سەناتور مۇعالىم مەن دارىگەردىڭ باسپانا ماسەلەسىنە قاتىستى زاڭ جوباسىن ازىرلەۋدى ۇسىندى

استانا. قازاقپارات - مۇعالىمدەر مەن دارىگەرلەردىڭ تۇرعىن ءۇي ماسەلەسىن شەشەتىن زاڭ جوباسىن ازىرلەۋ كەرەك. مۇنداي ۇسىنستى بۇگىن سەناتتىڭ جالپى وتىرىسىنان كەيىن ق ر پرەمەر- ءمينيسترى باقىتجان ساعىنتايەۆتىڭ اتىنا دەپۋتاتتىق ساۋال جولداعان سەناتور ءبىرعانىم ايتىموۆا جاسادى،

دەپ حابارلايدى قازاقپارات ءتىلشىسى.

«ەلىمىزدىڭ تۇراقتى دامۋى حالىقتىڭ ءومىر ءسۇرۋ دەڭگەيىن ودان ءارى ارتتىرۋعا ۇلكەن ءۇمىت ۇيالاتادى. قازىرگى ۋاقىتتا حالقىمىزدىڭ سانى 18 ميلليون ادامنان اسىپ، ءومىر ءسۇرۋ ۇزاقتىعى 72,5 جاسقا جەتتى. قازاقستان رەسپۋبليكاسىنىڭ پرەزيدەنتى وسى جىلدىڭ 5 - قازانداعى قازاقستان حالقىنا جىل سايىنعى جولداۋىندا ءومىر ءسۇرۋ دەڭگەيى ءوسۋىنىڭ نەگىزگى قۇرامداس بولىگى رەتىندە ءومىر ءسۇرۋدىڭ ساپاسىن ارتتىرۋ ماسەلەسىنە باسا نازار اۋداردى. پرەزيدەنتىمىز ءبىلىم بەرۋ، دەنساۋلىق ساقتاۋ، تۇرعىن ءۇيدىڭ ساپاسى مەن قولجەتىمدىلىگى ماسەلەلەرى، جايلى ءارى قاۋىپسىز ءومىر ءسۇرۋ ماسەلەلەرى - ءاربىر قازاقستاندىق وتباسىنا قاتىستى بولۋى كەرەك ەكەنىن اتاپ كورسەتتى. پەداگوگ قوعامنىڭ «قوزعالتقىشى»، قوعامدىق پروگرەستىڭ كاتاليزاتورى جانە ۇدەتكىش ءرولىن اتقارادى. دارىگەر ادامدى تۋعان كەزدە قارسى الادى، ءاردايىم اۋىرعان ۋاقىتىندا جانىندا جانە ونى ءومىر جولىنىڭ سوڭىندا شىعارىپ سالادى. پەداگوگتار مەن دارىگەرلەردىڭ قوعامداعى ماڭىزدى ميسسياسىنا قاراماستان، بۇگىنگى تاڭدا ولاردىڭ كوبىنىڭ ءومىر ءسۇرۋ ساپاسى مەن تۇرعىن ءۇي جاعدايى تومەن دەڭگەيدە قالىپ وتىر نەمەسە ءوز باسپانالارى مۇلدەم جوق. مۇنداي جاعدايدى تۇبەگەيلى وزگەرتۋىمىز قاجەت»، - دەدى ءبىرعانىم ايتىموۆا سەناتور داريعا نازاربايەۆامەن بىرگە ازىرلەگەن دەپۋتاتتىق ساۋالىن جولداي كەلە.

 ونىڭ دەرەگىنشە، ەلىمىزدە مۇعالىمدەردىڭ جالپى سانى  285996 ادامدى، ونىڭ ىشىندە قالادا -  114627 ادامدى، ال اۋىلدىق جەرلەردە -  171369 ادامدى قۇرايدى. دەنساۋلىق ساقتاۋ ۇيىمدارىندا جالپى العاندا 247 مىڭنان استام مەديتسينا قىزمەتكەرى جۇمىس ىستەيدى. ولاردىڭ  72134- ءى - دارىگەرلەر، ال  175246-سى - ورتا مەديتسينا قىزمەتكەرلەرى. سونىڭ ىشىندە تىكەلەي دەنساۋلىق ساقتاۋ جۇيەسىندە -  56570 دارىگەر،  152591 ورتا مەديتسينا قىزمەتكەرلەرى جۇمىس ىستەيدى. جالپى رەسپۋبليكادا جارتى ميلليوننان استام مۇعالىمدەر مەن مەديتسينا قىزمەتكەرلەرى جۇمىس ىستەيدى، بۇل حالىقتىڭ جالپى سانىنىڭ 3 پايىزىن نەمەسە ەلىمىزدىڭ ەكونوميكالىق بەلسەندى حالقىنىڭ 6 پايىزىن قۇرايدى.

 «2018 -جىلدىڭ 8 - مامىرىندا «نۇرلى جەر» باعدارلاماسىنىڭ ىسكە اسىرىلۋىن تالقىلاۋ بارىسىندا سەنات دەپۋتاتتارى ۇكىمەتكە دارىگەرلەر مەن مۇعالىمدەردى قولجەتىمدى تۇرعىن ۇيمەن قامتاماسىز ەتۋ بويىنشا جەكە باعدارلاما ازىرلەۋدى ۇسىندى. «قازاقستان يپوتەكالىق كومپانياسى» اكسيونەرلىك قوعامى وسىنداي باعدارلامانىڭ جوباسىن دايىندادى. مۇعالىمدەر مەن دارىگەرلەردى تۇرعىن ۇيمەن قامتاماسىز ەتۋ ماسەلەسىن شەشۋ جولدارىنىڭ ءبىرى رەتىندە اسكەري قىزمەتشىلەرگە ارنالعان تۇرعىن ءۇي باعدارلاماسىنا ۇقساس قازاقستاننىڭ تۇرعىن ءۇي قۇرىلىس جيناق بانكى ىسكە اسىرىپ جاتقان مەحانيزمدى قولدانۋ قاجەت دەپ ەسەپتەيمىز»، - دەدى ول.

سەناتوردىڭ ايتۋىنشا، 2017 -جىلعى 12 - جەلتوقساندا اسكەري قىزمەتشىلەردى تۇرعىن ۇيمەن قامتاماسىز ەتۋ جۇيەسىن جەتىلدىرۋ ماقساتىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭى قابىلداندى.

 «قۇرمەتتى باقىتجان ءابدىر ۇلى، جوعارىدا ايتىلعانداردى ەسكەرە وتىرىپ، قازاقستان رەسپۋبليكاسى پرەزيدەنتىنىڭ حالىقتى قولجەتىمدى تۇرعىن ۇيمەن قامتاماسىز ەتۋ جونىندەگى تاپسىرمالارىن ورىنداۋ ءۇشىن، سىزدەن مۇعالىمدەر مەن دارىگەرلەردىڭ تۇرعىن ءۇي ماسەلەلەرىن شەشۋ بويىنشا جاڭا الگوريتمدى قاراستىراتىن قازاقستان رەسپۋبليكاسى زاڭىنىڭ جوباسىن ازىرلەۋ جونىندە ءتيىستى مەملەكەتتىك ورگاندارعا تاپسىرما بەرۋىڭىزدى سۇرايمىز»، - دەدى ب. ءايتىموۆا.

اۆتور: مارلان جيەمباي