عالىمدار بالا كوتەرگىسى كەلگەن بارلىق ايەلدەرگە اسپيرين ىشۋگە كەڭەس بەردى

 استانا. قازاقپارات - بالا كوتەرگىسى كەلگەن ايەلدەر كۇن سايىن اسپيرين ءدارىسىنىڭ تورتتەن ءبىر بولىگىن قابىلداۋ كەرەك، دەپ كەڭەس ەتەدى امەريكا رەپرودۋكتولوگيا قوعامىنىڭ ۆيتسە- پرەزيدەنتى ريچارد پولسون.

اسپيرين قاندى سۇيىلتاتىندىقتان، ول رەپرودۋكتيۆتى ورگاندارعا وتەتىن قان اعىمىن كۇشەيتەدى، ال بۇل بالا كوتەرۋ مۇمكىندىگىن ارتتىرا تۇسەدى، دەپ جازادى The Daily Mail.

وعان قوسا، اسپيرين بالا كوتەرۋگە كەدەرگى بولاتىن قابىنۋدى ازايتادى.

زەرتتەۋ ناتيجەسى بويىنشا، بۇعان دەيىن تۇسىك تاستاپ، جۇيەلى قابىنۋى بار ايەلدەر كۇنىنە 81 ميلليگرامم اسپيرين قابىلداپ، قاتىسۋشىلاردىڭ 17 پايىزى بالا كوتەرگەن. اسپيريندى ىشكەندەردىڭ 20 پايىزىندا جۇكتىلىك مەرزىمى قالىپتى وتكەن.

وسى ارادا، پروفەسسور بالا كوتەرگىسى كەلگەن بارلىق ايەلدەرگە اسپيرين ءىشۋدى كەڭەس ەتەدى. ال اللەرگيامەن اۋىراتىندار مەن اسقازان- ىشەك جولدارى دەرتتەرىنە شالدىققاندارعا ونى ىشۋگە بولمايدى.

الايدا اسپيريننىڭ كۇردەلى كەرى اسەرى دە بار. ونى ءجيى قابىلداعان ءاربىر ونىنشى ادامدا اسقورىتۋ جۇيەسىندە پروبلەمالار تاۋىپ الۋى مۇمكىن. ءتىپتى، ىشتەن قان كەتۋى دە ىقتيمال. دەمىكپە دەرتىنە شالدىققاندار اسپيرين ىشسە، كەيدە ەرىنى، اۋىز قۋىسى، تاماعى ءىسىپ كەتۋى، كەيبىر جاعدايدا اسپيرين گەمورراگيالىق ينسۋلتقا اپارىپ سوقتىرۋى دا عاجاپ ەمەس. سوندىقتان، ونى دارىگەرمەن كەڭەسىپ ءىشۋ كەرەك، دەيدى عالىمدار.