قازاقستان يلون ماسك زىمىرانىمەن ەكى جەرسەرىك ۇشىردى
ول زىمىران-تاسىعىش وربيتاعا شاعىن سپۋتنيكتەر مەن كۋبساتتاردىڭ رەكوردتىق سانىن الىپ شىقتى، دەپ حابارلايدى قازاقپارات ءتىلشىسى.
بۇدان بۇرىن حابارلانعانداي، كەشەندى ۇشىرۋدىڭ تاپسىرىس بەرۋشىلەرى 17 ەلدىڭ (اۆستراليا، برازيليا، فينليانديا، گەرمانيا، ءۇندىستان، يتاليا، يوردانيا، قازاقستان، نيدەرلاندى، پولشا، وڭتۇستىك كورەيا، يسپانيا، شۆەيتساريا، تايلاند، كانادا، ۇلى بريتانيا، ا ق ش) 34 وپەراتورى (25 كومپانيا) بولىپ وتىر.
Space X كومپانياسىنىڭ حابارلاۋىنشا، وسى ميسسيا كومپانيانىڭ جانە بارلىق امەريكالىق زىمىران-تاسىعىشتاردىڭ تاريحىنداعى ساپالى جۇكتەمە رەتىندە اپپاراتتاردىڭ سانى جاعىنان ەڭ ءىرى ۇشىرۋ بولدى.
64 سپۋتنيكتىڭ ىشىندە قازاقستان رەسپۋبليكاسىنىڭ ەكى عارىش اپپاراتى بار. بىرەۋى KazSTSAT - سالماعى 100 كەلىلىك تەحنولوگيالىق ماڭىزدى سپۋتنيك. شاعىن سپۋتنيك SSTL- X50 الاڭىندا قۇراستىرىلعان. وربيتانىڭ بيىكتىگى - 542 شاقىرىم. سپۋتنيكتى 2015-جىلدان باستاپ SSTL Surrey Satellite Technology Ltd اعىلشىن كومپانياسىنىڭ بازاسىندا «عالام» بىرلەسكەن كومپانياسىنداعى قازاقستاندىق ماماندار قۇراستىرعان.
سپۋتنيك تابيعي اپاتتارعا مونيتورينگ جاساۋ، اۋىل شارۋاشىلىعىنا مونيتورينگ جاساۋ، سۋدىڭ ساپاسىن انىقتاۋعا ارنالعان.
قازاقستاننىڭ ەكىنشى عارىش اپپاراتى - سالماعى 5 كەلىلىك KazSciSat 1 كۋبساتى. ونى «عالام» بىرلەسكەن كومپانياسى (LLP Ghalam) قۇراستىرعان. عىلىمي نانوسپۋتنيك جەردىڭ ماگنيتتىك اۋماعىن ولشەۋگە ارنالعان.
ەسكە سالساق، قازاقستان يلون ماسك زىمىرانىمەن جەرسەرىك ۇشىراتىندىعى تۋرالى «Digital Bridge» حالىقارالىق يننوۆاتسيالىق فورۋمىندا ق ر قورعانىس جانە اەروعارىش ونەركاسىبى ۆيتسە-ءمينيسترى مارات نۇرعوجين حابارلاعان بولاتىن.
اتاقتى امەريكالىق ونەرتاپقىش يلون ماسك SpaceX جانە Tesla كومپانيالارىنىڭ نەگىزىن قالاۋشى.