وزدەرىنە قول جۇمساپ، ومىرىمەن قوش ايتىسقان مودەلدەردى بىلەسىز بە؟

 استانا. قازاقپارات - سوڭعى ءسان ۇلگىلەرىن الەمگە پاش ەتىپ، جۋرنال مۇقاباسىنا تۇسەتىن مودەل قىزدار مەن جىگىتتەر كۇيزەلىستەرگە بەيىم كەلەدى.

كوپشىلىگى تانىمالدىلىقتىڭ اۋىر جۇگىن ەڭسەرە الماي، ومىرلەرىمەن قوش ايتىسىپ جاتادى. bigpicture.ru سايتىنا سىلتەمە جاساعان NUR. KZ وزدەرىنە قول جۇمساعان مودەلدەردى ۇسىنادى.

راۋدا اتيف

2017-جىلدىڭ 31- ناۋرىزدا وزىنە قول جۇمساعان.

ءسان سالاسىندا «ەڭ ادەمى كوزدەردىڭ» يەسى اتانعان ارۋدىڭ ءمايىتى ستۋدەنتتەر جاتاقحاناسىنداعى بولمەسىنەن تابىلعان.

بويجەتكەندى ومىرىمەن قوش ايتىسۋعا نە يتەرمەلەگەنى ءالى كۇنگە دەيىن جۇمباق.

رەسمي تەرگەۋدىڭ ناتيجەلەرىنە قاراماستان، 21 جاستاعى مودەلدىڭ اكەسى قىزىن ءولتىرىپ كەتكەن دەپ ويلايدى ەكەن.

ۆيۆەكا بابادجي

ءۇندىستاندىق ءسان الەمىنىڭ جۇلدىزى 2010-جىلدىڭ 25- ماۋسىمىندا وزىنە قول جۇمساعان.

مودەل، بولليۆۋد اكتريساسى ۆيۆەكا بابادجي مۋمبايداعى پاتەرىندە ءولى كۇيىندە تابىلىپتى.

مودەلدىڭ جەكە كۇندەلىگىندەگى جازبالار مەن وتباسى مۇشەلەرىنىڭ جاۋاپتارى قايعىلى جاعدايدىڭ ورىن الۋىنا باقىتسىز ماحاببات سەبەپ بولعانىن دالەلدەيدى.

بويجەتكەننىڭ كۇندەلىگىندەگى سوڭعى جازبادا: «گاۋتام، سەن مەنى ءولتىردىڭ...» دەپ جازىلعان.

توم نيكون

2010-جىلدىڭ 18- ماۋسىمىندا قايتىس بولعان. توممەن بولعان جاعداي الەۋمەتتىك جەلىدە كوپ تالقىلاندى.

بوزبالا ميلانداعى ءسان اپتالىعىنا ساناۋلى كۇن قالعاندا وزىنە قول جۇمساعان.

ءسان اپتالىعىندا ول Versace, Giorgio Armani جانە باسقا برەندتەردىڭ كيىمدەرىن كورسەتۋ ءتيىس بولعان.

22 جاستاعى بوزبالانىڭ وزىنە قول جۇمساۋىنا جەكە باسىنىڭ ماسەلەلەرى سەبەپ بولعان دەگەن بولجام بار. وزىنە قول جۇمساماي تۇرىپ، جىگىت قىزىمەن ايىرىلىسقان ەكەن.

توم نيكون GQ مەن Vogue جۋرنالدارىنا تۇسكەن، دوناتەللا ۆەرساچە مەن Louis Vuitton-نىڭ ەرلەر كيىمىنە جاۋاپتى كيم دجونستىڭ سۇيىكتى مودەلى، Burberry ءسان ءۇيىنىڭ ءجۇزى بولعان.

دول كيم

2009-جىلى 19- قاراشا كۇنى كوز جۇمعان.

مودەلدىك مانسابىن 13 جاسىنان باستاعان بويجەتكەن 20 جاسقا جەتكەندە سوزىلمالى كۇيزەلىستەن، ەموتسيونالدى تۇراقسىزدىقتان جانە ۇيقىسىزدىقتان جاپا شەككەن.

وزىنە قول جۇمساماس بۇرىن دول جاقىن قۇربىسىنا حابارلاسىپ، قينالىپ جۇرگەنىن، ارى قاراي قالاي ءومىر سۇرەتىنىن بىلمەيتىنىن حابارلاپتى.

دول كيمدى «ازيالىق كەيت موسس» دەپ اتاعان. ونىڭ مانسابى دا بريتاندىق مودەلدىكى سياقتى تىم جىلدام باستالعان.

كەيبىر تابىنۋشىلارى بويجەتكەننىڭ ومىرىنە ەسىمى اسەر ەتتى دەپ ويلايدى. ونىڭ ەسىمىنىڭ اۋدارماسى «كوپ قايعى» ماعىناسىن بەرەدى ەكەن.

ليۋسي گوردون

قايتىس بولعان كۇنى - 20- مامىر، 2009-جىل.

وزىنە قول جۇمساۋىنىڭ رەسمي سەبەبى - جاقىن دوسىنىڭ وزىنە قول جۇمساۋى بولعان دەپ جاريالانىپتى.

90-جىلداردىڭ سوڭىندا جانە 2000-جىلداردىڭ باسىندا ليۋسي گوردون كوپتەگەن جارنامالارعا ءتۇسىپ، ديزاينەرلەرمەن جۇمىس ىستەگەن. ديزاينەرلەر ونىڭ سول كەزدەردەگى ءسان تالاپتارىنا ساي كەلەتىن كەلبەتىن ۇناتاتىن.

ليۋسي كينو سالاسىندا دا سۇرانىسقا يە بولعان. بويجەتكەن «ورمەكشى ادام-3: كەسكىندەگى بەينە»، «ورىس قۋىرشاقتارى»، «ءتورت قاۋىرسىن» فيلمدەرىنە تۇسكەن، ال سوڭعى جۇمىسى «گەنسبۋر. بۇزاقىنىڭ ماحابباتى» اۆتوبيوگرافيالىق دراماسىندا دجەين بيركين ءرولى بولعان.

رۋسلانا كورشۋنوۆا

2008-جىلدىڭ 28- ماۋسىمىندا قايتىس بولعان.

رۋسلانا كورشۋنوۆانىڭ قايعىلى وقيعاسىن بارشا جۇرت بىلەدى. 21 جاسقا تولۋىنا ساناۋلى كۇن قالعاندا بويجەتكەن مانحەتتونداعى توعىزىنشى قاباتتاعى پاتەرىنىڭ تەرەزەسىنەن قۇلاپ كەتكەن.

رۋسلانانىڭ دوستارى مەن تابىنۋشىلارىن سول كۇنى ول وزىنە قول جۇمسادى ما، الدە قىلمىس ورىن الدى ما دەگەن سۇراق مازالايدى.

قىزدىڭ جاقىندارىنىڭ ايتۋىنشا، وقيعادان بۇرىن بويجەتكەن پاريجدەگى كورسەتىلىمگە قاتىسىپ كەلگەن. رۋسلانا باقىتتى كورىنگەن ەكەن.

رۋسلانانىڭ تانىمال بولۋىنا - ەڭ اتاقتى كومپانيا Nina Ricci-ءدىڭ Nina حوش ءيىسىنىڭ جارناماسىنا ءتۇسۋى سەبەپ بولعان.

بويجەتكەن تۇلعالىق دامۋ ترەنينگىنە قاتىسقاننان كەيىن وزىنە قول جۇمساعان دەگەن بولجام بار.

حەيلي مەري كول

2008-جىلى 11- قاراشادا قايتىس بولعان. حەيليدى الەمگە تانىلعان دەپ ايتۋعا بولمايدى. ءبىراق 2000-جىلدارى ول سۇرانىسقا يە مودەل بولعان.

حەيلي مەري كولدىڭ وزىنە نە سەبەپتى قول جۇمساعانى بەلگىسىز. ول جۋرنالدىڭ مۇقاباسىنا ءتۇسىپ، ءسان كورسەتىلىمىنە قاتىسقان. سونداي-اق، قايعىلى وقيعادان بىرنەشە اي بۇرىن ميلانعا كوشىپ بارىپتى.

ول جاقتا بويجەتكەن مودەلدىك اگەنتتىگىمەن وتە ءتيىمدى كەلىسىمشارتقا قول قويعان.

ناتاشا دۋنكان

2001-جىلدىڭ 23- شىلدەسىندە كوز جۇمعان.

العاشقى plus-size مودەلدەرىنىڭ ءبىرى ناتاشا دۋنكان پسيحولوگيالىق اۋىتقۋلاردان جانە ەموتسيونالدى تۇراقسىزدىقتان جاپا شەككەن. بويجەتكەننىڭ دەنەسىن وزىمەن بىرگە تۇراتىن قىز انىقتاعان.

مارقۇمنىڭ ءىنىسى ناتاشا ولمەي تۇرىپ جىگىتىمەن قيىندىقتار تۋىنداعانىن ايتقان ەكەن.

مارگو حەمينگۋەي

1996-جىلى 1- شىلدەدە وزىنە قول جۇمساعان.

70-90-جىلداردىڭ تانىمال مودەلى جانە جازۋشى ەرنەست حەمينگۋەيدىڭ نەمەرەسى اتاسى ومىرىمەن قوش ايتىسقان كۇننەن ءبىر كۇن بۇرىن ءوز ومىرىنە بالتا شاپقان.

مارگونىڭ مانسابى ونىڭ ۇزىن بويىنىڭ جانە اسەرلى كەلبەتىنىڭ ارقاسىندا ءساتتى باستالعان. قالىڭ، جالپاق قاستارى حەمينگۋەيدىڭ باستى ماقتانىشى بولعان.

سۇرانىسقا يە بولعان قىز مودەلدىك بيزنەستىڭ بارلىق قيىندىقتارىن كورگەن. ءارتۇرلى ديەتالار مەن جاتتىعۋلارمەن ءوزىن قيناپ، اقىرىندا تابەتسىزدىك پەن مەشكەيلىككە شالدىعىپ، ىشىمدىك پەن تىيىم سالىنعان دارىلەرگە قۇمارتقان.

مارگو ءبىرىنشى بولىپ سول كەزدەر ءۇشىن قوماقتى اقشا 1 ميلليون دوللار تاپقان.

1975-جىلى Time جۋرنالى بويجەتكەننىڭ سۋرەتىن مۇقاباسىنا جاريالاپ: «ۇرپاق ءجۇزى جانە امەريكانىڭ ەڭ قالاۋلى مودەلى» دەپ اتاعان.

ءسان سالاسىن باعىندىرعان مارگو حەمينگۋەي كينو الەمىنىڭ جۇلدىزىنا اينالماق بولىپتى. الايدا ونىڭ قاتىسۋىمەن جارىق كورگەن بىرنەشە تۋىندىنى سىنشىلار قاتتى سىنعا العان.

وسى سالاداعى ساتسىزدىكتەر، دەنساۋلىعىنىڭ ناشارلاۋى جانە ەكى ءساتسىز نەكە مودەلدىڭ پسيحولوگيالىق جاعدايىنا اسەر ەتىپ، وزىنە قول جۇمساۋىنا سەبەپ بولعان.

دين بارت پەتيتكلەرك مارگو جايىندا بىلاي دەگەن: «ول رۋحتاردىڭ قايتا جانداناتىنىنا ەشقاشان سەنبەيتىن. ءبىراق افريكا شالعىندارىندا مارگونىڭ كوزدەرى مەن جۇرەگى بار گەپاردتىڭ جۇرگەنىنە سەنىمدىمىن».