شاكەن ايمانوۆ اتىنداعى حالىقارالىق كينوفەستيۆال اشىلدى

 الماتى. قازاقپارات - الماتىدا كينو جۇلدىزدارى شاكەن ايمانوۆ اتىنداعى كينوفەستيۆالدىڭ قىزىل كىلەمىندە ءجۇرىپ ءوتتى، دەپ حابارلايدى قازاقپارات ءتىلشىسى.

اتاپ وتكەن ءجون، بۇعان دەيىنگى كينوفەستيۆالدەر «شاكەن جۇلدىزدارى» اتاۋىمەن وتكەن. قىزىل كىلەمدە كينوفەستيۆال پرەزيدەنتى ءاسانالى اشىموۆپەن بىرگە قازاقستاندىق كينو جۇلدىزدارى جانە شەتەلدىك قوناقتار: تۇركىمەن كينورەجيسسەرى حودجاكۋلي نارليەۆ پەن تانىمال تۇركىمەن اكتريساسى مايا ايمەدوۆا، اۋعان رەجيسسەرى سيدديك بارماك، ازەربايجان رەجيسسەرى وكتاي ميركاسيموۆ، قىرعىز رەجيسسەرى بولوت شامشيەۆ جانە امەريكالىق اكتەر پيتەر سكارلەت ءوتتى.

كينوفەستيۆالدىڭ اشىلۋ سالتاناتىندا ءاسانالى ءاشىموۆ شاكەن ايمانوۆتىڭ 20 جىل بويى م. اۋەزوۆ تەاترىندا ەڭبەك ەتكەنىن، سوندىقتان دا بيىلعى فەستيۆالدى تەاتردا وتكىزۋدى ۇيعارعانىن جەتكىزدى. ءوز كەزەگىندە ق ر مادەنيەت جانە سپورت ءمينيسترى ارىستانبەك مۇحامەدي ۇلى ش. ايمانوۆ ەڭبەكتەرىن ناسيحاتتاپ جۇرگەن ءاسانالى اشىموۆكە العىس ءبىلدىردى. «ش. ايمانوۆ ەسىمىن ۇمىتتىرماۋ ءۇشىن ءاسانالى اعا تەر توگىپ كەلەدى. كەي جىلدارى قارجىلىق قيىندىقتار بولعاندا دا، ءاسانالى اعا فەستيۆالدى وتكىزۋگە بار كۇش- جىگەرىن ارنادى. فەستيۆالدىڭ شاكەن ايمانوۆ شىعارماشىلىق جولىن باستاعان تەاتردا ءوتۋى دە قۋانتادى. بارشاڭىزدى كينوفەستيۆالدىڭ اشىلۋىمەن قۇتتىقتايمىن» ، - دەدى مينيستر.

 سونىمەن بىرگە، شاكەن ايمانوۆ كينوفەستيۆالىنىڭ ءوز كيەلى اعاشى تانىستىرىلدى. ق ر مادەنيەت جانە سپورت ءمينيسترى ارىستانبەك مۇحامەدي ۇلى، ءاسانالى ءاشىموۆ، الماتى اكىمىنىڭ ورىنباسارى ارمان قىرىقبايەۆ جانە ەرمەك تۇرسىنوۆ اعاش بۇتاقتارىنا تىلەك جازىلعان اق لەنتا بايلادى. فەستيۆالدىڭ كونكۋرستىق باعدارلاماسى ءۇش بولىمنەن تۇرادى. كورەرمەندەر الەمدىك، قازاقستاندىق جانە تۇركىتىلدەس ەلدەردىڭ تولىقمەتراجدى فيلمدەرىن تاماشالاي الادى.

 اۆتور: مايا تەنيزبايەۆا