ەلباسى: «بولاشاق» ستيپەندياسى دۇنيەجۇزىنە تانىلعان قازاقستاندىق برەندكە اينالدى
بۇل تۋرالى استانادا ءوتىپ جاتقان «ادامي كاپيتال - جاڭعىرۋ نەگىزى» اتتى فورۋم قاتىسۋشىلارىنا پرەزيدەنت نۇرسۇلتان نازاربايەۆتىڭ جولداعان قۇتتىقتاۋىندا ايتىلعان، دەپ حابارلايدى قازاقپارات ءتىلشىسى.
«بولاشاق» حالىقارالىق ستيپەندياسىنىڭ 25 جىلدىعىنا ارنالعان فورۋم بارىسىندا مەملەكەت باسشىسىنىڭ قۇتتىقتاۋىن ق ر مەملەكەتتىك حاتشىسى گۇلشارا ءابدىقالىقوۆا وقىپ بەردى.
«سىزدەردى «بولاشاق» حالىقارالىق ستيپەندياسىنىڭ 25 جىلدىعى مەرەيتويىمەن شىن جۇرەكتەن قۇتتىقتايمىن. شيرەك عاسىردان بەرى ەلىمىزدىڭ تالانتتى جاستارىنا قولداۋ كورسەتىپ كەلە جاتقان «بولاشاق» ستيپەندياسى دۇنيەجۇزىنە تانىلعان قازاقستاندىق برەندكە اينالدى. ءبىز سوناۋ 1993-جىلدان بەرى 13 مىڭ جاستىڭ شەتەلدە ءبىلىم الۋىنا جاعداي جاساپ، ولاردىڭ زامان تالابىنا ساي بىلىكتى مامان بولۋىنا جول اشتىق. بۇگىندە «بولاشاق» ستيپەندياسىمەن وقىپ كەلگەن تۇلەكتەر ءبىلىم بەرۋ، دەنساۋلىق ساقتاۋ، مادەنيەت، عىلىم جانە تەحنيكا سالالارىندا جۇزدەگەن عىلىمي ازىرمەلەر مەن ءىرى جوبالاردى جۇزەگە اسىرىپ، زور جەتىستىكتەرگە جەتىپ وتىر»، - دەلىنگەن پرەزيدەنتتىڭ قۇتتىقتاۋ حاتىندا.
ەلباسى قۇتتىقتاۋىندا «بولاشاق» ارقىلى ءبىلىم العان كارديولوگتار 33 مىڭنان استام ادامنىڭ جۇرەگىنە وتا جاساپ، ەمدەۋدىڭ 1700 دەن اسا حالىقارالىق ستاندارتى مەن الگوريتمىن ەنگىزگەنى اتاپ وتىلگەن.
«جاس ينجەنەرلەر ەنەرگەتيكا سالاسىندا باسقارۋدىڭ اۆتوماتتاندىرىلعان جۇيەسىن دامىتىپ، ءىرى ونەركاسىپ نىساندارىندا پايدالانۋ ءۇشىن ءموبيلدى روبوتتار، گيبريدتى پلاتفورمالار قۇراستىردى. سونداي-اق ولار تابيعاتتى قورعاۋ، ەكولوگيالىق ورتانى ورنىقتى دامىتۋ ءۇشىن بىرەگەي تەحنولوگيالاردى ەنگىزۋ ماسەلەلەرىنە اسا كوڭىل ءبولىپ وتىر. قازاقستاننىڭ بولاشاعى - سىزدەردىڭ جەتىستىكتەرىڭىزگە، ەلدىڭ جاڭعىرۋىنا قوسقان ۇلەستەرىڭىزگە تىكەلەي بايلانىستى. ءبىلىمدى يمپورتتاۋدىڭ ءتيىمدى ەكەنىن ۋاقىتتىڭ ءوزى دالەلدەدى. الەم ءتورتىنشى ونەركاسىپتىك ريەۆوليۋتسيا داۋىرىنە قادام باسقان كەزەڭدە ءبىزدىڭ الدىمىزعا جاڭا تالاپتار قويىلۋدا»، - دەلىنگەن حاتتا.
نۇرسۇلتان نازاربايەۆ بولاشاقتىقتاردىڭ ءبىلىمى مەن بىلىگى، الەمنىڭ وزىق ەلدەرىنەن العان ومىرلىك جانە كاسىبي تاجىريبەسى ءتيىمدى پايدالانىلۋى تيىستىگىن ايتتى.
«بولاشاق» ستيپەندياسى تۇلەكتەرىنىڭ ءبىلىمى مەن تاجىريبەسى جاسامپازدىققا ۇمتىلعان بارلىق قازاقستاندىقتارعا ۇلگى بولۋى كەرەك. فورۋمعا قاتىسۋشىلارعا الەمدىك ترەندتى تالقىلاپ، ءاردايىم جاڭا جول تاۋىپ، بيىك بەلەستەردى يگەرۋگە شاقىرامىن. بارشاڭىزعا مول تابىس پەن ساتتىك تىلەيمىن»، - دەدى پرەزيدەنت.
ايتا كەتسەك، ەلباسىنىڭ باستاماسىمەن «بولاشاق» حالىقارالىق ستيپەندياسى 1993-جىلدان باستاپ بەرىلە باستاعان ەدى. 25 جىلدىڭ ىشىندە 13 مىڭنان استام ستيپەنديا تاعايىندالدى. ولاردىڭ 10 مىڭنان استامى بۇگىندە وقۋلارىن ءتامامداعان.