بەلارۋس ەلىندە قازاقستاننىڭ مادەني كۇندەرى ءوتتى

مينسك. قازاقپارات - بەلارۋس استاناسى مينسكىدە ەلىمىزدىڭ مادەني كۇندەرى ءوتتى، دەپ حابارلايدى قازاقپارات ءتىلشىسى.

مادەنيەت كۇندەرىنىڭ اشىلۋى الدىندا بەلارۋس رەسپۋبليكاسىنىڭ مادەنيەت ۆيتسە-ءمينيسترى ناتاليا كارچيەۆسكايا، ق ر مادەنيەت جانە سپورت ءمينيسترىنىڭ كەڭەسشىسى باۋىرجان قاراعىز ۇلى، بەلارۋس ەلىندەگى قازاقستاننىڭ توتەنشە جانە وكىلەتتى ەلشىسى ەرمۇحامەت ەرتىسبايەۆ جانە باسقا دا قوناقتار مەملەكەتتىك فيلارمونيا زالىندا اشىلعان كورمەمەن تانىستى.

ەلىمىزدىڭ تاريحى، مادەنيەتى مەن گەوگرافياسىن باياندايتىن بەينەروليكتەر مەن فوتوسۋرەتتەر قويىلعان كورمە قوناقتارىن ۇلتتىق كيىمدەگى باتىرلار مەن قازاق ارۋلارى قارسى الدى.

ودان كەيىن ن. تىلەنديەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترى مەن مەملەكەتتىك اكادەميالىق سيمفونيالىق وركەسترىنىڭ قاتىسۋىمەن گالا-كونسەرت ءوتتى.

«سىزدەردى قازاقستان رەسپۋبليكاسىنىڭ بەلارۋس رەسپۋبليكاسىنداعى مادەنيەت كۇندەرىنىڭ اشىلۋىمەن شىن جۇرەكتەن قۇتتىقتايمىن. بۇگىنگىدەي مادەني ءىس-شارالار ارقىلى ەكى ەل اراسىنداعى دوستىق بايلانىستىڭ نىعايا تۇسەتىنىنە سەنىمدىمىن. كونسەرتتەن بولەك ارنايى قويىلعان كورمەدەن قازىرگى قازاقستاننىڭ جارقىن بەينەلەرى مەن تۇرمىس-تىرشىلىگىن تاماشالاي الاسىزدار»، - دەدى ق ر مادەنيەت جانە سپورت ءمينيسترىنىڭ كەڭەسشىسى باۋىرجان قاراعىز ۇلى.

اتالعان شارانى «رۋحاني جاڭعىرۋ» باعدارلاماسى اياسىندا مادەنيەت جانە سپورت مينيسترلىگى ۇيىمداستىردى.

«قازاقستاننىڭ بەلارۋس ەلىندەگى مادەني كۇندەرى - ەڭ الدىمەن ەكى ەل اراسىنداعى شىنايى دوستىقتىڭ كورىنىسى. وسىنداي شارالاردىڭ نەگىزىندە مەملەكەتتەر اراسىنداعى ساياسي-ەكونوميكالىق جانە مادەني-رۋحاني قارىم-قاتىناس تەرەڭدەي تۇسەدى. قازاق حالقى دەگەندە ەڭ ءبىرىنشى ەسىمىزگە تۇسەتىنى - ۇلى وتان سوعىسى جىلدارى بەلارۋس ەلىن سوعىس ورتىنەن الىپ شىعۋ مەن قورعاۋدا قوسقان ۇلەستەرىڭىز. سونىڭ ءبىر دالەلى - ءبارىڭىز بىلەسىزدەر، وتان قورعاۋداعى ءاربىر 10 وقتىڭ 9 ى قازاقستاندا شىعارىلدى. سول كەزدەن باستاۋ العان تاريحي باۋىرلاستىق قازىرگى كۇنگە دەيىن جالعاسىن تاۋىپ كەلەدى. بۇگىنگى مادەني كەش - سونىڭ كۋاسى، ال ونەر - كەز-كەلگەن حالىقتى ءتىل تابىستىرا بىلەتىن ەرەكشە كۇش»، - دەدى بەلارۋس رەسپۋبليكاسى مادەنيەت ءمينيسترىنىڭ ءبىرىنشى ورىنباسارى ناتاليا كارچيەۆسكايا.

ءوز كەزەگىندە ەلىمىزدىڭ توتەنشە جانە وكىلەتتى ەلشىسى ەرمۇحامەت ەرتىسبايەۆ ەكى ەل اراسىنداعى مادەني جانە ەكونوميكالىق قارىم-قاتىناستىڭ ماڭىزىنا توقتالىپ ءوتتى.

«وسىدان ءبىر جىل بۇرىن مينسكىدە قازاقستان مەن بەلارۋس باسشىلارىنىڭ رەسمي كەزدەسۋى ءوتىپ، وندا 2026-جىلعا دەيىنگى الەۋمەتتىك- ەكونوميكالىق كەلىسىمدەر جاسالدى. قازاقستان تاراپىنان بۇرىنعى كەڭەس وداعى ەلدەرى اراسىندا تەك بەلارۋس ەلىمەن عانا وسىنداي ۇزاقمەرزىمدى سەرىكتەستىك جاسالعان دەپ ايتۋعا بولادى. ەلباسى نۇرسۇلتان نازاربايەۆ ەكى ەل اراسىنداعى تاۋار اينالىمىن 1 ميلليارد دوللارعا دەيىن ۇلعايتۋ جونىندە تاپسىرما بەردى. ەكونوميكالىق بايلانىستان بولەك، ەكى حالىقتىڭ دوستىق قارىم-قاتىناسىن ودان ءارى نىعايتۋدا مادەني شارالاردىڭ ماڭىزى ەرەكشە. وسى تۇرعىدا سىزدەر ءۇشىن بۇگىن قازاقستاننىڭ ونەرپازدارى ونەر كورسەتەدى»، - دەدى ول.

گالا-كونسەرت سوڭىندا بەلارۋس ەلىنىڭ مادەنيەت ۆيتسە- ءمينيسترى قازاق دەلەگاتسياسىنا ىقىلاس گۇلىن تابىس ەتتى.

ايتا كەتسەك، ەكى ەل اراسىنداعى ديپلوماتيالىق قارىم- قاتىناس 1992-جىلدىڭ 16- قىركۇيەگىنەن باستاۋ العان. بەلارۋس ەلىندەگى قازاقستان ەلشىلىگى 1993-جىلى 9- قاڭتاردا اشىلسا، تيىسىنشە ءبىزدىڭ ەلدە بەلارۋس رەسپۋبليكاسىنىڭ ەلشىلىگى 1997-جىلدىڭ 13- شىلدەسىنەن باستاپ جۇمىس ىستەپ كەلەدى.