بەردىبەك ساپاربايەۆ مۇنايشىلاردىڭ جالاقىسىن كوتەرۋدى ۇسىندى

اقتوبە. قازاقپارات - اقتوبە وبلىسىنىڭ اكىمى بەردىبەك ساپاربايەۆ وڭتۇستىك كورەياعا ساپارى كەزىندە مۇناي كومپانيالارىنىڭ باسشىسىمەن كەزدەستى.

كەزدەسۋدە جۇمىسشىلاردىڭ جالاقىسىن كوتەرۋدى ۇسىندى، دەپ حابارلايدى قازاقپارات ءتىلشىسى.

اقتوبە وبلىسىنىڭ اكىمى بەردىبەك ساپاربايەۆ وڭتۇستىك كورەياعا جۇمىس ساپارىمەن بارىپ، وڭتۇستىك كورەيانىڭ «KNOC» مۇناي-گاز كورپوراتسياسىنىڭ ۆيتسە-پرەزيدەنتى شيم دجوەحۋنمەن كەزدەستى. بۇل كومپانيا اقتوبەدەگى «التيەس پەترولەۋم ينتەرنەشنل ب. ۆ» ا ف ك جانە «Aدا ويل» ج ش س- نە يەلىك ەتەدى. كەزدەسۋدە كەلىسىمشارت مىندەتتەمەلەرىن ورىنداۋ ءسوز بولدى.

«التيەس» جانە «ادا ويل» ءبىزدىڭ وبلىس ايماعىندا شامامەن 12 جىلدان بەرى جۇمىس ىستەيدى. جىل سايىن 400 مىڭ توننا مۇناي وندىرەدى. جۇمىس جاقسى ءجۇرىپ جاتىر. ءبىراق ينۆەستيتسيا كولەمى، جەرگىلىكتى كادرلاردى دايارلاۋ، تاۋارلاردى ساتىپ الۋداعى وتاندىق ۇلەستى قامتۋ جانە الەۋمەتتىك جاۋاپكەرشىلىك بويىنشا كەلىسىمشارت مىندەتتەمەلەرى تولىق ورىندالماي وتىر»، - دەدى وبلىس اكىمى بەردىبەك ساپاربايەۆ.

كەزدەسۋدە قاراپايىم جۇمىسشىلار مەن باسشىلار اراسىنداعى جالاقى ايىرماسىن ازايتۋ ماسەلەسىن كوتەرىلدى.

«ەڭ از جالاقى الاتىن جۇمىسشىلاردىڭ جالاقىسىن كوتەرۋ كەرەك. ەلباسىنىڭ ءتيىستى بۇيرىعى بار. ءبىز بارلىق كاسىپكەرلەرمەن جالاقىنى كوتەرۋ تۋرالى كەلىسسوز جۇرگىزىپ جاتىرمىز. مەن «KNOC» باسشىلارىنان وسى ۇسىنىستى قولداۋعا جانە اقتوبە وبلىسىنىڭ اۋماعىندا جۇمىس ىستەيتىن كاسىپورىن باسشىلارىنا نۇسقاۋ بەرۋدى سۇرايمىن»، - دەدى بەردىبەك.

«KNOC» ۆيتسە- پرەزيدەنتى شيم دجوەحۋن كەلىسىمشارتتاعى مىندەتتەمەلەردى ورىنداۋعا ۋادە بەردى.

2017 -جىلدىڭ مامىر ايىندا اقتوبە وبلىسىنىڭ اكىمى «KNOC» كومپانياسىنىڭ پرەزيدەنتى كيم دجۋنگ رەمەن «التيەس پەترولەۋم ينتەرنەشنل ب. افك جانە «ادا ويل» ج ش س-نىڭ جاعدايىن تالقىلادى. كەلىسسوزدەردىڭ ناتيجەسىندە ەكى كومپانيا اقتوبە وبلىسىنا تىركەلىپ، وندىرىستىك قىزمەتىن ىسكە اسىردى. بۇرىن مۇناي كومپانيالارى اقتوبەدە قارا التىن وندىرگەنىمەن، الماتى وبلىسىندا تىركەۋدە تۇرعان بولاتىن.