ەلورداداعى ءبىر كەزدەگى ەڭ ءزاۋلىم قوناق ءۇي نەگە پوليتسەيلەرگە بەرىلدى

استانا. قازاقپارات - «Ramada Plaza» قوناق ءۇيى استانا پوليتسيا دەپارتامەنتى ءۇشىن «ماي شەلپەك» ەمەس پە؟» بۇل سۇراققا حابار ارناسىنداعى «اشىق ديالوگ» باعدارلاماسىندا ق ر اقپارات جانە كوممۋنيكاتسيالار ءمينيسترى داۋرەن ابايەۆ جاۋاپ بەردى، دەپ حابارلايدى قازاقپارات.

باعدارلاما بارىسىندا جۇرگىزۋشى استانا پوليتسيا دەپارتامەنتىنىڭ قىزمەتكەرلەرى بۇرىنعى «Ramada Plaza» قوناق ۇيىنە كوشۋىنە بايلانىستى سۇراق قويدى.

«بۇل قوناق ءۇيدىڭ ءبىر كەزدەرى قازاقستاننىڭ جاڭا استاناسىنىڭ ەڭ ءزاۋلىم قوناق ءۇيى بولعانىن بىلەمىز. الەۋمەتتىك جەلىدە وسى ماسەلەگە بايلانىستى «بيۋدجەتتەگىلەر ءۇشىن بۇل عيمارات تىم «ماي شەلپەك» بولىپ كەتكەن جوق پا؟» دەگەن سۇراققا قاتىستى اڭگىمە ءورىپ ءجۇر»، - دەدى باعدارلاما جۇرگىزۋشىسى.

بۇل سۇراققا جاۋاپ بەرگەن اقپارات جانە كوممۋنيكاتسيالار ءمينيسترى داۋرەن ابايەۆ ىشكى ىستەر دەپارتامەنتىنىڭ عيماراتىنىڭ سالىنعانىن وتە كوپ ۋاقىت بولعانىن ەسكە سالدى.

«قالالىق پوليتسيا دەپارتامەنتىنىڭ قازىرگى عيماراتى پوليتسيا قىزمەتكەرلەرىنىڭ بۇگىنگى سانىنا ەسەپتەلمەي سالىنعانىن ايتا كەتۋ كەرەك. ءوزىڭىز بىلەتىندەي، قالا بىرنەشە ەسەگە ءوستى. حالىقتىڭ سانى ميلليوننان اسىپ كەتتى. بۇگىنگى تاڭدا قالالىق پوليتسيا دەپارتامەنتىنىڭ قىزمەتكەرلەرى وتە تار كابينەتتەردە جۇمىس ىستەپ جاتىر. بۇل دا قىزمەتكەرلەردىڭ كوڭىل- كۇيىنە، ءتىپتى بالكىم ولاردىڭ جۇمىس ساپاسىنا دا اسەر ەتۋى ىقتيمال. پوليتسيا قىزمەتكەرلەرىنىڭ ساپالى جۇمىس اتقارۋىنا جاعداي جاساۋىمىز كەرەكتىگىن ەسكەرۋىمىز قاجەت. ول ءۇشىن ءتيىستى عيمارات بولۋى كەرەك ەدى»، - دەيدى داۋرەن ابايەۆ.

ءمينيستردىڭ ايتۋىنشا، ۇلكەنىرەك عيماراتقا كوشۋ ءۇشىن بەلگىلى ءبىر نىساندى جالعا الۋ كەرەك. ال ونى جالعا الۋ بيۋدجەتكە تاعى سالماق تۇسىرەدى.

«ال قالانىڭ بالانسىندا «Ramada Plaza» قوناق ءۇيى بار. ال مەملەكەت بولسا، قوناق ءۇي بيزنەسىنىڭ ۇزدىك باسقارۋشىسى ەمەس ەكەنىن تۇسىنەتىن بولارسىز. مىنە، سوندىقتان وتەلدى ساتۋ نەمەسە باسقا ماقساتتا پايدالانۋ كەرەك. نىسان ەسكى ورتالىقتا ورنالاسقانىن ەسكەرە وتىرىپ، 20 جىل بۇرىنعى عيماراتتى جوعارى باعاعا ساتۋ - مۇمكىن بولمايدى. سول سەبەپتى ول عيماراتقا قالالىق پوليتسيا دەپارتامەنتىن كىرگىزۋ - بالكىم وڭتايلى شەشىم»، - دەپ ءتۇيدى داۋرەن ابايەۆ.

ەسكە سالا كەتسەك، بۇعان دەيىن ىشكى ىستەر ءمينيسترى قالمۇحانبەت قاسىموۆ استانا قالاسىنىڭ پوليتسيا دەپارتامەنتى Ramada Plaza قوناق ۇيىنە ورنالاساتىنىن حابارلاعان بولاتىن.