21:02, 07 - قاراشا 2018 | GMT +5
ەكىباستۇزدا مىلتىقتى زاڭسىز ساقتاعان جەسىر ايەلگە ايىپپۇل سالىندى
پاۆلودار. قازاقپارات - ەكىباستۇز تۇرعىنى تىركەلمەگەن مىلتىقتى ساقتاعانى ءۇشىن 48100 تەڭگە كولەمىندە ايىپپۇل تولەيدى، دەپ حابارلايدى «قازاقپارات» ح ا ا ءتىلشىسى.
«39 جاستاعى ايەلدىڭ تۇرعىلىقتى مەكەن-جايىنان تىركەلمەگەن مىلتىق تابىلدى. سوت وتىرىسىندا ول ءوز كىناسىن مويىنداپ، بۇل قايتىس بولعان كۇيەۋىنىڭ قارۋى ەكەنىن ءتۇسىندىردى»، - دەپ حابارلادى ەكىباستۇز قالالىق مامانداندىرىلعان اكىمشىلىك سوتىنان.
سوت قاۋلىسىمەن ايەل ايىپتى دەپ تانىلىپ، وعان 48100 تەڭگە كولەمىندە ايىپپۇل سالىندى.
«ايعاق دالەل تاركىلەنىپ، جويىلدى»، - دەپ قوستى سوتتان.
سوت قاۋلىسى زاڭدى كۇشىنە ەندى.