باكۋدە «الاش وردا» تۋرالى ازەربايجان تىلىندەگى كىتاپتىڭ تۇساۋى كەسىلدى

باكۋ. قازاقپارات - ازەربايجانداعى قازاقستاننىڭ ەلشىلىگىندە ازەربايجان تىلىندەگى «الاش وردا: قازاق مەملەكەتتىلىگىنىڭ قۇرىلىمىنداعى ماڭىزى مەن تاريحى» اتتى كىتاپ تانىستىرىلدى، دەپ حابارلايدى قازاقپارات ءتىلشىسى.

مەملەكەت باسشىسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا قازاقستان ەلشىلىگى ازەربايجان تىلىندەگى كىتاپتار سەرياسىن جارىققا شىعارىپ جاتىر. ول كىتاپتار قازاق مەملەكەتتىلىگىنىڭ قۇرىلۋىنا، تاريحي تۇلعالار مەن عىلىم وكىلدەرىنە ارنالعان. سول كىتاپتاردىڭ ءبىرى - «الاش وردا» تاريحىنا ارنالىپ وتىر.

قازاقستان پرەزيدەنتىنىڭ «ۇلى دالانىڭ جەتى قىرى» ماقالاسىنداعى باستامالارىن جۇزەگە اسىرۋ ماقساتىندا ازەربايجاندىق وقىرمانعا وسى ەلدىڭ اقىنى ءارى دراماتۋرگى گۋسەين دجاۆيدتىڭ قازاق تىلىندەگى جيناعى جول تارتتى. كىتاپتى ازەربايجان رەسپۋبليكاسىنىڭ ۇلتتىق اكادەمياسى جانە ق ر ەلشىلىگىنىڭ كومەگىمەن ءال-فارابي اتىنداعى قاز ۇ ۋ دايىنداعان.

كىتاپتىڭ تانىستىرىلۋ شاراسىنا ءال-فارابي اتىنداعى قاز ۇ ۋ رەكتورى عالىمقايىر مۇتانوۆ، ءا ر پرەزيدەنت اكىمشىلىگىنىڭ وكىلدەرى، ءا ر ۇلتتىق عىلىم اكادەمياسىنىڭ ۆيتسە-پرەزيدەنتى يسا گابيبەيلي، ءار ۇلتتىق عىلىم اكادەمياسىنىڭ جەتەكشى قۇرامى، ازەربايجاندىق ج و و- لاردىڭ ستۋدەنتتەرى مەن پروفەسسورلىق-تالىمگەرلىك قۇرامى قاتىستى.

ازەربايجانداعى قازاقستاننىڭ ەلشىسى بەيبىت يسابايەۆ جينالعان جۇرتشىلىققا كىتاپتىڭ مازمۇنى تۋرالى ايتا كەلە «الاش» پارتياسىنىڭ ءوز نيەتتەستەرىن تارتا بىلگەنىن، زيالىلار قازاق حالقىنىڭ مۇددەسى ءۇشىن قاتەرگە قارسى تۇرعانىن، الاش زيالىلارىنىڭ ۇلتتىق مەملەكەتتىلىكتى قالىپتاستىرۋدا زور ەڭبەك سىڭىرگەنىن اتاپ ءوتتى. الاشتىڭ باعدارلامالىق ماقساتتارى - ەركىن ءارى تاۋەلسىز مەملەكەت قۇرۋ تۋراسىنداعى قازاق حالقىنىڭ باياعىدان بەرگى ارمانىمەن ۇشتاسقانى ايقىن.

«ەلباسى ن. ءا. نازاربايەۆ «ۇلى دالانىڭ جەتى قىرى» اتتى ماقالاسىندا «ۇلى دالانىڭ ۇلى ەسىمدەرى» اتتى ەنتسيكلوپەديالىق پاركتىڭ قۇرىلۋىنا باستاماشىلىق ەتكەن بولاتىن. وندا كورنەكتى تاريحي تۇلعالاردىڭ قۇرمەتىنە اشىق اسپان استىندا مۇسىندىك ەسكەرتكىشتەر قويىلىپ، ولاردىڭ جەتىستىكتەرى جازىلاتىن بولادى. الاش وردا زيالىلارى دا وسى ساياباقتا لايىقتى ورىن الاتىنىنا سەنىمدىمىن»، - دەدى ب. يسابايەۆ.

قازاقستاندا 2017-جىلى الاش پارتياسىنىڭ قۇرىلۋىنىڭ 100 جىلدىعى مەن ازەربايجان دەموكراتيالىق رەسپۋبليكاسىنىڭ قۇرىلۋىنا 100 جىل تولۋىن سالىستىرا كەلە قازاقستان ەلشىسى وسى تاريحي كەزەڭدەر ەكى ەلدىڭ مەملەكەتتىلىگىنىڭ تاريحىندا ەرەكشە ورىن الاتىنىن ايتىپ ءوتتى.

سونىمەن بىرگە، ەلشى گۋسەينا ءدجاۆيدتىڭ كىتابى جايلى ءسوز قوزعاپ، اتالمىش كىتاپ لاتىن قارپىندە - قازاق تىلىندە شىققان العاشقى كىتاپتاردىڭ ءبىرى ەكەنىن اتاپ ءوتتى.

ءال-فارابي اتىنداعى قاز ۇ ۋ رەكتورى عالىمقايىر مۇتانوۆ 2018-جىل - بۇكىل تۇركى الەمى ءۇشىن ايرىقشا بولعانىن ايتىپ ءوتتى.

«ءبىزدى كوپ قۇندىلىق بىرىكتىرىپ وتىر. ەڭ الدىمەن، ول قۇندىلىقتار - تاريح، مادەنيەت، ءتىل. تۋىستاس حالىقتاردىڭ تاريحىن جانە مادەنيەتىن زەرتتەي وتىرىپ، ءبىز ورتاق تاريحىمىز بەن مادەنيەتىمىزدى قالپىنا كەلتىرىپ، حالقىمىزبەن تانىستىرۋ جولدارىن تابامىز. سونىمەن قاتار، قازاق جانە ازەربايجان حالقىنىڭ مادەنيەتى مەن تاريحىن بولەك قاراستىرۋ دۇرىس بولماس ەدى. قازىرگى ۋاقىتتا قازاقستان پرەزيدەنتىنىڭ باستاماسىمەن ەلىمىزدە «رۋحاني جاڭعىرۋ» باعدارلاماسى قابىلداندى. ونىڭ باستى ماقساتى - ۇلتتىڭ رۋحاني جاڭارۋى. وسى باعدارلامانى دامىتۋ باعىتىندا قازاقستان پرەزيدەنتى جاقىندا «ۇلى دالانىڭ جەتى قىرى» اتتى ماقالاسىن جاريالادى. بۇل باعدارلامالىق قۇجاتتار ءبىزدىڭ حالقىمىزدىڭ رۋحاني جاڭعىرۋىن كوزدەيدى. رۋحاني قايتا جاڭارۋسىز، تاۋەلسىز جانە قازىرگى زامانعى مەملەكەت قۇرۋ وڭاي ەمەس. ادامزات وركەنيەتىندەگى ءبىزدىڭ حالىقتارىمىزدىڭ تاريحى، ءرولى مەن ورنى تۋرالى زەرتتەۋلەر جۇرگىزۋدىڭ ناقتى مىندەتتەرى قويىلدى. قازاق حالقىنىڭ تاريحىن بۇكىل تۇركى الەمىنىڭ تاريحىنان ءبولىپ جارۋعا بولمايدى. ءبىز ەلىمىزدى بۇكىل تۇركى الەمىنىڭ ءبىر بولىگى دەپ سانايمىز»، - دەدى ع. مۇتانوۆ.

قوناقتار وسىنداي ماڭىزدى جوبالاردى جۇزەگە اسىرۋ - ەكى ەلدىڭ حالىقتارىنىڭ جاقىنداسۋىن جانە باۋىرلاس ەلدەر اراسىنداعى مادەني-گۋمانيتارلىق ىنتىماقتاستىقتى ودان ءارى نىعايتۋعا ىقپال ەتەتىنىن اتاپ ءوتتى.

بۇدان باسقا ءال-فارابي اتىنداعى قاز ۇ ۋ مەن ازەربايجاننىڭ ۇلتتىق عىلىم اكادەمياسى اراسىندا ىنتىماقتاستىق تۋرالى مەموراندۋمعا قول قويىلدى.