ترامپ ىشكى ىسىمىزگە كيلىكپەسىن - فرانسيا سىرتقى ىستەر ءمينيسترى
«دونالد ترامپقا ءبىزدى جايىمىزعا قالدىرىڭىزشى دەپ ايتقىم كەلەدى. پرەزيدەنت تە وسىنى ايتادى» دەدى دريان فرانسۋز تەلەارنالارىنىڭ بىرىنە بەرگەن سۇحباتىندا. ول فرانسيادا ەشكىم ا ق ش- تىڭ ىشكى ساياساتىنا كوممەنتاري بەرمەيتىنىن ايتىپ، سەرىكتەس ەلدەردى مۇنداي ماسەلەدە ءبىر- ءبىرىن قۇرمەتتەۋگە شاقىردى.
وتكەن سەنبى كۇنى پاريجدە بيلىكتىڭ ەكونوميكالىق ساياساتىنا قارسى «سارعىلت جيلەتتى» دەمونسترانتتار پوليتسيامەن تاعى دا قاقتىعىسقان. فرانسيادا اكسيالار بارىسىندا 1700-دەن استام ادام ۇستالىپ، 100-دەن استامى جارالانعان.
بۇعان دەيىن بيلىك سەنبىدە تارتىپسىزدىكتەر بولۋى مۇمكىن ەكەنىن جانە ونداي ءىس- ارەكەتتەردى باسۋ ءۇشىن بارلىق شارالاردى قولداناتىندىعىن ەسكەرتىپ، قاۋىپسىزدىك شارالارىن كۇشەيتكەن. پاريج كوشەسىندە ءتارتىپتى قامتاماسىز ەتۋگە وسىعان دەيىنگىدەن الدەقايدا كوپ - 8 مىڭ پوليتسيا قىزمەتكەرى جۇمىلدىرىلعان. بۇكىل ەل كولەمىندە 89 مىڭ پوليتسيا وكىلى كەزەكشىلىك اتقارعان.
پاريجدە ەيفەل مۇناراسى، لۋۆر جانە وزگە مۇراجايلار مەن كوپشىلىك باراتىن ساۋدا ورىندارى ۋاقىتشا جابىلعان. پرەزيدەنت سارايىنا بارار جولداردا كۇزەت كۇشەيتىلىپ، پارلامەنت عيماراتىنىڭ قاسىنا بەرەندى تەحنيكا قويىلعان. ەلدىڭ بىرنەشە قالاسى مەن موناكودا ءوتۋى ءتيىس فۋتبول ويىندارى كەيىنگە قالعان.
ترامپ Twitter- دە فرانسياداعى جاعدايعا بىلدىرگەن كوممەنتاريىندە نارازىلىق شەرۋلەرىنە كليماتتىڭ وزگەرۋىمەن كۇرەس جونىندەگى پاريج كەلىسىمى سەبەپ بولۋى مۇمكىن ەكەنىن ايتقان. ونىڭ پىكىرىنشە، كەلىسىمدى ورىنداۋ سالىقتى كوبەيتۋگە اكەلىپ سوقتىرعان. «پاريج كەلىسىمى پاريجدىڭ وزىندە ىسكە اسپاي قالدى» دەگەن ترامپ نارازىلىق اكسيالارىنا قاتىسۋشىلار «ترامپتى قولدايمىز!» دەپ ۇرانداتقانىن ايتتى. ءبىراق نارازىلىق اكسياسىنا كۋا بولعاندار دەمونسترانتتاردىڭ بۇلاي ۇرانداعانىنا ءشۇبا كەلتىرەدى.
باسقا دا فرانسۋز ساياساتكەرلەرى ترامپتى سىنادى.
«سارعىلت جيلەتتىلەر» قوزعالىسى بيلىكتىڭ جانارماي سالىعىن قىمباتتاتۋىنا قارسىلىقتان باستالعان. كەيىن فرانسيا بيلىگى جانارماي سالىعىن وسىرۋگە موراتوري جاريالاعان، الايدا نارازىلار پرەزيدەنت ەممانۋەل ماكروننىڭ ەكونوميكالىق ساياساتىنا قارسىلىق اكسياسىن جالعاستىرا بەرەتىندەرىن مالىمدەگەن. بيلىك نارازىلىق اكسيالارىن قوزدىرىپ وتىر دەپ اسىرە وڭشىل جانە اسىرە سولشىل كۇشتەردى ايىپتايدى.
ا ق ش دونالد ترامپتىڭ ۇسىنىسىمەن الەمنىڭ تۇگەلگە جۋىق مەملەكەتى قول قويعان پاريج كەلىسىمىنەن شىعىپ كەتكەن. فرانسياداعى نارازىلىق اكسيالارىندا پاريج كەلىسىمىنىڭ وزىنە تىكەلەي قارسى ۇران ايتىلمايدى. الايدا، بيلىكتىڭ جانارماي سالىعىن كوتەرۋ نيەتى اۋاعا تارايتىن كومىرقىشقىل گازى كولەمىن ازايتۋ مىندەتتەمەسىمەن جاناما بايلانىسى بار بولۋى مۇمكىن.
www.azattyq.org