جۇكتى كەزىندە اناسى ىشىمدىك ىشسە بالاعا قانداي اسەرى بولادى؟
دارىگەرلەر تەز ارادا شارا قولدانۋ كەرەك دەپ دابىل قاعۋدا. سوراقىسى، بەسىكتەن بەلى شىقپاعان كەي بالالاردى ىشىمدىككە اۋەس ەتەتىن ءوزىنىڭ اتا- انالارى.
وسىلايشا، ەش كۇناسى جوق بالاقايلار اشى سۋدىڭ قۇربانى بولۋدا. ەڭ كىشكەنتاي ءبۇلدىرشىننىڭ جاسى نەبارى ەكى ايدا عانا بولعان ەكەن. بۇل تۋرالى ەۋرازيا ءبىرىنشى ارناسى حابارلايدى.
ب ۇ ۇ ساراپشىلارىنىڭ جۇرگىزگەن زەرتتەۋى ناتيجەسىنە سۇيەنسەك، الكوگولدى ىشىمدىككە تاۋەلدى ەلدەر تىزىمىندە قازاقستان العاشقى وندىقتا. ءار جانعا 11 ليتر اشى سۋدان كەلەدى ەكەن. ءبىراق، سوراقىسى ول ەمەس. كورسەتكىشتى كامەلەت جاسىنا تولماعان بالالار دا تولىقتىرۋى بەك مۇمكىن. ونى ناركولوگ-دارىگەرلەر دە راستاپ وتىر. ولاردىڭ سوزىنشە، سپيرتتى ىشىمدىكتەرگە كوبىنە پسيحيكاسىندا اۋىتقۋى بار بۇلدىرشىندەر اۋەس كەلەدى ەكەن.
«ماعان ءارتۇرلى جاستاعى ناۋقاستار قارالادى. ماسەلەن، 10-12 جاستاعى بالالار دا كەلەدى. الايدا، ءبىر رەت مەندە ەندى عانا تۋىلعان ءسابي دە ەمدەلگەن. ونىڭ اناسى جۇكتى بولعاندا، ىشىمدىككە جاقىن بولىپتى. وسىلايشا، بالاسى دا الكوگوليزمگە شالدىعىپ دۇنيەگە كەلگەن» - دەيدى ناركولوگ ۆالەنتينا گنينەنكو.
جاسوسپىرىمدەردىڭ بۇگىنگى سيقى وسى. ىشىمدىككە سىلقيا تويىپ العان ولار نە ايتىپ تۇرعاندارىن وزدەرى تۇسىنبەيدى. ءبىراق، سوراقىسى سول، كوپ جاعدايدا كىنانىڭ ءبارى تەك بالالاردان بولا بەرمەيدى.
جەلىدە تاراعان ءبىر بەينەجازبادا بەسىكتەن بەلى شىقپاعان ەكى ءبۇلدىرشىندى تۋعان اكەسىنىڭ ءوزى ىشكىزۋدە. ال ستەپنوگور قالاسىنداعى وقيعا ءتىپتى جاعاڭىزدى ۇستاتادى. نەبارى ەكى ايلىق سابيىنە ءۇش كۇن قاتارىنان شاراپ ىشكىزگەن بەزبۇيرەك اكە، ونى ءولتىرىپ العان ەدى. وكىنىشتىسى، مۇنداي جايتتار ءبىر- ەكەۋ ەمەس، ونداپ، ءتىپتى جۇزدەپ سانالادى. سوندا ولارعا جازا جوق پا؟
«كامەلەت جاسىنا كەلمەگەن بالا قوعامدىق جەردە ماسكۇنەمدىككە بايلانىستى اراق- شاراپ ىشسە، بۇل جاعدايلاردا اتا- اناسى اكىمشىلىك جاۋاپكەرشىلىككە تارتىلادى. جانە دە اكىمشىلىك جاۋاپكەرشىلىككە تارتىلعان كەزدە ايپپۇل تولەيدى. بالا ءوزىنىڭ پاتىرىندە نەمەسە ءوز ۇيىندە ماسكۇنەمدىككە بايلانىستى اراق شاراپ ىشسە، بۇل جاعدايلاردا قانداي بولادى؟ بۇنداي جاعدايلار زاڭنامادا تىكەلەي كورسەتىلمەگەن» - دەيدى زاڭگەر ايسانا سمان.
ەلىمىزدەگى ەڭ كىشكەنتاي اراققۇمارلاردىڭ ءبىرى - وسكەمەندە تۇرادى. ءوزى نەبىرى التى جاستا. ءارىپ تانىمايدى، دۇرىس سويلەي دە المايدى. ءبىراق، اشى سۋعا ابدەن ۇيرەنگەن. ال الكوگولدى ىشىمدىككە تاۋەلدى بالالار بويىنشا كوشتى الماتى مەن شىعىس قازاقستان وبلىستارى باستاپ تۇر ەكەن.
وسىلايشا، ەلىمىزدە ءالى وڭ- سولىن اجىراتا الماعان بالالار الكوگولدىڭ نە ەكەنىن ەرتە تانىپ- بىلۋدە. ءبىراق، بەسىكتەن بەلى شىقپاعانداردىڭ قانشاسىنىڭ وعان قۇمار ەكەنى جايلى ءالى ناقتى ستاتيستيكا جوق. ال، دارىگەرلەردىڭ ايتۋىنشا، پەرزەنتىنىڭ ىشىمدىككە اۋەستىگىن مويىنداعىسى كەلمەيتىن اتا- انالار بارشىلىق ەكەن. ءبىراق، اۋرۋدى جاسىرماي، ونى تەز ارادا ەمدەۋ كەرەك. سەبەبى، مۇنىڭ سوڭى ۇلكەن قاسىرەتكە الىپ كەلۋى ابدەن مۇمكىن دەيدى ولار.
