وڭتۇستىك كورەيادا قازاقستاننىڭ زاماناۋي ونەرىنىڭ اۋقىمدى كورمەسى اشىلدى
سۋۆونداعى SIMA زاماناۋي ونەر مۇراجايىنا كەڭەستىك جانە قازىرگى زاماننىڭ 57 سۋرەتشىسىنىڭ 100 دەن استام تۋىندىسى قويىلعان. كورمە «فوكۋس قازاقستان» حالىقارالىق جوباسى اياسىندا شەتەلدە ۇيىمداستىرىلعان شارالاردىڭ ءتورتىنشىسى ءارى سوڭعىسى.
«فوكۋس قازاقستان» «رۋحاني جاڭعىرۋ» باعدارلاماسى اياسىندا جۇزەگە اسىرىلىپ جاتقان «زاماناۋي قازاقستاندىق مادەنيەت - جاھاندىق الەمدە» اتتى ارنايى جوباسىنىڭ ءبىر بولىگى بولىپ تابىلادى.
«فوكۋس قازاقستان» جوباسىنىڭ كۋراتورى روزا ابەنوۆانىڭ ايتۋىنشا، جوبا حالىقارالىق ارەناداعى قازاقستاننىڭ زاماناۋي بەينەلەۋ ونەرىن اۋقىمدى كورسەتە العان ۇيىمداستىرۋ تاجىريبەسىنىڭ العاشقى جانە تابىستى مىسالى بولا الادى. ءتورت قالادا (لوندون، بەرلين، دجەرسي سيتي، سۋۆون) 400 گە جۋىق جۇمىس جانە 94 سۋرەتشىنىڭ مۇراعاتتىق قۇجاتتارى كورسەتىلدى. جوبانىڭ سوڭىندا ءار كورمە بويىنشا كاتالوگتار شىعارىلادى.
«ەۋرازيالىق ۋتوپيا: Post Scriptum» كورمەسى كەڭەستىك كەزەڭنىڭ جانە قازىرگى زامانعى سۋرەتشىلەردىڭ شىعارماشىلىعىن زەردەلەۋ، كوركەمدىك ءداستۇردىڭ جالعاسى مەن ءۇزىلۋىن كورسەتۋ، رەسپۋبليكامىزدىڭ تاۋەلسىزدىگى كەزەڭىندەگى قازىرگى زامانعى ونەردىڭ دۇنيەگە كەلۋىن، جاڭا ديسكۋرستار مەن مەديانىڭ پايدا بولۋىن زەرتتەۋ ارقىلى قازاقستاندىق ونەردىڭ نارراتيۆىن انىقتاۋعا تىرىسادى. ۇلتتىق سۋرەت ونەرى مەكتەبىنىڭ ەرەكشەلىكتەرى، «جەرگىلىكتى مودەرنيزم» فەنومەنى جانە تاۋەلسىزدىك كەزەڭىندەگى ونەر - كورمەنىڭ باستى تاقىرىپتارى. وندا ۇكى اجيەۆتىڭ، ولگا كۋجەلەنكونىڭ، ساليحيتدين ايتبايەۆتىڭ، جاڭاتاي شاردەنوۆتىڭ، ەۆگەني سيدوركيننىڭ، الەكسەي ستەپانوۆتىڭ، ميحايل كيمنىڭ، بوريس پاكتىڭ، ءابدىراشيت سىدىحانوۆتىڭ، رۋستام حالفيننىڭ، سەرگەي ماسلوۆتىڭ، ساكەن نارىنوۆتىڭ، سەرىكباي ءالجانوۆتىڭ، ەربوسىن مەلدىبەكوۆتىڭ، ەلەنا مەن ۆيكتور ۆوروبيەۆتاردىڭ، الەكساندر ۋگايدىڭ، باقىت ءبۇبىقانوۆتىڭ، الىبەك مەرگەنوۆتىڭ، ساۋلە دۇيسەنبينانىڭ، نۇربول نۇراحمەتتىڭ جانە باسقالارىنىڭ تۋىندىلارى ۇسىنىلدى.
«ەۋرازيالىق ۋتوپيا: Post Scriptum» كورمەسىنىڭ جەتەكشىلەرى سوروكينا يۋليا (قازاقستان) مەن شين ىن يانگ (وڭتۇستىك كورەيا). يۋليا سوروكينا جەرگىلىكتى مودەرنيزم فەنومەنى، سۋرەتشىلەردىڭ مودەرنيزم مۇراسىن سەزىنۋى مەن ونىڭ ءوز تاجىريبەلەرىمەن ۇشتاستىرۋى تۋرالى اتاپ وتەدى. ال شين ىن يانگتىڭ ايتۋىنشا، تاريحي تۇرعىدا قازاقستاننىڭ كورەيامەن تىعىز بايلانىسى بار. «ءبىراق ءبىز قازاقستاننىڭ ونەرى مەن مادەنيەتى تۋرالى تىم از بىلەمىز. قازاقستان ونەرىنىڭ العاشقى كورمەسىنىڭ ارقاسىندا كوبىرەك بىلۋىمىزگە مۇمكىندىك تۋدى»، - دەيدى ول.
ايتا كەتەيىك، «فوكۋس قازاقستان» جوباسىن ق ر ۇلتتىق مۋزەيى مەن ق ر مادەنيەت جانە سپورت مينيسترلىگى ۇيىمداستىرعان.
كورمە 2019-جىلدىڭ 3- ناۋرىزىنا دەيىن جالعاسادى.
