋىنشا، ۆيزا ورتالىق ازيا ايماعىنا شەتەلدىك تۋريستەردى بىرلەسىپ تارتۋ جانە بۇل مارشرۋتتى ايگىلەۋ ءۇشىن ەنگىزىلىپ وتىر. الدىن الا بولجامعا سايكەس، «Silk visa» ءوز جۇمىسىن الداعى جىلدىڭ اقپان ايىندا باستايدى.
«ءبىزدىڭ باعالاۋىمىزشا، بۇل قىزمەت 2019-جىلدىڭ اقپانىندا ىسكە قوسىلادى. «Silk visa» جوباسى ەكى ەلدىڭ ۆەدومستۆولارىندا كەلىسىلگەن. ەندى ونىڭ تەحنيكالىق تۇسىن جانە جابدىقتارىن كەلىسۋ ماسەلەلەرى قالىپ وتىر»، - دەدى ۇ. قاسىمقوجايەۆ.
ول سونداي-اق بىرلەسكەن ۆيزاعا قىرعىزستان مەن تاجىكستان قىزىعۋشىلىق تانىتىپ وتىرعانىن اتاپ ءوتتى. بۇل رەتتە، قازاقستاندىق تاراپ بۇل جوباعا ازەربايجان مەن تۇركيا ەلدەرىن تارتپاق.
ەسكە سالا كەتەيىك، بيىلعى جىلدىڭ ماۋسىم ايىندا ق ر سەناتىنىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا ورتالىق ازيانىڭ ءبىرىڭعاي ۆيزاسىن ەنگىزۋدى ۇسىندى.
