اقتوبەدە ديماشتىڭ ۇلكەن كونسەرتى وتەدى

 استانا. قازاقپارات - اقتوبە وبلىسىنىڭ اكىمى بەردىبەك ساپاربايەۆ تانىمال ءانشى ديماش قۇدايبەرگەننىڭ ۇلكەن كونسەرتىن وتكىزۋدى جوسپارلاپ جۇرگەنىن ايتتى، دەپ حابارلايدى قازاقپارات ءتىلشىسى.

«ديماش - ءبىزدىڭ ماقتانىشىمىز. ول قازاقستاننىڭ اتىن الەمدىك دەڭگەيدە تانىتىپ ءجۇر. سوندىقتان وعان قولداۋ كورسەتۋىمىز كەرەك. ءوزىمىز دە كومەكتەسىپ وتىرامىز. بيىل ديماشتىڭ قاتىسۋىمەن «باقىتتى بالا» اتتى ۇلكەن كونسەرت ۇيىمداستىرىلدى. ونەر ورتالىعىندا انشلاگ بولدى. وسى جىلدى ءبىز «باقىتتى بالالىق شاق» دەپ جاريالادىق. سونىڭ اياسىندا ديماش حالىقارالىق دەڭگەيدە كونسەرت بەردى. وعان 24 ەلدىڭ وكىلدەرى قاتىستى. 63 جاستاعى ءبىر ايەل سوناۋ كىشى ازيادان ديماشتىڭ داۋىسىن ەستيمىن دەپ، قازاقستانعا ارنايى كەلدى» ، - دەدى ب. ساپاربايەۆ استانادا وتكەن باسپا ءسوز ءماسليحاتىندا.

وبلىس باسشىسىنىڭ ايتۋىنشا، ديماش قۇدايبەرگەن اقتوبەدە جىل سايىن كونسەرت وتكىزۋگە كەلىسكەن.

 «وعان قوسا، كەلەسى جىلى اقتوبەنىڭ قۇرىلعانىنا 150 جىل تولادى. قازىر ءبىز قىزۋ دايىندالىپ جاتىرمىز. ارينە، سول كەزدە ديماشتىڭ قاتىسۋىمەن جاقسى ءبىر كونسەرت ۇيىمداستىرامىز. بالكىم، ستاديوندا، يا بولماسا، ورتالىق الاڭدا ۇلكەن ءبىر كونسەرت وتكىزەمىز» ، - دەپ اتاپ كورسەتتى بەردىبەك ماشبەك ۇلى.