رامىزدەرىمىزگە قۇرمەت سەزىمىن قالىپتاستىرۋداعى جۇمىستاردى جۇيەلى جۇرگىزۋ قاجەت - مەملەكەتتىك حاتشى
«مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيا وزىنە جۇكتەلگەن سالانىڭ جۇمىسىن ۇيلەستىرەتىن باستى مەملەكەتتىك ءارى قوعامدىق ينستيتۋت رەتىندە ءتيىمدى ىستەر اتقارىپ جاتىر. وسىعان دەيىن ورىندالعان جۇمىستاردىڭ ناتيجەسى كورسەتىپ وتىرعانداي، سالادا بەلگىلى رەتتىلىك قالىپتاستى»، - دەپ اتاپ ءوتتى وتىرىستى اشقان مەملەكەتتىك حاتشى.
وسى رەتتە ول ازاماتتاردىڭ مەملەكەتتىك رامىزدەرگە دەگەن قۇرمەت سەزىمىن قالىپتاستىرۋ باعىتىندا اقپاراتتىق ءتۇسىندىرۋ جۇمىستارىن جۇيەلى تۇردە ىلگەرىلەتۋ، پاتريوتتىق تاربيەنىڭ ءرولىن اسىرەسە جاستار اراسىندا ودان ارى جالعاستىرۋ قاجەتتىگىنە باسا نازار اۋدارتتى.
«ەلباسى نۇرسۇلتان نازاربايەۆ تاياۋداعى جولداۋىندا: «ءاربىر قازاقستاندىق جۇرگىزىلىپ جاتقان رەفورمالاردىڭ ءمانىن، ولاردىڭ وتانىمىزدى وركەندەتۋ جولىنداعى ماڭىزىن جەتە ءتۇسىنۋى ءتيىس. رەفورمالاردى تابىستى جۇزەگە اسىرۋ ءۇشىن قوعامىمىزدىڭ ورتاق ماقساتقا جۇمىلۋى اسا ماڭىزدى» دەپ اتاپ وتكەن بولاتىن. ول - قازاقستان ازاماتتارىنىڭ ەل مەن جەرگە، وتانعا دەگەن قۇرمەتىنىڭ ارتۋى، تاۋەلسىزدىگىمىزدىڭ نىعايۋىنا ىقپال ەتۋى»، - دەدى گۇلشارا ءابدىقالىقوۆا.
وتىرىستا ق ر جوعارعى سوتىنىڭ، جامبىل، الماتى، پاۆلودار وبلىستارى اكىمدىكتەرىنىڭ مەملەكەتتىك رامىزدەردى ناسيحاتتاۋ باعىتىندا اتقارىپ جاتقان جۇمىستارىنىڭ ناتيجەسى تىڭدالدى. سونىمەن قاتار ينۆەستيتسيالار جانە دامۋ، مادەنيەت جانە سپورت مينيسترلىكتەرىنىڭ ۆەدومستۆولىق ناگرادالاردى بەكىتۋ تۋرالى ۇسىنىستارى قارالدى.