الەمدەگى ەڭ قاۋىپتى تاعامدار

 استانا. قازاقپارات - ادامنىڭ تاماق ءىشۋ كەزىندە (ەگەر ول ەرەكشە ءدامدى بولىپ كورىنسە) الاتىن ءلاززاتىن ميعا اسەر ەتۋ تۇرعىسىنان ماحاببات سەزىمى مەن ەسىركىدەن الاتىن لاززاتپەن سالىستىرۋعا بولادى ەكەن.

ءبىراق ادامداردىڭ تۇتىنىپ جۇرگەن تاعامدارىنىڭ ءبارى بىردەي پايدالى ەمەس. بىرىنشىدەن، كەيبىر ۇيرەنشىكتى تاعامداردىڭ وزىنەن «ارتىق مولشەرلەۋ» بولىپ كەتۋى مۇمكىن. ەكىنشىدەن، جەر بەتىندە ەگەر بايقاپ تۇتىنباسا دەنساۋلىققا ۇلكەن زيان كەلتىرەتىن، ءتىپتى ولىمگە اپارىپ سوعاتىن تاعامدار دا بار. بۇل ماقالا ەڭ قاۋىپتى بەس تاعامعا ارنالعان.

فۋگۋ بالىعى

 

فۋگۋ - ساشيمي ستيلىندە شيكى كۇيىندە تارتىلاتىن، تۋرالماعان بالىقتان جاسالعان جاپوندىق، كورەيلىك جانە سينگاپۋرلىق جەڭسىك اس. فۋگۋ بالىعىنىڭ ەتى ەشقانداي قاۋىپتى بولماسا دا، كەيبىر تاعام تالعامپازدارى ەڭ ءدامدى جەرى دەپ ەسەپتەيتىن باۋىرىندا وتە كۇشتى تەترودوتوكسين نەيتروتوكسين بار. ول ادامنىڭ باسىن اينالدىرىپ، بۇكىل دەنەسىن ينەمەن سۇققىلاعانداي اسەر قالدىرىپ، بۇلشىقەت السىزدىگىن تۋدىرادى.

فۋگۋدان ءدام تاتۋدىڭ ارتى كەيبىر كەزدەرى تىنىس الۋدى اۋىرلاتىپ، قان اينالىمىن بۇزىپ، ءتىپتى ولىمگە اكەپ سوعۋى مۇمكىن. باقىتىمىزعا وراي جاپونيانى قوسا العاندا بارلىق جەردە فۋگۋدىڭ باۋىرىن تاعام رەتىندە پايدالانۋعا رەسمي تۇردە تيىم سالىنعان. الايدا، گاسترونوميا تالعامپازدارى ونى اس مازىرىنە كىرگىزۋگە ءالى دە تالپىنىپ ءجۇر.

Koi pla سالاتى

 

Koi pla - قۇرامىنا جاڭا اۋلانعان بالىقتىڭ باۋىرى (تاعى دا!)، ءدامدى تۇزدىق، لايم شىرىنى جانە.. ء.بىر شىمشىم ءتىرى قىزىل قۇمىرسقالار كىرەتىن، تايلاندتىڭ سولتۇستىك- شىعىسىندا جاسالاتىن سالات. قۇرامى قىزىق بۇل سالاتتىڭ ەرەكشە رەتسەپتىمەن قاتار، باۋىردىڭ قاتەرلى ىسىگى قاۋپىن تۋدىرادى دەگەن كۇدىك تە بار.

تايلاندتىڭ وسى سالاتتى كوپ تۇتىناتىن اۋداندارىندا باۋىردىڭ قاتەرلى ىسىگى ەر ادامداردا انىقتالعان بارلىق وبىر اۋرۋلارىنىڭ 50 پايىزىن قۇرايدى. بۇل جاھاندىق كولەمدە 10 پايىزدىق كورسەتكىشكە تەڭ. بۇعان سەبەپ بالىقتىڭ ىشىندە تىرشىلىك ەتەتىن جالپاق پارازيت قۇرتتار. ولار تەرميالىق وڭدەۋدەن وتپەگەندىكتەن ءتىرى كۇيىندە قالادى.

«پاگپاگ»

 

نەگىزى، «پاگپاگ» - تاعامنىڭ اتاۋى ەمەس، كوشە تاماعىن سيپاتتايتىن تەرمين دەۋگە دە بولادى. ول ءتىپتى، ءبىز كۇندەلىكتى جەپ جۇرگەن كوشە تاماعى دا ەمەس، مۇلدەم باسقا نارسە. قوقىستىڭ ىشىنەن الىنعان ازىق- تۇلىكتى مۇقيات (ولاي بولماۋى دا مۇمكىن) جۋىپ، تازالاپ، ىستىق مايعا قايتا قۋىرادى.

ءبىر قىزىعى، تاگال تىلىنەن اۋدارعاندا «پاگپاگ» «شاڭ مەن كىردى سىلكىپ تاستاۋ» دەگەندى بىلدىرەدى. مۇنداي تاماقپەن بىرگە تىرىسقاق، ا گەپاتيتى جانە ءىش سۇزەگى سياقتى جۇقپالى سىرقاتتاردىڭ قاتار جۇرەتىنىن ايتۋدىڭ ءوزى ارتىق. الايدا، ونى الماستىراتىن باسقا تاماق بولماعاندىقتان، پاگپاگتى الەمنىڭ ەڭ كەدەي ەلدەرىندە ءالى تۇتىنۋدان باس تارتپايدى.

مانيوكا

 

مانيوكا (نەمەسە كاسساۆا) - سولتۇستىك جانە وڭتۇستىك امەريكادا وسەتىن، ءبىراق كاريب الابى، افريكا جانە ازيا ەلدەرىندە دە كەڭىنەن تۇتىناتىن، جەۋگە جارامدى كراحمالدى وسىمدىك. IFL Science-تىڭ مالىمدەۋىنشە، بۇل الەمدەگى 500 ميلليوننان اسا ادامنىڭ نەگىزگى كالوريا كوزى بولىپ تابىلادى.

مۇنداي تانىمالدىلىعىنا قاراماستان، مانيوكانىڭ جاپىراقتارى مەن تامىرىندا تاماقتانۋ كەزىندە تسيانيد جاسايتىن زات بار. مۇنداي وتە قاۋىپتى قۇرامدى جويۋ ءۇشىن مانيوكانى سۋعا سالىپ، جاقسىلاپ جۋىپ جانە سالقىنداتىپ، ۇزاق كەزەڭنەن تۇراتىن كەپتىرۋ ارقىلى عانا تاماققا پايدالانۋعا بولادى. ءبىراق وڭدەلمەگەن مانيوكانى جەگەننەن كەيىن ەمحاناعا تۇسكەن ادامدار سانى ازايار ەمەس.

كارامبولا

 

«جۇلدىزدى جەمىس» كارامبولا - تاعى ءبىر كەڭ تاراعان، ءبىراق قاۋىپتى ءتاتتى جەمىس. بۇل جولى ونىڭ قۇپياسى نەيروتوكسيندى كارامبوكسيندە جاتىر. ەگەر ءسىزدىڭ دەنساۋلىعىڭىز جاقسى بولسا، وندا دەنەڭىز كارامبوكسيننىڭ ءبىراز مولشەرىن جويىپ جىبەرە الادى دا، ول اعزاڭىزعا ەشقانداي قاۋىپ توندىرمەيدى.

ال ەگەر بۇيرەگىڭىز اۋىراتىن بولسا، وندا كارامبولانىڭ ءبىر ستاقان شىرىنى قاتتى ۋلانىپ قالۋعا جەتكىلىكتى. ونىڭ بەلگىلەرى: قۇسۋ، اياقتاردىڭ جانسىزدانۋى، بۇلشىقەتتىڭ بوساڭسۋى، سانانىڭ تۇماندانۋى جانە دەنەنىڭ قۇرىسۋى.