پاريجدە قازاق مادەنيەتى مەن ءسان ونەرىنىڭ تانىستىرىلىمى ءوتتى
ءىس-شارا بارىسىندا تانىمال قازاقستاندىق سانگەرلەر - «زەكەن مودا» برەندىنىڭ نەگىزىن قالاۋشى قايروللا ابىشەۆ، «اسپارا» ءسان ءۇيىنىڭ نەگىزىن قالاۋشى ايدارحان قاليەۆ پەن زەرگەر-سۋرەتشى نۇردوس ءالياسقاروۆ ءوز كوللەكسيالارىن ۇسىندى، دەپ حابارلايدى قازاقپارات ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.
قازاقستان رەسپۋبليكاسىنىڭ فرانسياداعى ەلشىسى جان عاليەۆ ءوز قۇتتىقتاۋ سوزىندە قازاق حالقىنىڭ باي جانە بىرەگەي تاريحي مۇراسىن جانداندىرۋ جانە قازاقستاندى جاڭعىرتۋعا ارنالعان «قازاقستان-2050» ستراتەگياسى، «رۋحاني جاڭعىرۋ» جانە «ۇلى دالانىڭ جەتى قىرى» سياقتى ەلباسىنىڭ باستامالارىن حالىققا تانىستىردى.
«1- جەلتوقسان كۇنى، ءبىزدىڭ ەلىمىز قازاقستان رەسپۋبليكاسىنىڭ تۇڭعىش پرەزيدەنتى كۇنىن اتاپ وتەدى. ءبىزدىڭ حالقىمىز ءوزىنىڭ كوشباسشىسى مەن رەفورماتورىنا ۇلكەن قۇرمەتپەن قارايدى. ونىڭ ستراتەگيالىق كوزقاراسىنىڭ ارقاسىندا قازاقستان الەمدەگى ەڭ سەرپىندى ەكونوميكالاردىڭ بىرىنە اينالىپ، حالىقارالىق ارەنادا ءوز ورنىن نىعايتۋعا جانە ءوز مادەنيەتى مەن قۇندىلىقتارىن ىلگەرىلەتۋگە مۇمكىندىك الدى. قازىرگى كەزدە قازاقستان الەمدىك قوعامداستىق الدىندا وڭىرلىك جانە عالامدىق ماسەلەلەردى شەشۋگە ۇلەس قوسىپ، جاۋاپتى، سەنىمدى تالاپ ەتەتىن سەرىكتەس رەتىندە قۇرمەتكە يە»، - دەدى قازاقستان ەلشىسى.
ەجەلگى داستۇرلەردىڭ ۇيلەسىمدى بىرىگۋى مەن جاڭعىرۋى جانە رۋحاني جاڭارتۋ تاقىرىبى بويىنشا كورسەتىلگەن كوللەكتسيالاردى كورەرمەندەر قوشەمەتپەن قارسى الدى. مەرەكەلىك شارا بارىسىندا ونەر كورسەتكەن بەلگىلى «باستاۋ» دومبىراشىلارىنىڭ دۋەتى جانە حالىق ءانشىسى، قازاقستان رەسپۋبليكاسىنىڭ ەڭبەك سىڭىرگەن قايراتكەرى گۇلنۇر ورازىمبەتوۆا، سونداي-اق قوناقتارعا جايىلعان ءداستۇرلى قازاق داستارقانى ەلىمىزدىڭ ۇلتتىق ەرەكشەلىگىن تانىتتى.
«بولاشاعى جارقىن قازاقستان حالىقارالىق بەدەلىن نىعايتا وتىرىپ، تۇراقتى جانە ماقساتتى تۇردە العا جىلجىپ كەلەدى. قازاقستان پرەزيدەنتى ن. نازاربايەۆ مىرزا بۇل جولدا ۇلكەن جۇمىس جاسادى. ول كىسىنىڭ كورەگەندىگى مەن پراگماتيزمىنىڭ ارقاسىندا مەملەكەت بۇگىن قارقىندى دامىپ كەلەدى. پرەزيدەنتتىڭ كوپەتنيكالىق حالىقتىڭ مادەنيەتىن جانداندىرۋ جانە بىرلىگىن نىعايتۋ جونىندەگى باستامالارى مەملەكەتتىڭ باستى باعىتى بولىپ تابىلادى» - دەدى «Vladi France Conseil» كومپانياسىنىڭ ديرەكتورى، «ديپلوماتيالىق جارشى» اتتى جۋرنالدىڭ باس رەداكتورى ديدە ۆيدال.
«بۇگىنگى كورگەن ديزاينەرلەردىڭ ەرەكشە تالعامى بار، جالپى مەن سانگەرلەردىڭ بۇل جاعىن اسا باعالايمىن. شىعارماشىلىقتا بىرەگەي ءتاسىل مەن ەرەكشە يدەيالاردى ۇناتامىن. بىرەگەي ەرەكشەلىگىمەن كوزگە تۇسەتىن جاسامپاز ادامدارمەن كەزدەسۋدى ءارقاشان قىزىعا كۇتەمىن»، - دەدى «Oriental Fashion Week» پرەزيدەنتى، ديزاينەر حيند دجۋدار.
بۇل شارا ەلشىلىك باستاعان «جاھانداعى زاماناۋي قازاقستاندىق مادەنيەت» جوباسىن ىسكە اسىرۋعا باعىتتالعان «فرانسياداعى قازاقستان كۇزى» اتتى مادەني ماۋسىمدى قورىتىندىلادى. بۇل جوبا ەۋروپالىق قوعامداستىقتىڭ قازىرگى زامانعى ونەردەگى دامۋ پروتسەستەرىنىڭ جوعارى دەڭگەيىن كورنەكى تۇردە كورسەتۋگە مۇمكىندىك بەردى.
