ۋكراينا پرەزيدەنتى گەرمانيانى قارا تەڭىزدە اسكەري ىقپالىن ارتتىرۋعا شاقىردى

استانا. قازاقپارات - ۋكراينا پرەزيدەنتى پەتر پوروشەنكو گەرمانيانى جانە وعان وداقتاس ەلدەردى قارا تەڭىزدە اسكەري ىقپالىن ارتتىرۋعا شاقىردى. ونىڭ ايتۋىنشا، بۇل تەڭىزدەگى رەسەي اگرەسسياسىن شەكتەۋگە مۇمكىندىك بەرەدى.

 نەمىستىلدى Funke Media Group باسىلىمىنا بەرگەن سۇحباتىندا ول گەرمانيانى «سولتۇستىك اعىس - 2» ەنەرگەتيكالىق جوباسىنىڭ قۇرىلىسىن توقتاتىپ، رەسەيگە قارسى سانكسيا ەنگىزۋگە شاقىرعان.

 

ۋكراينا پرەزيدەنتى پەتر پوروشەنكو (وڭ جاعىندا) جانە قورعانىس ءمينيسترى ستەپان پولتوراك (سول جاعىندا) . كيەۆ، 1 - جەلتوقسان 2018 -جىل

يتاليانىڭ Corriere della Sera باسىلىمىنا بەرگەن سۇحباتىندا پوروشەنكو رەسەيلىك كەمەلەردى ەۋروپالىق پورتتارعا كىرگىزبەۋگە شاقىرعان. سونىمەن بىرگە ۋكراينانى اسكەري، ساياسي جانە ەكونوميكالىق تۇرعىدا قولداۋدى ۇسىنعان.

ۋكراينا باسشىسى كەرچ جانجالىندا كيەۆتى قولداعانى ءۇشىن ەۋروپا ەلدەرىنە العىس ايتتى. پوروشەنكو سولسبەريدەگى رەسەيلىك بۇرىنعى تىڭشىنىڭ ۋلانۋىنا قاتىستى وقيعاعا ەۋروپا ەلدەرى قالاي رەاكسيا تانىتسا، بۇل جولى دا سونداي ىنتاماقتاستىق تانىتۋى ءتيىس دەپ سانايدى. ۇلى بريتانيانىڭ سولسبەري قالاسىندا رەسەيلىك بۇرىنعى تىڭشى سەرگەي سكريپال مەن ونىڭ قىزى ۋلانعاننان كەيىن باتىس ەلدەرى كرەملدى ايىپتادى. شامامەن 30 ەل قارسىلىق رەتىندە 150 رەسەي ديپلوماتىن ەلدەن قايتاردى.

25 - قاراشادا كەرچ بۇعازىندا رەسەي اسكەريلەرى ۋكراين كەمەلەرىن اتقىلاپ، ەكى اسكەري كەمە، ءبىر بۋكسيردى ۇستاعان. بىرنەشە ادام جارالانعان. ەكى ەل ءبىر- ءبىرىن «وقيعاعا كىنالى» دەپ ايىپتادى. قازىر ەكى ەلدە دە وقيعاعا قاتىستى قىلمىستىق ءىس قوزعالىپ، تەرگەۋ امالدارى ءجۇرىپ جاتىر. بۇعان دەيىن باتىس ەلدەرى رەسەيدى ۋكراين تەڭىزشىلەرىن بوساتۋعا شاقىرعان.

https://www.azattyq.org