ەلباسى: اكە-شەشەمىزدى قارتتار ۇيىنە اپارىپ تاستاپ ۇيدە قالاي وتىرامىز
«ءبىز قارتاياتىندىعىمىزدى ەشقاشان ويلامايمىز. بارلىعىمىز دا قارت بولامىز. بۇگىن جاسپىز جانە الدىمىزدا مىڭداعان جىل بارداي كورىنەدى. بۇل وتە جىلدام وتەدى، كوز الدىڭا ەلەستەتىپ تە ۇلگەرە المايسىڭ. اسىرەسە، ءبىزدىڭ قازاقتارعا اتا-اناسىنا قامقورلىق جاساۋ دەگەن اتا-بابامىزدان قالعان سالت بولاتىن. قازىر مەن اقساقالداردىڭ ۇيىنە بارىپ، قازاقتىڭ ۇلكەن اتالارى مەن اجەلەرى وتىرعاندا جانىم اۋىرادى. «اقساقال بالالارىڭىز بار ما؟» دەپ سۇراساڭ، «قايتەسىڭ»، دەپ تەرىس قاراپ جىلايدى. سوندا قالاي بولعانى؟ سوندا ءبىز ءوزىمىزدىڭ سالتىمىزدان، عۇرپىمىزدان اجىراعانىمىز با؟ اكە-شەشەمىزدى قارتتار ۇيىنە اپارىپ تاستاپ ۇيدە قالاي وتىرامىز؟»، - دەدى نۇرسۇلتان نازاربايەۆ.
مەملەكەت باسشىسى باتىستا مۇنداي ۇيلەردىڭ بار ەكەندىگىن اتاپ ءوتتى. ءبىراق، ونداعى قارتتار ءوز ۇيلەرىندە سۇحباتتاسار سەرىگى، كورشىلەرى، قاتارلاستارى بولماعاندىقتان ءوز ەرىكتەرىمەن باراتىندىعىن ايتتى.
«قازىر قارتتار ءۇيى مەن بالالار ءۇيىن بىرىكتىرۋ تۋرالى ۇسىنىس ءتۇسىپ جاتىر ەكەن. مۇمكىن مۇنى دا قاراستىرىپ كورگەن ءجون بولار»، - دەدى ق ر پرەزيدەنتى.
اۆتور: مارلان جيەمباي