وسكەمەندە ارحەولوگيا جانە التاي مادەني مۇراسىنىڭ مۋزەيى اشىلدى
تاريح عىلىمدارىنىڭ دوكتورى، ارحەولوگ عالىم زەينوللا ساماشيەۆ قازاق دالاسى، ونىڭ ىشىندە كەندى التاي ءوڭىرى ەجەلگى مەتاللۋرگيا مەن تاۋ-كەن ءوندىرىسىنىڭ ورتالىعى بولعانىن ەرەكشە اتاپ ءوتتى. كەزىندە ارحەولوگ س. چەرنيكوۆ تە شىعىس قازاقستان ايماعىن بۇكىل ەۋرازيا كەڭىستىگىندەگى قولا قۇيۋ ونەرى دامىعان وڭىرلەردىڭ ءبىرى رەتىندە سيپاتتاعان. عالىمنىڭ ايتۋىنشا، مۇراجاي جادىگەرلەرىنىڭ دەنى شىعىس قازاقستان مەملەكەتتىك ۋنيۆەرسيتەتىنىڭ ستۋدەنتتەرى وسى وڭىردە جۇرگىزگەن ارحەولوگيالىق قازبا جۇمىستارى كەزىندە تابىلعان.
«وسى جەردەن تابىلعان قالايى رۋداسى سوناۋ قوس وزەن بويىنان مەسوپوتامياعا دەيىن تاراعان. قولا داۋىرىندەگى مادەنيەتتىڭ جۇرناقتارى، زاتتاردىڭ ءبارى وڭتۇستىك سىبىرگە تاراپ وتىرعان»، - دەدى ول.
ەلباسىنىڭ «ۇلى دالانىڭ جەتى قىرى» ماقالاسى اياسىندا مۇراجايدى اشۋ جوسپارىنىڭ وزەكتىلىگى ارتا ءتۇسىپ، ءبىر جىلدان استام ۋاقىت دايىندىقتان كەيىن ونىڭ ەسىگى ايقارا اشىلدى. پرەزيدەنت ءوز ماقالاسىندا تاريحىمىز بەن مادەنيەتىمىزگە قاتىستى جەتى باعىتتى انىقتاپ، جۇمىس ىستەۋدى تاپسىردى. سونىڭ ءبىرى - قولا داۋىرىندەگى قازاق حالقىنىڭ ەجەلگى مەتاللۋرگياسى مەن ونەرىنىڭ دامۋىنا بايلانىستى. سونداي-اق اڭ ءستيلى، جىلقىنى قولعا ۇيرەتۋ، التىن ادامعا بايلانىستى بارلىق جادىگەرلەردى جيناستىرىپ، مۋزەي اشۋ تاپسىرماسى بەرىلدى.
«ارىپتەستەرىمنىڭ ءوزىنىڭ تۋعان ولكەسىنىڭ تاريحىنا ۇلكەن ءمان بەرۋى ەرەكشە قۋانىشقا بولەپ وتىر. مۇراجاي ازىرگە كىشكەنتاي بولعانىمەن، وتە جيناقى، مۇندا ارحەولوگيانىڭ بارلىق كەزەڭدەرى قامتىلعان»، - دەدى استاناداعى ۇلتتىق مۇراجايدىڭ ديرەكتورى جاكەن تايماعامبەتوۆ.
مۇراجاي قورىن ۇنەمى تولىقتىرىپ وتىرۋ كوزدەلگەن.