عالىمدار قاتەرلى ىسىك جاسۋشالارىن جوياتىن قانتتى انىقتادى

استانا. قازاقپارات - ۇلىبريتانيالىق عالىمدار ونكولوگيالىق اۋرۋلارمەن كۇرەسكە ارنالعان امبەباپ قۇرالدى تاپتى. مۇنداي ءدارى ماننوزا اتالاتىن قانتتى الماستىرعىشتاردىڭ ءبىرى بولىپ شىقتى.

بۇل تۋرالى Nature جۋرنالى حابارلايدى.

ماننوزا سەمىزدىكتىڭ الدىن الىپ قانا قويماي، قاتەرلى ىسىكتىڭ ءوسۋىن باياۋلاتىپ، حيميوتەراپيانىڭ تيىمدىلىگىن ارتتىرادى.

«قاتەرلى ىسىك جاسۋشالارى گليۋكوزانى كوپتەپ تۇتىنادى، ءوز كەزەگىندە مۇنى قاتەرلى ىسىكتى جويۋ ءۇشىن قولدانۋعا بولادى. ءبىز قاتەرلى ىسىك دەنەلەرى ماننوزانى «قورىتا المايتىنىن» انىقتادىق. بۇل ونىڭ ءوسۋىن باياۋلاتادى جانە ساۋ جاسۋشالارعا اسەر ەتپەيدى» ، - دەيدى زەرتتەۋشىلەردىڭ ءبىرى.

سونىمەن قاتار عالىمدار اتالعان قانت الماستىرعىشتىڭ پايداسى بار بولسا دا، ونكولوگيالىق دەرتكە شالدىققان ادامدارعا ونى وزدىگىنەن قابىلداۋعا بولمايتىنىن ايتتى. قانتتىڭ ادام ورگانيزمىنە اسەرىن انىقتاۋ ءۇشىن، ءبىر جىلدىق كلينيكالىق زەرتتەۋ ازدىق ەتەدى.