تارازدىق تالعات قولاربادا وتىرىپ بيلەپ، ءبىر جارىستان ءۇش مەدال جەڭىپ العان
ول اتالمىش باسەكەدە قولاربادا سپورتتىق ءبي بيلەۋدەن چەمپيون اتانىپ، جۇپتاسىپ بيلەۋ بويىنشا دا التىننان القا تاعىنعان. ونىڭ جۇبى حالىقارالىق جارىستاردىڭ جەڭىمپازى نارگيزا احمەتوۆا بولدى. وسى جارىستا تالعات ەرلەر اراسىندا دا جالعىز بيلەۋدەن قولا جۇلدەگە قول جەتكىزدى. وسىلايشا ءبىر جارىستان ءۇش جۇلدەنى يەلەنگەن.
تالعات - وبلىستىق 1№ ارناۋلى الەۋمەتتىك قىزمەتتەر ۇسىنۋ ورتالىعىنىڭ تۇرعىنى. ورتالىقتاعى كوركەمونەرپازدار ۇيىرمەسىنىڭ بەلسەندى مۇشەسى. ول كىشكەنتاي كەزىنەن قولاربادا جاقسى بيلەيدى. جۇپتاسىپ اربامەن بيلەۋدى تولعاناي تورەبەك ەكەۋى بىرگە باستاعان. ولار ەكەۋى جۇپتاسىپ بيلەۋدەن 2012-جىلى قازاقستان چەمپيونى اتاعىنا قول جەتكىزسە، 2013-جىلى ق ر كۋبوگىنىڭ يەگەرى اتانعان. 2014-جىلى وڭتۇستىك كورەيانىڭ ينچحون قالاسىندا وتكەن جازعى پارازيالىق ويىندارىنا قاتىسقان. «نۇر وتان» پارتياسىنىڭ «كەدەرگىسىز كەلەشەك» جوباسى اياسىندا «جانشۋاق» قوعامدىق سىيلىعىنىڭ يەگەرى.
«مۇمكىندىگى شەكتەۋلى ازاماتتارمەن جۇمىس ىستەۋ وڭاي ەمەس. ءارقايسىسىنىڭ مىنەزى، كوزقاراسى ءارتۇرلى. تاعدىردىڭ جازعانىنا مويىماي، ۇمىتپەن العا ۇمتىلاتىندارى دا از ەمەس. سونداي قايسار ازاماتتىڭ ءبىرى - تالعات امانبەكوۆ. ول ءوزىنىڭ قيىن تاعدىرىنا قاراماستان ومىرگە دەگەن شەكسىز ماحابباتىن دالەلدەپ، ون ەكى مۇشەسى ساۋ ازاماتتاردىڭ جەتە الماي جۇرگەن اسۋلارىنان اسىپ كەلە جاتىر. ءبىز تالعاتپەن ماقتانامىز»، - دەيدى اتالمىش ورتالىق ديرەكتورى رايحان سەيداليەۆا.
تالعات جەڭىمپاز بوپ ورالعاندا ورتالىقتىڭ باسشىسى باستاعان توپ قالانىڭ كىرەبەرىسىنەن قارسى الىپ، قۋانىشقا ورتاقتاسىپتى.
ايتا كەتەيىك، تالعات امانبەكوۆ 2016-جىلى وبلىس اكىمدىگى دەنە شىنىقتىرۋ جانە سپورت باسقارماسىنا قاراستى دەنە مۇمكىندىگى شەكتەۋلى ادامدارعا ارنالعان كلۋبقا مۇشە بولىپ قابىلدانعان. قازىر «تاراز - ارەنا» سپورت كەشەنىنە بارىپ، ۇزدىكسىز جاتتىعىپ ءجۇر. ول وسىعان دەيىن ەلىمىزدىڭ باس قالاسىندا جىل سايىن وتەتىن «استانا OPEN» حالىقارالىق تۋرنيرىندە بىرنەشە رەت جەڭىمپاز اتانىپ ۇلگەرگەن. 2017-جىلى اتىراۋ قالاسىندا سپورتتىق بيدەن وتكەن Ⅸ حالىقارالىق تۋرنيردە توپ جارعان.