بالالار ەۋروۆيدەنيەسى بايقاۋىنىڭ جەڭىمپازى بەلگىلى بولدى
بيىلعى بايقاۋعا 20 ەلدەن جاس ورىنداۋشىلار قاتىسقان بولاتىن. بۇل كونكۋرستا قازاقستان العاش رەت باق سىناپ وتىر. سايتتا بەرىلگەن داۋىستاردىڭ بارلىعى ەسكەرىلىپ، ولار ۇپاي رەتىندە ەسەپتەلدى. كورەرمەننىڭ ونلاين داۋىس بەرۋى بارىسىندا جينالعان ۇپايلار - قاتىسۋشىعا بەرىلگەن باعانىڭ جارتىسى عانا، ودان بولەك ءار ەلدەن كەلگەن ءادىلقازى القاسى (القا قۇرامىندا 3 ەرەسەك، 2 بالا بولادى) دا ۇپاي بەرىپ، كونكۋرسانتتىڭ ونەرىن باعالايدى.
فينالدا ءار ەلدىڭ وكىلدەرى ءادىلقازى القاسى مۇشەلەرىنىڭ قالاي داۋىس بەرگەنىن جاريالاپ وتىردى. ايتالىق، قازاقستان ءوزىنىڭ 12 ۇپايىن (ماكسيمالدى داۋىس سانى) «Doma» ءانىن ناقىشىنا كەلتىرىپ ورىنداعان ماكەدونيالىق ۇمىتكەر ماريا سپاسوۆسكاياعا بەردى. ءادىلقازىلار بەرگەن 68 ۇپايمەن قازاقستاندىق دانەليا تولەشوۆا 8-ورىنعا تابان تىرەدى.
تەلەكورەرمەندەردىڭ داۋىس بەرۋ ناتيجەسى بويىنشا دانەليا 103 ۇپاي جينادى. بۇل كورەرمەننىڭ داۋىس بەرۋ كورسەتكىشىندە 3-ورىندى بىلدىرەدى. داۋىس سانى مەن ءادىلقازى القاسى بەرگەن ۇپاي سانى بويىنشا قازاقستاندىق قاتىسۋشى 171 ۇپايمەن 6-ورىنعا تابان تىرەدى.
بالالار ەۋروۆيدەنيەسى بايقاۋىندا باس جۇلدەنى 215 ۇپاي جيناعان پولشالىق روكسانا ۆەنگەل جەڭىپ الدى. ونىڭ ىشىندە 136 ۇپاي - كورەرمەندەر بەرگەن داۋىس سانىنىڭ ۇلەسى.
ءبىز مۇنىڭ الدىندا جەرەبە بويىنشا قازاقستاندىق ۇمىتكەر دانەليا تولەشوۆا ءۇشىنشى بولىپ ونەر كورسەتەتىنىن جازعان ەدىك.
اۆتور: جانات قاپالبايەۆا