گرۋزيانىڭ جاڭا پرەزيدەنتى: رەسەيمەن ارىپتەستىك ورناتۋىمىز ەكىتالاي
زۋرابيشۆيلي رەسەيدى گرۋزيا جەرىنە بىرتىندەپ ەنىپ، «وككۋپاتسيا سىزىعىنداعى» ازاماتتاردى ۇرلادى دەپ ايىپتادى. ول «وككۋپاتسيا سىزىعى» دەپ مويىندالماعان وڭتۇستىك وسەتيا رەسپۋبليكاسىمەن شەكارانى اتادى. گرۋزيانىڭ جاڭا باسشىسى ەلدىڭ ەۋروپامەن ىنتىماقتاسۋ باعىتىن ۇستاناتىنىن ايتتى.
گرۋزيا بيلىگى رەسەيدى وڭتۇستىك وسەتيامەن شەكتەسەتىن ايماقتا ازاماتتاردى تۇتقىنداپ جاتىر دەپ بۇعان دەيىن دە ايىپتاپ كەلگەن. ماسكەۋ بولسا بۇل ايماقتى تاۋەلسىز مەملەكەت دەپ مويىنداپ، ءتورت مىڭ اسكەرىن ورنالاستىرعان. رەسەيدەن باسقا وڭتۇستىك وسەتيانى تاۋەلسىز ەل دەپ بەس مەملەكەت مويىنداعان. ابحازيا مەن وڭتۇستىك وسەتيا 2008 -جىلى رەسەي مەن گرۋزيا اراسىندا بولعان اسكەري جانجالدا گرۋزيادان ءبولىنىپ شىققان. رەسەي گرۋزيانىڭ جىكشىل ايماقتارىنداعى ارەكەتىن «بىتىمگەرشىلىك وپەراتسياسى» دەپ اتاعان.
پرەزيدەنت سايلاۋىندا سالومە زۋرابيۆشيلي قارسىلاسى گريگول ۆاشادزەدەن 20 پايىز داۋىسپەن وزدى. گرۋزيا تاريحىندا ءبىرىنشى رەت ايەل پرەزيدەنت اتانعان زۋرابيشۆيلي سايلاۋداعى جەڭىسىن «ەۋروپانىڭ جەڭىسى» دەپ اتادى. ەلدىڭ بۇرىنعى پرەزيدەنتى ميحايل سااكاشۆيلي جاقتايتىن ۇمىتكەر ۆاشادزە سايلاۋ قورىتىندىسىن مويىندامادى. ول بيلىكتى سايلاۋشىلارعا قىسىم جاسادى، سايلاۋ ناتيجەسىن بۇرمالادى دەپ ايىپتادى. ونىڭ سوزىنشە، «گرۋزيا ارمانى» جەڭىسكە جەتۋ ءۇشىن «قىلمىس الەمىمەن كەلىسىمگە كەلگەن». وپپوزيتسيا جاقتاستارى تبيليسيدە شەرۋگە شىعۋدى جوسپارلاپ وتىر.
www.azattyq.org