ەلوردادا ينكليۋزيۆتى ميۋزيكل قويىلدى

استانا. قازاقپارات - ەلوردادا ينكليۋزيۆتى ميۋزيكل نازاربايەۆ ۋنيۆەرسيتەتىنىڭ كينوزالىندا ەرەكشە كۇتىمدى قاجەت ەتەتىن جاس اكتەرلەر «سۇلۋ قىز بەن قۇبىجىق» سپەكتاكلىن قويدى، دەپ حابارلايدى استانا اكىمدىگىنىڭ رەسمي سايتى.

كوپتەگەن مۋزىكالىق نومىرلەرگە نەگىزدەلگەن سپەكتاكل ديسنەي ەرتەگىسىنىڭ 40 مينۋتتىق نۇسقاسى بويىنشا قويىلعان.

وندا داۋن سيندرومى، اقىل-ويدىڭ ارتتا قالۋى، تسەرەبرالدى سال اۋرۋلارى، اۋتيزم سپەكترىنىڭ بۇزىلۋى سىندى دياگنوزى بار 25 جاس ءوسپىرىم اكتەر ونەر كورسەتتى. جاس اكتەرلەرگە ەرىكتىلەر - وقۋشىلار، ستۋدەنتتەر جانە جاس ماماندار قول ۇشىن بەردى.

«ساحنادا 50 ادام ونەر كورسەتتى. ساحنادان تىس بالالاردىڭ كيىمىن اۋىستىرۋ، بوياندىرۋ، سۋرەت پەن بەينەتاسپاعا ءتۇسىرۋ، دىبىس جانە جارىقپەن جۇمىس ىستەۋگە 25 تەن استام ەرىكتى كومەكتەستى.

سپەكتاكلگە 300 دەن استام كورەرمەن جينالدى. مۇنداي قىزىعۋشىلىق تانىتادى دەپ كۇتكەن جوقپىز. مۋزىكالىق كەش وتە جارقىن ءارى اسەرلى بولدى. ال سپەكتاكلدەن كەيىن اكتەرلەردەن قولتاڭبا الۋ ءۇشىن كورەرمەندەر كەزەككە تۇردى»، - دەيدى ۇيىمداستىرۋشىلار. «KИT»  ينكليۋزيۆتى مەكتەبىنىڭ اشىلعانىنا ءبىر جىلدان استى. از ۋاقىتتا ولار ەكى جوبانى - ينكليۋزيۆتى تەاتر جانە كاسىپتىك باعدار بەرۋ باعدارلاماسىن جۇزەگە اسىرىپ ۇلگەردى. ينكليۋزيۆتى تەاتر استانادا قازىردىڭ وزىندە ەكى مۋزىكالىق قويىلىمىن ۇسىندى. كەلەر جىلى گاسترولدىك ساپارلارعا شىعۋدى جوسپارلاۋدا.