ەستونيا پرەمەر- ءمينيسترى اقمولا وبلىسىنداعى اۋىلدا بولدى

كوكشەتاۋ. قازاقپارات - استراحان اۋدانىنىڭ پەتروۆكا اۋىلىندا ەستونيا رەسپۋبليكاسىنىڭ پرەمەر- ءمينيسترى يۋري راتاس جانە قازاقستانداعى ەستونيا رەسپۋبليكاسىنىڭ توتەنشە جانە وكىلەتتى ەلشىسى حەيتي مياەمەەس باستاعان دەلەگاتسيا بولدى، دەپ حابارلايدى قازاقپارات ءتىلشىسى.

شەتەلدىك دەلەگاتسيا قۇرامىندا 30-عا جۋىق كاسىپكەر بولدى. ەستونيالىق كاسىپكەرلەر ەلىمىزدىڭ بيزنەس قۇرىلىمدارىمەن لوگيستيكا جانە اۋىل شارۋاشىلىعى سالاسىندا ارىپتەستىك كەلىسىمشارتتار جاساماق.

مەيماندار اتالمىش اۋىلدا تۇرىپ جاتقان جەرگىلىكتى ەستون حالقى وكىلدەرىمەن كەزدەستى. پەتروۆكا اۋىلى 125 جىل بۇرىن قۇرىلعان. العاشقى قونىستانۋشىلار ەستوندىقتار بولعان. بۇگىنگى كۇنى ولاردىڭ ۇرپاقتارى وسىندا بەيبىت ءومىر كەشۋدە. 2018 -جىلدىڭ ماۋسىم ايىندا اۋىلدىڭ مەرەيتويى اتالىپ ءوتتى. شارا شەڭبەرىندە «يۋكساري» شوقىسىنا ەسكەرتكىش تاس ورناتىلدى. ەستون تىلىنەن اۋدارعاندا «وزەن جاعاسىنداعى اۋىل» دەگەندى بىلدىرەدى.

قازىرگى پەتروۆكا اۋىلى 1200 تۇرعىنى بار ىرگەلى ەلدى مەكەن. اۋىلدا 20-دان استام ۇلتتىڭ وكىلدەرى تاتۋ- ءتاتى تۇرمىس كەشۋدە. ەستونيا پرەمەر- ءمينيسترى يۋري راتاس اۋىلدىڭ اقساقالدارى گيلدوي يۋليح جانە اليديەي مياگيمەن اڭگىمەلەسىپ، تۇرمىستارى تۋرالى سۇراپ ءبىلدى.

اۆتور: اسلان وسپانوۆ