پرەزيدەنت كۇنى ەلوردادا تەگىن ەكسكۋرسيا ۇيىمداستىرىلادى

استانا. قازاقپارات - 1-3- جەلتوقساندا ەلوردا تۇرعىندارى مەن قوناقتارى ەكى قاباتتى «Red Bus»  ەكسكۋرسيالىق اۆتوبۋستارىمەن استانانىڭ سول جاق جاعالاۋىنا تەگىن ەكسكۋرسيا جاساي الادى، دەپ حابارلايدى قالالىق اكىمدىكتىڭ رەسمي سايتى.

ەكسكۋرسيا «AiLand» (وكەاناريۋم) كوڭىل كوتەرۋ ورتالىعىنان جانە ق ر ۇلتتىق مۋزەيىنەن باستالادى. ول قازاق جانە ورىس تىلدەرىندەگى اۋديوگيدتىڭ كومەگىمەن (ءبىر رەيس - قازاق تىلىندە، ءبىر رەيس - ورىس تىلىندە) اۆتوبۋس سالونىنداعى دىبىس كۇشەيتكىشتەرى ارقىلى وتكىزىلەتىن بولادى.

ەكسكۋرسيانى بەلگىلى ءبىر تىلدە تىڭداۋدى قالايتىندار ءوز قۇلاققاپتارىن اكەلۋى كەرەك. مەرەكەلىك تەگىن سەرۋەندەۋ كەزىندە جولاۋشىلارعا قۇلاققاپتار تاراتىلمايدى. بارلىق سۇراقتاردى 77775557575+، 779099 تەلەفوندارى بويىنشا call-ورتالىققا نەمەسە Instagram الەۋمەتتىك جەلىسىندەگى @redbus.kz پاراقشاسىنا جولداۋعا بولادى.

ءىس-شارا «رۋحاني جاڭعىرۋ» باعدارلاماسى جانە قازاقستان رەسپۋبليكاسىنىڭ تۇڭعىش پرەزيدەنتى كۇنىن مەرەكەلەۋ اياسىندا وتكىزىلەدى.