قازاقستان مەن حورۆاتيا ءوزارا ينۆەستورلارعا كەپىلدىك بەردى

استانا. قازاقپارات - پارلامەنت ءماجىلىسىنىڭ جالپى وتىرىسىندا «قازاقستان ۇكىمەتى مەن حورۆاتيا ۇكىمەتى اراسىنداعى تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كەلىسىمدى جانە وعان حاتتامانى راتيفيكاتسيالاۋ تۋرالى» زاڭ جوباسى ماقۇلداندى، دەپ حابارلايدى قازاقپارات.

كەلىسىم ەكونوميكالىق ىنتىماقتاستىق جانە دامۋ ۇيىمىنىڭ مودەلدىك تۇجىرىمداماسىنىڭ نەگىزىندە جاسالعان. وسىنداي حالىقارالىق شارتتار شەتەلدىك ينۆەستورلارعا كەپىلدىك بەرىپ، سالىق سالۋ قۇقىعىن ەكى مەملەكەت اراسىندا ادىلەتتىك بولىسۋگە مۇمكىندىك بەرەدى.

اتاپ ايتقاندا، كەلىسىم ءبىرقاتار ماقساتتاردى كوزدەيدى. بىرىنشىدەن، الداعى ۋاقىتتا سالىقتىڭ بارلىق تۇرلەرى بويىنشا اقپارات الماسۋدى قالىپتاستىرىپ سالىق قىزمەتتەرى اراسىنداعى ىنتىماقتاستىقتى نىعايتۋ؛ ەكىنشىدەن، رەزيدەنتتىكتى دالەلدەيتىن، ەكى مەملەكەتتە بىردەي قولدانىلاتىن ءتارتىپتى بەلگىلەۋ؛ ۇشىنشىدەن، ديۆيدەندتەر، پايىزدار، رويالتي سياقتى پاسسيۆتى تابىستارعا شەكتى ستاۆكالاردى بەكىتۋ؛ تورتىنشىدەن، ەكى ەلدىڭ قۇزىرەتتى ورگانداردىڭ اراسىنداعى سالىقتىق داۋلاردى شەشۋ ءۇشىن قۇقىقتىق نەگىزىن قالىپتاستىرۋ.

«حورۆاتيامەن ءوزارا ساۋدا- ساتتىق تۋرالى كەيبىر دەرەكتەردى قىسقاشا ايتىپ وتكىم كەلەدى. ەكى ەل اراسىنداعى تاۋار اينالىمى سوڭعى 10 جىلدا 1,4 ميلليارد ا ق ش دوللارىنا جەتىپ وتىر. قازاقستان جانە حورۆاتيا اراسىنداعى ءوزارا ساۋدانىڭ كولەمى 2017-جىل ىشىندە ەداۋىر ۇلعايىپ، 317 ميلليون ا ق ش دوللارىن قۇرادى، ونىڭ ىشىندە ەكسپورت - 304 ميلليون ا ق ش دوللارى، يمپورت - 13 ميلليون ا ق ش دوللارى. تاۋار اينالىمنىڭ كوبەيۋى قازاقستاننىڭ مۇناي ونىمدەرىن ەكسپورتقا كوپتەپ شىعارۋىنا بايلانىستى. ال 2016-جىلعى جالپى ساۋدا اينالىمى 38,5 ميلليون ا ق ش دوللارىن عانا قۇراعان بولاتىن. قازاقستاندىق ەكسپورتتىڭ نەگىزگى باعىتى مۇناي ونىمدەرى، اليۋميني بولىپ تابىلادى»، - دەپ ناقتىلادى ق ر قارجى ءمينيسترى ءاليحان سمايىلوۆ.

سونىمەن قاتار، حورۆاتيادان يمپورت قۇرىلىمىندا فارماتسيەۆتىك ونىمدەر، كوسمەتيكالىق زاتتار، توقىما ونىمدەرى باسىمدىققا يە.