ەلوردالىق ءبۇلدىرشىن ايازدى كۇنى جۇقا كيىممەن بالاباقشادان دالاعا شىعىپ كەتكەن
بۇل جايىندا قالا تۇرعىنى اسەم ۆاحالا فەيسبۋكتەگى پاراقشاسىندا جازدى، دەپ حابارلايدى قازاقپارات ءتىلشىسى.
«بۇگىن سارىارقا 15 پەن سارىارقا 17 اراسىندا ايازدا ۇستىندە جۇقا كوفتاسى، كولگوتكاسى مەن باتەڭكەسى بار بالانىڭ جىلاپ تۇرعانىن كوردىم. جۇقا كيىممەن جالعىز تۇرعان بالاعا نازار اۋدارماستان قاسىنان ءوتىپ جاتقان ادامدار جاعا ۇستاتتى»، - دەپ اتاپ وتەدى اسەم ۆاحالا.
ونىڭ جازۋىنشا، بالا «Intellectumbala» بالاقشاسىنىڭ تاربيەلەنۋشىسى بولىپ شىققان جانە ونىڭ قىزمەتكەرلەرى دە بالانىڭ ايازدى كۇنى قالاعا قالاي شىعىپ كەتكەنىن ايتا الماعان.
بۇل وقيعاعا وراي استانا قالالىق ءبىلىم باسقارماسى دا پىكىر ءبىلدىردى.
ۆەدومستۆونىڭ باسپا ءسوز حاتشىسى جازيرا اسانوۆانىڭ جازۋىنشا، اتالمىش بالاباقشا ەلوردانىڭ ءبىلىم باسقارماسىنىڭ تىزىمىنە الىنباعان. قىزمەتى دە رەگلامەنتتەلمەگەن بالاباقشا كوتتەدجدە ورنالاسقان، بەينەباقىلاۋ كامەراسى مەن كۇزەتشىسى دە جوق.
«شىنىمەن دە، بالا تاربيەشىنىڭ سالاقتىعىنان دالاعا شىعىپ كەتكەن. اتا-انالارىنان بىزگە شاعىم ءالى تۇسكەن جوق. دەگەنمەن، ءبىز استانا قالالىق ءبىلىم سالاسىن باقىلاۋ دەپارتامەنتىنە اتالعان مەكەمەنىڭ ءبىلىم سالاسىندا قىزمەت جۇرگىزۋگە رۇقساتى بار-جوعىن تەكسەرۋدى ءوتىنىپ، حات جولدادىق. استانا قالالىق ءبىلىم باسقارماسى «كولەڭكەلى بالاباقشالارعا» بالاسىن راسىمدەۋ بارىسىندا قاۋىپ-قاتەر بار ەكەنىن ەسكەرتەدى»، - دەدى ول.
يلليۋستراتسيالىق سۋرەت