توڭعاقسىز با؟

استانا. قازاقپارات - اينالاڭىزداعىلار فۋتبولكامەن جۇرگەندە، ءسىز جەمپىر كيىپ الاسىز با؟ كەڭسەدەگى سىزگە تانىس شەشىلمەيتىن ماسەلەنىڭ ءبىرى - تەرەزەنى اشۋ نەمەسە جابۋ بولسا، ۋايىمداماڭىز، ءسىز جالعىز ەمەسسىز!

دەنە تەمپەراتۋراسى ءبىزدىڭ اعزالارىمىزدان، بۇلشىقەت پەن تەرىمىزدەن ميعا كەلەتىن بەلگىلەرگە بايلانىستى بولادى. ول قولايلى دەنە تەمپەراتۋراسىن ورناتۋ ءۇشىن العان اقپاراتتاردى بىرىكتىرەدى. سوندىقتان، ەگەر تەرى تەمپەراتۋراسى تومەندەي باستاسا، ءسىز اۆتوماتتى تۇردە توڭا باستايسىز. ورەگون ۋنيۆەرسيتەتىنىڭ پروفەسسورى كريستوفەر مينسون مي مەن دەنە قالاي بايلانىساتىنى جانە ءتۇرلى تەمپەراتۋراعا قالاي بەيىمدەلەتىندىگىن ءتۇسىنۋ ءۇشىن كوپجىلدىق زەرتتەۋ جۇرگىزگەن. ونىڭ ايتۋىنشا، ءسىزدىڭ «توڭۋ» دەڭگەيىڭىز دەنەنىڭ بۇلشىقەت ماسساسىمەن تىكەلەي بايلانىستى. بۇلشىقەت ماسساسى قانشالىقتى از (جيى وتە نازىك ايەلدەر مەن جاسى ۇلعايعان ادامداردا) بولسا، ادەتتە، سول ادام سونشالىقتى جىلدام توڭادى جانە قالىڭ كيىم كيىپ جۇرۋگە بەيىم بولادى.

سونىمەن قاتار، دەنە تەمپەراتۋراسى ورتاشادان تومەن بولۋى مىندەتتى ەمەس، توڭۋ سەبەبىڭىز - اعزا ءاردايىم جىلۋدى ۇستاپ تۇرۋ ءۇشىن قارقىندى جۇمىس ىستەۋگە ءماجبۇر. توڭعاقتىقپەن كۇرەسۋگە بولادى تابيعي جىلۋلىق سەزىمىن الداۋعا، ناقتىراق ايتساق، ۇيرەتۋگە بولادى. ءاردايىم توڭۋ سەزىمىنەن قۇتىلۋدىڭ ەڭ كەرەمەت ءادىسى - بۇلشىقەت ماسساسىن ارتتىرۋ. ول ءوز كەزەگىندە اعزانىڭ زات الماسۋىن ارتتىرادى. ارينە، بۇل بوديبيلدەرلەردىڭ دەڭگەيىنە جەتۋ كەرەك دەگەن ءسوز ەمەس. دەنەنى جاتتىقتىرۋ تەك توڭۋ سەزىمىنەن قۇتىلۋعا عانا ەمەس، جالپى دەنساۋلىققا جانە دەنە سىمباتتىلىعىنا پايدالى ەكەنىن ۇمىتپاڭىز.

توڭعاقتىقتان قۇتىلۋدىڭ تاعى ءبىر شەشىمى - سۋىقپەن دوستاسۋ. مىسالى، كونتراستتى دۋش قابىلداۋ. دوكتور مينسون 10-15 سەكۋندتان باستاۋدى ۇسىنادى، سودان سوڭ سۋىق ارالىقتى از- ازدان كوبەيتۋگە تىرىسۋ كەرەك. جەڭىل سۋىقتى سەزىنۋ قالىپتى بولىپ تابىلادى. ءبىراق، كەي جاعدايدا مەديتسينالىق تەكسەرىستەن وتكەن ءجون. مىسالى، ۇزدىكسىز شارشاۋ، موتيۆاتسيانىڭ تومەندىگى جانە سۋىقتى سەزۋ قالقانشا بەز ماسەلەسىنە قاتىستى بولۋى مۇمكىن.

Massaget.kz