تاعدىردىڭ سىناعىنا مويىماعان قازاق جىگىتى قالاي ازيا چەمپيونى اتاندى؟
سپورتشى كىشكەنتاي كەزىندە توققا ءتۇسۋىنىڭ سالدارىنان، اياق قولىنان ايىرىلعان. تاعدىر تاۋقىمەتى جاس بالانىڭ دەنە مۇشەلەرىن العانىمەن، ونىڭ ارماندارى ودان سايىن كوبەيە ءتۇسىپتى. ايتۋىنشا، ونىڭ سپورتقا اۋەستىگى اكەسىنەن دارىعان.
ستۋدەنت شاعىنان باستاپ جىگىت جۇزۋمەن اينالىسىپ، 2015-جىلى پاۆلوداردا وتكەن جارىستاردا ەكى رەت قولا، ءبىر رەت التىن مەدال يەلەنەدى.
وسىدان كەيىن حالىقارالىق سايىستاردا دا بوي كورسەتىپ، بەرليندەگى الەم كۋبوگىنان ءتورت التىن، دجاكارتاداعى ازيا پارا ويىندارىنان ەكى «التىندى» جەڭىپ الادى.
ەرجان ءتۇرلى جارىستارعا قاتىسىپ ءجۇرىپ، تورەشىلەر تاراپىنان ادىلەتسىز شەشىمدەر ورىن الىپ جاتاتىنىن دا جاسىرمايدى. ماسەلەن 2018-جىلعى مەحيكودا وتكەن الەم چەمپيوناتىندا ول جۇزۋدەن جارىس مارەسىنە العاش بولىپ جەتەدى. الايدا ءادىل قازىلار القاسى ونى «بەلگى بەرمەي تۇرىپ جارىستى باستاپ كەتتىڭ» دەپ ايىپتاپ، مەدالسىز قالدىرعان. وسىنداي جاعداي دجاكارتاداعى پارا ازيا ويىندارىندا دا قايتالانىپتى.
«مەنىڭ مەدالدارىمدى باسقالار الىپ جاتقاندا قاپالانعانىم راس. ويتكەنى جەڭىسكە مەن لايىقتى ەدىم. ءوز مىندەتىمدى 200 پايىزعا ورىندادىم»، - دەيدى سپورتشى.
ومىرىندەگى قيىندىقتارعا عانا ەمەس، جولىندا كەزدەسكەن ادىلەتسىزدىكتەرگە مويىماي، ءوز جولىمەن تۋرا جۇرەتىن جىگىتتى دوستارى ۇلگى تۇتاتىن كورىنەدى. ءتىپتى كەيبىرى وعان قاراپ، سپورتقا بەت بۇرا باستاپتى.
قايسارلىعى مەن ەڭبەكقورلىعىنىڭ ارقاسىندا ۇلكەن جەتىستىكتەرگە جەتكەن ەرجان حالىقارالىق وليمپياداداعى ۇتىسى 20 مىڭ دوللاردى قايدا جۇمسايتىنىن جاسىرماي ايتتى. ول وزىنە ىڭعايلى كولىك الىپ، سپورتتىق پروتەز ءۇشىن كولورادودا سپورتتىق پروتەز سالدىرعىسى كەلەتىنىن جەتكىزدى.
ەرجان سالىمگەرەيەۆ نەبىر قيىن كۇن تۋعاندا وزىنە قول جۇمساۋدى دا ويلاعان كورىنەدى. الايدا سپورتشى جاماندىققا جول بەرمەي، تاعدىرىن جەڭە بىلگەنى ءۇشىن ءوزىن باقىتتى سانايدى ەكەن.
«كەيبىرەۋلەر مەنەن باقىت دەگەن نە دەپ سۇراپ جاتادى. بۇل سەكۋندتار مەن مينۋتتار - وسىنىڭ ءوزى ۇلكەن باقىت. مەن ءتىپتى اياق-قولىم جوق ەكەنىن دە ۇمىتىپ كەتەمىن»، - دەيدى ول.