ەۋروپا ليگاسى: «استانا» ءوز الاڭىندا «يابلونەتستى» تىزە بۇكتىردى
ەلوردالىق ۇجىم ءوز جانكۇيەرلەرىنىڭ الدىندا ءبىرىنشى نومىرمەن ويناۋعا تىرىستى. 18-مينۋتتا بۇرىشتامادان كەيىن قولايلى پوزيتسيادا تۇرعان 11-نومىردەگى پەدرو ەنريكە گول سوعىپ، الاڭ يەلەرىن العا باستادى.
جىبەرىلگەن گولدان كەيىنگى قوناقتاردىڭ ويىنىندا ءبىرشاما جيناقىلىق بايقالدى. شابۋىلدارى ۇدەي ءتۇسىپ، ەسەپتى تەڭەستىردى. 41-مينۋتتا بۇرىشتامادان كەيىن دوپ ەلوردالىقتاردىڭ قورعاۋشىسى باحتيار زاينۋتدينوۆكە ءتيىپ، قاقپاعا كىردى. اۆتوگول باحتيارعا جازىلدى. ءبىرىنشى تايمدا باسقا گول سوعىلمادى.
ەكىنشى تايمدا دا كوماندالار ءوزارا تەڭ كۇرەس جۇرگىزدى دەۋگە بولادى. 55-مينۋتتا الاڭ يەلەرى قورعانىستا ورەسكەل قاتەگە بوي الدىرىپ، سونىڭ سالدارىنان ەدۋارد سوبول گول سوعىپ كەتە جازدادى. ابىروي بولعاندا، ونىڭ پارمەندى سوققىسى قاقپا باعانىنىڭ تۋ سىرتىنان وتە شىقتى.
استانالىقتار ەكىنشى تايمدا گول سوعاتىنداي ناعىز قاۋىپتى شابۋىلداردى ۇيىمداستىرۋدا اسا قيىندىققا تاپ بولىپ ءجۇردى. ويىن سوڭىنا تاياعان تۇستا باپكەر گ. بابايان شابۋىل شەبىن كۇشەيتۋ ءۇشىن رومان مۇرتازايەۆتى الاڭعا شىعاردى. بۇل ءوز ناتيجەسىن بەردى: چەح كومانداسىنىڭ قاقپاسىنا شىن مانىندە شتورم ۇيىمداستىرعان الاڭ يەلەرى 88-مينۋتتا ەسەپتى ەسەلەدى. تاعى دا بۇرىشتامادان دوپ اسىرىلىپ، مارين توماسوۆتان دوپ العان ەۆگەني پوستنيكوۆ گول سوقتى.
وسىدان سوڭ ەسەپكە وزگەرىس ەنگەن جوق. «استانا» جەڭىسكە جەتتى.
ەندى ەلوردالىق ۇجىم 8 ۇپايمەن «ك» توبىندا كوش باستاپ تۇر.
«استانا»: ەريچ، رۋكاۆينا، انيچيچ، كلياينحايسلەر، پەدرو ەنريكە (رومان مۇرتازايەۆ - 80')، توماسوۆ، مايەۆسكي، زاينۋتدينوۆ، ريچارد المەيدا (سەرىكجان مۋجيكوۆ - 71)، كابانانگا (رانگەلو يانگا - 62)، پوستنيكوۆ؛
«يابلونەتس»: گرۋبى، گوۆوركا، حيۋبشمان، گانوۋسەك، پوۆاجانەتس، تراۆنيك، ليشكا، دولەجال، سوبول (م. كراتوۆچيل - 72)، يوۆوۆيچ (ۆ. كۋبيستا - 89)، گولەش.
گولدار: پەدرو ەنريكە (18)، ە. پوستنيكوۆ (88) ب. زاينۋتدينوۆ (اۆت. - 41).
سارى قاعازدار: پەدرو ەنريكە (55)، م. انيچيچ (78)؛ ۆ. يوۆوۆيچ (28).
تورەشى: يستۆان ۆلاد، كومەكشىلەرى: يستۆان البەرت، بالاج سەرت (ۆەنگريا).
«استانا ارەنا» ستاديونى.
اۆتور: نۇرلان تۇياقوۆ
