جەڭىس قاسىمبەك كومىر باعاسىن قالاي ارزانداتاتىندىعىن ايتتى

استانا. قازاقپارات - بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ينۆەستيتسيالار جانە دامۋ ءمينيسترى جەڭىس قاسىمبەك كومىر باعاسىن قالاي تومەندەتەتىندىگىن ايتتى، دەپ حابارلايدى قازاقپارات ءتىلشىسى.

وتىرىس بارىسىندا جەڭىس قاسىمبەك استانا قالاسىن مىسالعا كەلتىرە وتىرىپ، كومىر باعاسىن قالاي تۇسىرەتىنىن جان-جاقتى ايتىپ بەردى.

«كومىر رازرەزىندەگى باعا وزگەرمەيدى، ول - 5500 تەڭگە. ترەيدەر باعانى 60-70 پايىزعا تومەندەتەدى، ۇستەمە 2985 تەڭگەدەن 885 تەڭگەگە دەيىن تومەندەيدى دەپ جوسپارلاپ وتىرمىز. ورتاشا العاندا 2100 تەڭگەگە دەيىن ايىرماشىلىق بولادى. شۇباركول رازرەزىنەن استاناعا دەيىن تەمىرجولمەن تاسىمالداۋ شىعىنى 1715 تەڭگەنى قۇرايدى. ستانسالار اراسىنداعى قاشىقتىق 616 شاقىرىم»، - دەدى ول.

ونىڭ ايتۋىنشا، تەمىرجول كولىك شىعىندارى ستانسادان ەستاكاداعا دەيىن 1242 تەڭگەنى قۇرايدى. وعان ۆاگونداردى ستانسادان كومىر ساقتاۋ ورىندارىنىڭ شەكاراسىنا دەيىن جەتكىزۋ، كومىر ساقتاۋ ورىندارىنىڭ شەكاراسىنان ەستاكاداعا دەيىن ءتۇسىرۋ، يەسىنىڭ جول تارماعى بويىنشا ءجۇرۋ، ۆاگونداردى ءتۇسىرۋ شىعىندارى كىرەدى.

«بۇل رەتتە، باعا تومەندەتىلگەن جوق. ءبىز بۇل جەردە باعانى تومەندەتۋگە رەزەرۆتەر بار دەپ ەسەپتەيمىز. سوندىقتان، مونوپولياعا قارسى ورگاننىڭ وسى جاعدايدى زەرتتەۋىن سۇرايمىز. كومىر قويمالارىنداعى ساتۋشىلاردىڭ ۇستەمەسى - 2000 تەڭگە. ولار 25-30 پايىزعا، ياعني، 1500-1700 تەڭگە دەيىن تومەندەتۋگە دايىن. قابىلدانعان شارالاردان كەيىن كومىر باعاسى 1-2 اپتانىڭ ىشىندە استانادا 18 پايىزعا تومەندەيدى دەپ كۇتۋدەمىز. 13600-14500 تەڭگەدەن 11200 تەڭگەگە دەيىن ارزاندايتىن بولادى. ايىرماشىلىعى 2400 تەڭگە»، - دەدى ول.

سونىمەن قاتار ول كومىر قويمالارىنان سوڭعى تۇتىنۋشىعا دەيىن اۆتوموبيل كولىگىمەن كومىر جەتكىزۋدە باعانىڭ قالاي قالىپتاساتىندىعىنا تالداۋ جۇرگىزىلگەنىن ايتتى.

«مىسالى، استانادان تالاپكەرگە دەيىن اۆتوموبيلمەن كومىر قۇنى 15000 تەڭگە بولادى. 1 توننا كومىردى جەتكىزۋ باعاسى 2142 تەڭگە. تاسىمالداۋ قۇنىن قوسقاندا كومىردىڭ باعاسى بۇگىندە تالاپكەردە 15642 تەڭگەگە جەتەدى. باعانى تومەندەتۋ بويىنشا قابىلدانعان شارالاردان كەيىن تالاپكەردەگى سوڭعى تۇتىنۋشىعا جەتەتىن باعا 13242 تەڭگە بولادى. سونداي-اق، يلينكا، قوياندى ەلدىمەكەندەرىنە جەتكىزۋ باعاسىن ەسەپتەدىك»، - دەدى جەڭىس قاسىمبەك.

ەسكە سالايىق، بۇگىن ۇكىمەتتىڭ سەلەكتورلىق رەجىمدەگى وتىرىسىندا ينۆەستيتسيالار جانە دامۋ ءمينيسترى قولعا الىنعان جۇمىستاردىڭ ناتيجەسىندە حالىققا جەتكىزىلەتىن كومىر باعاسى 2,5 - 3 مىڭ تەڭگەگە ارزاندايتىنىن ايتتى.

ال پرەمەر-مينيستر باقىتجان ساعىنتايەۆ كومىر قۇنىن ارزانداتۋ تۇرعىسىندا ۇكىمەت ءوز جۇمىسىن اتقارعانىن، ەندىگىدە، ولاردىڭ حالىققا جەتكىزىلۋى اكىمدەرگە بايلانىستى ەكەندىگىن اتاپ ءوتتى.