ەلباسى بەلارۋس قاۋىپسىزدىك كەڭەسىنىڭ مەملەكەتتىك حاتشىسىمەن كەزدەستى
كەزدەسۋ بارىسىندا نۇرسۇلتان نازاربايەۆ ۇجىمدىق قاۋىپسىزدىك شارتى ۇيىمىنىڭ باس حاتشىسى لاۋازىمىنا ستانيسلاۆ ءزاستى كانديدات رەتىندە قولدايتىنىن اتاپ ءوتتى.
«مەملەكەتتەر باسشىلارى سانكت- پەتەربۋرگتە الەكساندر گريگوريەۆيچ لۋكاشەنكونىڭ ۇسىنىسى بويىنشا ءسىزدىڭ كانديداتۋراڭىزدى قولداۋ جونىندە شەشىم قابىلدادى. ءسىز وسى ۇيىمعا مۇشە ەلدەردىڭ باسشىلارىمەن كەزدەسۋدى باستاپ كەتتىڭىز. بۇعان دەيىن بىشكەكتە بولدىڭىز. قازىر قىرعىز رەسپۋبليكاسى ۇجىمدىق قاۋىپسىزدىك شارتى ۇيىمىنا ءتوراعالىق ەتۋدە. سىزدەردىڭ كەزدەسۋلەرىڭىزدىڭ جاقسى وتكەنىنە سەنىمدىمىن» ، - دەدى قازاقستان پرەزيدەنتى.
نۇرسۇلتان نازاربايەۆ س. ءزاستىڭ وسى لاۋازىمدا قىزمەت ەتۋى ءۇشىن قاجەتتى ءبىلىمى مەن تاجىريبەسى بار ەكەنىنە توقتالدى.
«ءسىز - اسكەري ادامسىز جانە ءتيىستى ءبىلىمىڭىز بار. بەلارۋس رەسپۋبليكاسىنىڭ باس شتابىندا، قاۋىپسىزدىك كەڭەسىندە قىزمەت اتقاردىڭىز. ۇجىمدىق قاۋىپسىزدىك شارتى ۇيىمىنىڭ جۇمىسىمەن تانىسسىز، ءتۇرلى كەزدەسۋلەر مەن جيىندارعا قاتىستىڭىز. ءبىز ءسىزدى قولدايتىن بولامىز» ، - دەدى مەملەكەت باسشىسى.
سونداي- اق، اڭگىمەلەسۋ بارىسىندا قازاقستان پرەزيدەنتى ۇجىمدىق قاۋىپسىزدىك شارتى ۇيىمى جۇمىسىنىڭ تيىمدىلىگىن قامتاماسىز ەتۋدىڭ ماڭىزدى ەكەنىن ايتتى.