ميلليونەر بولعىڭىز كەلە مە
شىندىعىندا دا دا سولاي. مۇمكىنشىلىك تە كوپ. ماسەلەن، قازاق ميلليونەرلەرىنىڭ قاتارىنان كورىنگىڭىز كەلسە «حابار» ارناسىنداعى «ميلليون كىمگە بۇيىرادى؟» باعدارلاماسىنا قاتىسىپ، باعىڭىزدى سىناپ كورگەنىڭىز ءجون.
بۇل باعدارلاما «حابار» ارناسىنىڭ ەكرانىندا قازاق تىلىندە 2004 -جىلى شىققان ەدى. ەكى جىلعا سوزىلعان باعدارلاما بارىسىندا مىڭداعان قازاقستاندىق ءوز بىلىمدەرىن سىنادى. ال اعىمداعى جىلدان باستاپ قايتا ەفيرگە جول تارتقان تەلەشوۋدىڭ بىردەن- ءبىر ەرەكشەلىگى جۇلدە قورى 2 ەسەگە ۇلعايتىلىپ، 10 ميلليون تەڭگەگە جەتىپ وتىر. سونىمەن قاتار «كۇيمەيتىن» قارجى قورى دا ءوستى، ءبىرىنشى «كۇيمەيتىن» قارجىدا قاتىسۋشى 20 مىڭ تەڭگەگە يە بولادى. ال ەكىنشى «كۇيمەيتىن» قارجى 300 مىڭ تەڭگەگە جەتتى. وزگەرمەگەن ءبىر نارسە، بۇل ويىن ەرەجەسى. تانىمال جۇرگىزۋشى، جۋرناليست دوسىمبەك وتەعاليەۆ جۇرگىزەتىن تەلەشوۋعا كەلگەن 10 ادامنان 1 ويىنشى تاڭدالىپ، 15 سۇراققا دۇرىس جاۋاپ بەرسە ميلليونەر اتانادى.
ءار ويىنشىعا ءۇش جەڭىلدىك بەرىلەدى: «50/50» - كومپيۋتەر جاۋاپتىڭ ەكى قاتە نۇسقاسىن الىپ تاستايدى؛ «دوسقا قوڭىراۋ شالۋ» - ويىنشى دوسىنا قوڭىراۋ شالىپ، 30 سەكۋندتىڭ ىشىندە اقىلداسا الادى؛ «كورەرمەن كومەگى» - زالداعى ءار كورەرمەن ءوزى دۇرىس دەپ ەسەپتەگەن نۇسقانى بەلگىلەيدى، ويىنشىعا داۋىس بەرۋ ستاتيستيكاسى كورسەتىلەدى.
زياتكەرلىك شوۋعا 18 جاسقا تولعان كەز كەلگەن ازامات قاتىسا الادى. شارتتارى دا وڭاي. «К1» ءماتىنىن 3698 نومىرىنە جىبەرسەڭىز جەتكىلىكتى. ولار تىركەلىپ، ءتۇسىرىلىم باستالعانعا بىرنەشە اپتا قالعاندا گەنەراتوردىڭ كومەگىمەن تاڭدالادى.
«ويىننىڭ ەرەكشەلىگى ستۋديادا ءبىر عانا ويىنشى بولادى جانە ونىڭ 15 سۇراققا قانشا ۋاقىتتا جاۋاپ بەرەتىنى ماڭىزدى ەمەس، ياعني، ويلانۋعا ۋاقىتى بار، سونىمەن قاتار «دوسىنان كومەك»، «ەلۋ دە ەلۋ» جانە «كورەرمەندەر كومەگى» سىندى جەڭىلدىكتەر دە قاراستىرىلعان. ەگەر، سۇراق قويىلىپ، جاۋابىنا سەنىمدى بولماسا، كەز كەلگەن ۋاقىتتا ويىندى توقتاتىپ، ۇتىسىن الىپ كەتە الادى»، - دەيدى «حابار» تەلەارناسى باعدارلامالار ديرەكتورى ايكۇمىس سەكسەنبايەۆا.
باعدارلامانىڭ ءتۇپنۇسقاسى تۇڭعىش رەت 1998 -جىلى «ITV» تەلەارناسىندا جارىق كوردى. سول ۋاقىتتان بەرى جوبا الەمنىڭ 160 اسا ەلىندە كورسەتىلىپ، كورەرمەننىڭ ىستىق ىقىلاسىنا بولەنگەن. ولاي بولسا، ءار سەنبى ساعات 20.15-تە «حابار» تەلەارناسىنان «ميلليون كىمگە بۇيىرادى؟ » ويىنىن تاماشالاڭىزدار!
باستاپقى 5 سۇراق جەڭىلدەۋ، ودان كەيىن كۇردەلەنە تۇسەدى. زياتكەرلىك شوۋدى تۇسىرۋگە زاماناۋي تەحنيكالار قولدانىلادى.
اۆتور: مارلان جيەمباي
