ۋكراينالىق ومبۋدسمەن پوروشەنكو سويلەپ جاتقاندا تالىپ قالدى
بۇل جاعداي مەملەكەت پرەزيدەنتى قاتىسقان تىكەلەي ەفير كەزىندە بولعان دەپ حابارلايدى Life.ru سايتى.
ازوۆ تەڭىزىندە بولعان جاعداي تۋرالى ايتىپ جاتقاندا ومبۋدسمەن ءوزىن جايسىز سەزىنە باستاعان.
«ءسىز بۇكىل الەمنىڭ ءارتۇرلى رەاكسياسىن كوردىڭىز»، - دەگەن پوروشەنكونىڭ سوزىنەن كەيىن ومبۋدسمەننىڭ قۇلاعانىن بايقاۋعا بولادى.
پوروشەنكو مىنبەدەن تومەن ءتۇسىپ، دەنيسوۆاعا باردى. وعان اياعىنان تۇرۋىنا كومەكتەسىپ، ستۋديادان شىعارىپ سالدى.
سودان سوڭ ۋكراينانىڭ پرەزيدەنتى ومبۋدسمەننىڭ «ۋكراينالىق كەمەشىلەردى بوساتۋ ءۇشىن تاۋلىگىنە 20 ساعات جۇمىس ىستەيتىنىن» ايتتى. پوروشەنكونىڭ ايتۋىنشا، بۇل وڭاي ەمەس.
ەسكە سالساق، 25- قاراشا كۇنى تاڭەرتەڭ كەرچ بۇعازىندا رەسەيلىك شەكاراشىلار ۋكراينانىڭ ءۇش بىردەي ۆمس كەمەسىن ۇستاعان.
رەسەي وكىلدەرى ءمالىم ەتكەندەي، كەمەدەگى اسكەري قىزمەتكەرلەر مەملەكەتتىك شەكارانى بۇزىپ، تالاپتارعا ەشبىر جاۋاپ قاتپاعان. سودان كەيىن وت قويۋعا ءماجبۇر بولىپتى. الايدا ۋكراينا جاعى كەمەلەر نەگىزسىز تىركەۋگە الىنعان جانە ولاردىڭ ءبىرىنىڭ قوزعالتقىشى مەن باسقا دا بولىكتەرىنە زاقىم كەلتىرگەنىن العا تارتقان.
ب ا ق مالىمەتىنشە، وقيعادان ءۇش ۋكراينالىق تەڭىزشى جاراقات الىپتى.
وسىدان كەيىن ۋكراينانىڭ قورعانىس مينيسترلىگى ەلدەگى اسكەري كۇشتەردى جاۋىنگەرلىك ازىرلىك جاعدايىنا كوشىرگەنى حابارلانعان ەدى.
ال قازاقستان رەسەي مەن ۋكراينانى جاعدايدى ۋشىقتىرماۋعا شاقىرعان بولاتىن.