ەلباسى قازاقستاندىقتارعا قانداي كەڭەس بەردى
«ءبىز اناۋ جەتپەيدى، مىناۋ جەتپەيدى دەپ ۇنەمى شاعىمدانامىز. ەگەر ءومىر ءسۇرۋ تىم قيىن بولىپ بارا جاتسا، اۋرۋحاناعا بار. ءتىپتى بولماي بارا جاتسا، زيرات ارالا. ول جاقتا جاتقانداردىڭ ءحالى ساعان قاراعاندا الدەقايدا جامان. ءبىزدىڭ اياق- قولىمىز ساۋ، ءبىراق جاعداي جامان، وعان ەشتەڭە ىستەي المايمىز دەپ شاشىمىزدى جۇلامىز.. . ومىردە ءبارى دە مۇمكىن. ءوزىڭدى قولعا الىپ، جۇمىس ىستەۋگە ماجبۇرلە. مىنە، بارلىق ماسەلە وسىندا. جاستاردى دا وسىعان ۇيرەتۋىمىز كەرەك» ، - دەدى ەلباسى.
مەملەكەت باسشىسى مۇمكىندىگى شەكتەۋلى جاندارعا قامقورلىق جاساپ، حالىقتىڭ از قامتىلعان توبىنا قولداۋ كورسەتىپ كەلە جاتقان ۇكىمەتتىك ەمەس ۇيىمداردىڭ جۇمىسىنا ريزاشىلىق ءبىلدىردى.
«ازاماتتىق قوعام دا جەتىم بالالارعا، جالعىزباستى، اۋرۋ جانە قارت ادامدارعا قامقور بولۋى ءتيىس. ەشكىمى جوق، جالعىز قالاتىن ادامدار دا بار. ولار ءتىپتى نان الۋ ءۇشىن دۇكەنگە دە بارا المايدى. ولارمەن كىم اينالىسادى؟ الەۋمەتتىك قىزمەتتەر مۇنداي ادامداردى ءبىلىپ، قالاي ءومىر ءسۇرىپ جاتقانىن قاداعالاپ وتىرۋى ءتيىس» ، - دەدى نۇرسۇلتان نازاربايەۆ.
ەلباسى ەشكىمى جوق، جالعىزباستى ادامداردى قارتتار ۇيىنە ورنالاستىرۋ نە بولماسا ولارعا قامقورلىق تانىتۋدى ەرىكتىلەرگە تاپسىرۋ قاجەتتىگىن ايتتى.