بەلارۋس پەن قازاقستان بىرلەسىپ ۇشقىشسىز ۇشۋ اپپاراتتارىن قۇراستىرادى
بۇل تۋرالى بەلارۋس پرەمەر-ءمينيسترىنىڭ ءبىرىنشى ورىنباسارى الەكساندر تۋرچين ەكى ەلدىڭ ساۋدا-ەكونوميكالىق ىنتىماقتاستىعى جونىندەگى ۇكىمەتارالىق كوميسسيانىڭ وتىرىسىندا ءمالىم ەتتى، دەپ حابارلايدى قازاقپارات بەلتاعا سىلتەمە جاساپ.
«تاياۋ ۋاقىتتا قازاقستاندا بەلارۋستىك ۇشقىشسىز ۇشۋ اپپاراتتارىن قۇراستىرۋ بويىنشا بىرلەسكەن جوبانى جۇزەگە اسىراتىنىمىز كۇتىلەدى. IT- سالاداعى ءوزارا ىنتىماقتاستىقتىڭ قارقىنى ارتىپ، وسى سالادا بىرلەسكەن باستامالار سانى ارتاتىنىنا ۇمىتتەنەمىز»، - دەپ اتاپ ءوتتى الەكساندر تۋرچين.
«ونەركاسىپتىك كووپەراتسياعا، اۋىل شارۋاشىلىعى مەن كولىك سالالارىنداعى ىنتىماقتاستىققا باسا نازار اۋدارا وتىرىپ، IT، عارىش جانە جوعارى تەحنولوگيالار سالالارىنداعى ينۆەستيتسيالىق ىنتىماقتاستىققا سەرپىن بەرۋ قاجەت دەپ ەسەپتەيمىز»، - دەپ اتاپ ءوتتى ءبىرىنشى ۆيتسە-پرەمەر.
بەلارۋس تارابى ينفراقۇرىلىمدىق جانە ونەركاسىپتىك بىرلەسكەن جوبالارعا بەلسەندى قاتىسۋعا دايىن.
«جىبەك جولى ەكونوميكالىق بەلدەۋىنىڭ دەربەس باعىتى نەمەسە باستامانىڭ ءبىر بولىگى رەتىندە قازاقستان- قىتاي شەكاراسىنداعى «قورعاس-شىعىس قاقپاسى» ەركىن ەكونوميكالىق ايماعى مەن «ۇلى تاس» قىتاي-بەلارۋس يندۋستريالىق پاركىنىڭ الەۋەتىن بىرلەسىپ پايدالانۋ كەرەك»، - دەپ ەسەپتەيدى الەكساندر تۋرچين.
ءوز كەزەگىندە قازاقستان پرەمەر- ءمينيسترىنىڭ ءبىرىنشى ورىنباسارى اسقار مامين دە بەلارۋسپەن وندىرىستىك كووپەراتسيانى كەڭەيتۋدى قولدايتىنىن ءبىلدىردى. ونىڭ ايتۋىنشا، پروبلەمالىق جاعدايلار تالقىلانعان، ەندى كەلىسىمدى تاجىريبەدە جۇزەگە اسىرۋ كەرەك. قازاقستان بەلارۋسپەن قىتاي-ەۋروپا-قىتاي باعىتىنداعى كونتەينەرلىك تاسىمالداۋ كولەمىن ارتتىرۋعا مۇددەلى. بەلارۋس پەن قازاقستان ۇكىمەت وتىرىسىندا 2019-2020-جىلدارعا ىنتىماقتاستىقتى دامىتۋدىڭ جول كارتاسىنا قول قويادى.