قوعام بيۋدجەتتىڭ اشىقتىعىن قالاي باقىلاي الادى
«مەملەكەتتىك بيۋدجەتتى ءتۇسىنۋ وتە قيىن دەگەن تانىم- تۇسىنىك بار. اسىرەسە، قارجىلىق ءبىلىمى جوق ادامدار راسىندا دا، بيۋدجەتتىڭ قىر- سىرىن بىلە بەرمەۋى مۇمكىن. الايدا بيۋدجەت ءاربىر سالىق تولەۋشىگە، ءاربىر ازاماتقا تۇسىنىكتى ءارى اشىق بولۋى كەرەك دەگەن نىق پىكىردەمىن. الەمدىك تاجىريبەدە ازاماتتىق بيۋدجەت دەگەن تۇسىنىك بار. ول نەنى بىلدىرەدى؟ ول بيۋدجەت قىر- سىرىنىڭ ادامدارعا تۇسىنىكتى تىلدە جەتكىزىلگەن فورماتى. 2011 -جىلدان بەرى مىنە، وسى تۇسىنىكتىڭ قازاقستاندا پايدا بولۋىنا كۇش سالىپ كەلەمىز. 2018 -جىلعى بيۋدجەتتىك كودەكستە وسى تۇسىنىك زاڭنامالىق تۇرعىدا ەنىپ، بارلىق مينيسترلىكتەر مەن اكىمدىكتەر ازاماتتىق بيۋدجەتتى جاريالاۋعا مىندەتتەلدى»، - دەيدى شولپان ايتەنوۆا استانادا ءوتىپ جاتقان 8 - ازاماتتىق فورۋمدا.
ونىڭ ايتۋىنا قاراعاندا، ازاماتتىق بيۋدجەت قازاقستانداعى ءاربىر سالىق تولەۋشىگە تۇسىنىكتى بولۋى ءتيىس.
«بيۋدجەتتىڭ اشىقتىعىنا قالاي ىقپال ەتە الامىز؟ ءبىز ءوزىمىزدىڭ ءالسىز جەرىمىزدى انىقتاپ، بەلگىلى ءبىر شەشىمدەردى ۇسىنۋىمىز مۇمكىن. ءبىراق ول ءۇشىن بيۋدجەتتى تۇسىنە ءبىلۋ كەرەك. ءبىز تىلشىلەردى، ازاماتتىق بەلسەندىلەردى، زەرتتەۋشىلەردى جيناپ الىپ، بيۋدجەتتىڭ قالاي قۇرىلاتىنىن، ول قالاي جۇمسالاتىنىن ۇيرەتەمىز. ماسەلەن، پاۆلودارلىق جۋرناليست مايا (بەكبايەۆا) بيىل مەكەنجاي بويىنشا كوپبالالى وتباسىلارعا الەۋمەتتىك كومەك بەرۋدىڭ جاڭا مەحانيزمىن زەرتتەدى. مايا نەنى انىقتادى: ءتىلشى كوپبالالى وتباسىلاردىڭ بىرىندە بالالاردىڭ ءبىرى مۇگەدەك بولسا ولارعا قانداي جاردەماقى بەرىلۋى كەرەكتىگىن زەرتتەپ شىقتى. اقىرىندا، ءبىزدىڭ زەرتتەۋىمىزدىڭ قورىتىندىسى بويىنشا ەڭبەك جانە الەۋمەتتىك قورعاۋ مينيسترلىگىنە كەڭەس جولدانىپ، مۇگەدەك بالاسى بار كوپ وتباسىلار مەكەن- جاي بويىنشا الەۋمەتتىك كومەك الا الاتىنى بەلگىلى بولدى»، - دەيدى ول.
شولپان ايتەنوۆا سول سەكىلدى استانالىق ماقسۇت دەگەن جىگىت «جاستار تاجىريبەسى» باعدارلاماسىن زەرتتەپ شىققانىن ايتىپ ءوتتى. ماقسۇت ءوز زەرتتەۋىندە جوو بىتىرگەنىمەن، جۇمىسسىز جۇرگەن جاستار جۇمىسپەن قامتۋ ورتالىقتارىنان ۋاقىتشا ايلىق الىپ وتىرۋىنا جانە كومپانيالاردا تاجىريبە الۋعا قۇقىلى ەكەنىن انىقتاعان. الايدا بۇل اقپارات جۇمىسپەن قامتۋ ورتالىعىنىڭ سايتىندا تاپشى بولىپ وتىرعان كورىنەدى.
«قۋانىش ەسىمدى ارىپتەسىم فۋتبولدى زەرتتەدى. سوڭعى بەس جىلدا بيۋدجەتتەن فۋتبول كلۋبتارىن قارجىلاندىرۋ ءۇشىن 100 ميلليارد تەڭگە جۇمسالعانىن بىلەسىزدەر مە؟ ول - ءسىز بەن ءبىزدىڭ سالىقتان تۇسكەن قاراجات. مىنە، وسى اقشانى ينفراقۇرىمدى، بالالار فۋتبولىن دامىتۋعا جۇمساماسقا؟ ءدال وسى تاجىريبەسىن يسلانديا قولدانىپ، الەمدىك فۋتبول ليگاسىنىڭ وتىزدىعىنا ەنگەن»، - دەيدى شولپان ايتەنوۆا.
ەسكە سالا كەتسەك، استانادا 8 - ازاماتتىق فورۋم ءوتىپ جاتىر. ەلباسىنىڭ قاتىسۋىمەن وتەتىن اۋقىمدى شارا ەكى كۇنگە سوزىلادى.
اۆتور: ايان بەكەن ۇلى